Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Apostel seyt van dat loon vander rechtueerdicheyt, ende van de schult ende van de bereydinghe van alle saken.

1

⁺ VVant^* wy weten, Ist dat onse^† Aertsche huys deser Hutten ghebroken wort, dat wy een timmeringhe hebben van Gode ghetimmert, een huys (niet met handen ghemaeckt) dat eewich is inden Hemel.

+ A vers 1

* 2.Tim. 4.a.8.

† 2.Cor. 4.b.7

2

^* Ende ouer dat selue verlangt ons oock nae onser behuysinghe, die vanden Hemel is,

* Roma. 8.c.19.

3

Ende ons verlangt, dat wy daer mede ouercleedet worden:^† Ist nochtans, dat wy ghecleedt, ende niet bloot geuonden worden.

† Matt. 22.b.11 Apoc. 16.c.15.

4

Want dewijle dat wy inder Hutten zijn, verlangt ons, ende zijn beswaert, nademael, wy lieuer wilden niet ontcleedet, maer ouerghecleedet worden,^‡ op dat dat sterflijcke verslonden werde vanden leuen.

‡ 1.Cor. 15.f.53.

5

Maer die ons tot den seluen bereyt, dat is Godt,^‡ die ons dat pant, den gheest, ghegheuen heeft.

‡ Rom. 8.b.16. 2.Cor. 1.c.22. Ephe. 4.c.30.

6

Ende wy hebben eenen goeden moet altijt, ende weten, dat, dewijle dat wy inden lichaem woonen, soo een zijn wy niet te huys byden Heere:

7

^* Want wy wandelen int gelooue, ende niet in beschouwinghe.

* 1.Cor. 13.b.12. 2.Cor. 3.c.18.

8

Maer wy hebben eenen goeden moet, ende hebben veel meer lust wt den lichaem te wandelen, ende thuys te zijn byden Heere.

9

⁺ Daerom beneerstighen wy ons oock, wy zijn thuys, oft wandelen, dat wy hem wel behaghen.

+ B vers 9

10

^† Want wy moeten alle geopenbaert worden, voor den Richtstoel Christi,^‡ op dat een yeghelijck ontfanghe aen zijn lichaem, daer na dat hy ghedaen heeft, het sy goet oft quaet.

† Matt. 25.c.32. Ro. 14.b.10.

‡ Iere. 17.b.10 Mat. 16.d.27 Roma. 2.a.6. 14.b.12. Apoca. 2.d.23.

11

Dewijle wy dan weten, dat de Heere te vreesen is, soo gaen wy saechtelijck met den Lieden om maer Gode zijn wy openbaer. Ende ick hope dat wy oock in uwe conscientien openbaer zijn.

12

^* Dat wy ons seluen niet wederom en louen, maer v een oorsake gheuen te beroemen van ons, op dat ghy hebt te roemen teghen die, die haerseluen na den aensien beroemen, ende niet nae der herten.

* 2.Corin. 3.a.1 10.b.12.

13

Want zijn wy te streng, soo zijn wijt Gode: Sijn wy matich, soo zijn wy v matich.

14

Want de liefde Christi dringt ons alsoo: Nademael wijt daer voor houden, Dat, ist datter een voor allen gestoruen is, so zijn sy alle gestoruen.

15

^† Ende hy is daerom voor alle gestoruen,^‡ op dat die, die daer leuen, voortaen niet haerseluen en leuen, maer den ghenen, die voor haer gestoruen ende verresen is.

† 1.Tess. 5.b.10.

‡ Ro. 14.a.7. Gallat. 2.c.21. 1.Pet. 4.a.2.

16

^* Daerom van nv aen, en kennen wy niemant na den vleesche. Ende al ist dat wy oock Christum ghekent hebben na den vleesche, soo en kennen wy hem doch nv niet meer.

* matt. 12.d.50 Ioan. 15.b.14

17

⁺ Daerom isser yemandt in Christo,^† soo is hy een nieuwe Creature. Dat oude is vergaen,^‡ siet, het is altemael nieuw gheworden.

+ C vers 17

† Galat. 6.c.17.

‡ Esa. 43.c.19 Apoc. 21.a.5.

18

Maer dat al van Gode, die ons met hemseluen^* versoent heeft, door Iesum Christum, ende ons dat Ampt ghegheuen, dat de versoeninghe predickt.

* Colos. 1.c.19

19

^† Want Godt was in Christo, ende versoende de wereldt met hemseluen, ende en rekende hen haer sonden niet toe, ende heeft onder ons opghericht dat woort vander versoeninghe.

† Rom. 3.c.24. Coloss. 2.b.9. 1.Ioan. 4.b.10

20

So zijn wy nv boden in Christus stede, want Godt vermaent door ons. So bidden wy nv in Christus stede, laet v versoenen met Gode.

21

^‡ Want hy heeft den genen, die van geener sonde en wiste,

‡ Esaie. 53.b.12. Roma. 8.a.3. Hebr. 9.c.14.

[p. 75v]

voor ons tot sonde ghemaect, op dat wy werden in hem de gherechticheyt, die voor Godt ghelt.