Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel bethoont hier hoe dat hy om tweederley saken niet ghecomen en is, totten Corinthen, te weten dat hy niet bedroeft en ware. Ende op dat hy elders meer vrucht doen soude, hy vermaent haer dat si hem opnemen souden, die te voren inden Ban ghedaen was.

[p. 74v]

1

⁺ ICk^* roepe Godt aen tot een getuyghe op mijn siele, dat ick uwer daer aen verschoont hebbe, dat ick niet weder tot Corinthum ghecomen en ben.

+ A vers 1

* Roma. 9.a.1. Galat. 1.c.20. Philip. 1.b.8.

2

Niet dat wy^† Heeren zijn ouer uwen ghelooue, maer wy zijn Helpers uwer vruechden, Want ghy staet int gelooue.

† 1.Petri. 5.a.3.

3

Maer ick dacht sulcx by my seluen, dat ick niet wederom in truericheyt tot v en quame.

4

Want ist dat ick v truerich maeckte, wie isser die my vrolijck make, dan die, die van my bedroeft wort?

5

Ende dat selue heb ick v ghescreuen, op dat ick niet, wanneer ick quame, truerich zijn en dorste, ouer welcken ick my met recht sal verblijden, nademael ick my des tot v allen vertrou, dat mijn vruechde uwer alder vruechde sy.

6

Want ick screef v in grooter droeffenisse ende angste des herten, met veel tranen, Niet dat ghy sout bedroeft worden, maer, op dat ghy de liefde bekendet, die ick hebbe, sonderlinghe tot v.

7

⁺ Maer ist dat yemant een droeffenis aenghericht heeft, die en heeft my niet bedroeft, dan alleen eensdeels, op dat ick v niet alle en besware.

+ B vers 7

8

^‡ Het is ghenoech, dat die selue van velen alsoo ghestraft is,

‡ 1.Corin. 5.a.3

9

Op dat ghy hem nv voortaen, des te meer vergheeft ende troostet, op dat hy niet in alte groote truericheyt en versincke.

10

Daerom vermaen ick v, dat ghy de liefde aen hem bewijset:

11

Want daerom heb ick v oock ghescreuen, op dat ick bekende, oft ghy oprecht zijt, ghehoorsaem te zijn in allen stucken.

12

Maer wien ghy yet vergheeft, dien vergheue ick oock.^* Want oock ick, ist dat ick yemant yet vergheue, dat vergheue ick om uwen twille, in Christus stede,

* Ioan. 20.c.23.

13

Op dat ghy niet bedroghen en wordet vanden Satan. Want ons en is niet onbekent, wat hy inden sin heeft.

14

⁺ Maer doen ick^‡ tot Troada quam, te prediken dat Euangelium Christi, ende my een duer open ghedaen was inden Heere,

+ C vers 14

‡ Actor. 16.b.8.

15

En had ick gheen rust in mijnen gheest, dat ick Titum mijnen lieuen Broeder niet en vant, maer ick maeckte mijnen afscheydt met haer, ende voer wt in Macedonien.

16

Maer Gode sy ghedanct, die ons altijt ouerwinnige gheeft in Christo,^† ende openbaert den rueck zijnder bekennisse, door ons aen allen plaetsen:

† Collos. 1.c.26.

17

Want wy zijn Gode een goede rueck Christi, beyde onder den ghenen, die salich worden, ende onder den ghenen die verloren worden:

18

Desen^‡ een rueck des doots tot den doot, maer ghenen, een rueck des leuens tot den leuen. Ende wie dooch daer toe?

‡ Luce. 2.e.34.

19

Want wy en zijn niet ghelijck sommigher veel,^* die dat woort Godts verualschen, maer als wt louterheyt, ende als wt Gode, voor Gode spreken wy in Christo.

* 2.Cor. 4.a.2.