Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel toont dat hy niet en begheert Lof der menschen, oft hy en soeckes oock niet, ende prijst de dienaers Christi nae weerdicheyt der officien, ende vander excellentien der kennissen.

1

⁺ BEghinnen^* wy dan wederom ons seluen te prijsen? Oft behoeuen wy, ghelijck als sommighe, der lof brieuen aen v, oft lof brieuen van v?

+ A vers 1

* 2.Cor. 5.b.12. 10.b.12.

2

Ghy zijt onsen Brief, in onse herten gheschreuen, die bekent ende ghelesen wort van allen menschen,

3

Ghy die openbaer geworden zijt, dat ghy een Brief Christi zijt, door dat Predicampt bereyt, ende van ons ghescreuen, niet met Inct, maer met den gheest des leuendighen Godts,^† niet in steenen Tafelen,^‡ maer in vleeschelijcke Tafelen des herten.

† Exod. 24.c.12 34.a.1.

‡ Iere. 31.e.33. Ezech. 11.d.19 36.f.26.

4

Ende soodanigen betrouwen hebben wy door Christum tot Gode,

5

Niet dat wy bequaem zijn van ons seluen, yet te dencken, als van ons seluen^* maer dat wy yet duegen, dat is van Gode,

* Philip. 2.b.13

6

Die ons oock bequaem ghemaect heeft, dat Ampt te voeren des nieuwen Testaments, niet des letters, maer des gheests.⁺ Want de letter doodet, maer de gheest maect leuendich.

+ B vers 6

7

Maer ist dat dat Ampt,^† dat door de letter doodet, ende inde steenen is gebeelt, claerheyt hadde,^‡ alsoo, dat de kinderen Israels niet en conden aensien dat aensicht Mosi, om der claerheyt wille zijns aensichts, die doch ophout,

† Deute. 9.c.10. 10.a.2.

‡ Exo. 34.d.33

8

Hoe en soude dan niet veel meer dat Ampt,^‡ dat den gheest geeft, claerheyt hebben?

‡ Actor. 2.a.4. 10.e.44.

9

Want ist dat dat Ampt, dat de verdoemenis predickt, claerheyt heeft, veel meer heeft dat Ampt, dat de gherechticheyt predict, oueruloedige claerheyt.

10

Want ooc ghene deel, dat verclaert was, en is voor geene claerheyt te houden, teghen dese ouermatighe claerheyt.

11

Want ist dat dat claerheyt hadde, dat ophout, veel meer sal dat claerheyt hebben, dat daer blijft.

12

⁺ Dewijle wy nv alsulcken hope hebben, soo zijn wy vrijmoedich,

+ C vers 12

13

Ende en doen niet als Moses,^* die een decsel voor zijn aensicht hinck, dat de kinderen Israels niet aensien en conden,^† dat eynde, des geens dat ophout,

* Exo. 34.d.33.

† Esaie. 6.b.9. Mat. 13.b.14 Acto. 28.d.26. Rom. 10.a.4.

14

^‡ Maer haer sinnen zijn verstoct. Want tot op den dach van heden toe, blijft dat selue decsel onontdect, ouer dat Oude Testament, wanneer zijt lesen, welcke in Christo ophout.

‡ Ezec. 12.a.2. Roma. 11.a.8.

15

Maer tot heden op den dach, wanneer Moses ghelesen wordt, hangt dat decksel voor haer herte.

16

^* Maer wanneer^† het hem bekeerde tot den Heere, soo werde dat decksel afghenomen.

* Ioan. 4.c.24 Roma. 11.c.23

† Herte.

17

Want de Heere is de gheest, ende waer de gheest des Heeren is, daer is vrijheyt.

18

^‡ Maer nv spieghelt haer in ons allen des Heeren claerheyt, met opghedecten aensicht, ende wy worden verclaert in dat selue Beelt, van eener claerheyt tot der anderen, als vanden gheest des Heeren.

‡ 1.Cor. 13.c.12. 2.Cor. 5.a.7.