Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ De Apostel vermaent haer tot die hantreyckinghe der armen, die tot Ierusalem woonden, ende besluyt desen brief met veel schoone groeten, aen de vrienden.

1

⁺ VAnder^* hantreyckinghe, die den Heylighen gheschiet, ghelijck als ick den gemeynten in Galatia beuolen hebbe, alsoo doet ghy oock.

+ A vers 1

* Rom. 15.d.26 2.Cor. 8.a.4. 9.a.1.

2

Op eenen yeghelijcken der Sabbathen, legghe by hemseluen een yeghelijck van v, ende vergadere wat hem wel te doen is op dat niet, wanneer ick come, dan alder eerst de hantreyckinghe te vergaderen en si.

3

Maer wanneer ick daer gecomen ben, welcke ghy door Brieuen daer voor aensiet, die wil ick henen seynden, dat sy uwe weldaet henen brengen na Ierusalem.

4

Maer ist des weerdich, dat ick oock daer henen reyse, soo sullen sy met my reysen.

5

^† Maer ick wil tot v comen, als ick door Macedonien trecke: Want door Macedonien sal ick trecken,

† Actor. 19.c.21. 2.Cor. 1.c.15.

6

Maer by v sal ick ter auontueren blijuen, oft oock winteren, op dat ghy my gheleyt, waer ick henen reysen sal.

7

⁺ Ick en wil v nv niet sien int voorby reysen, want ick hope, ick wil eenen tijt lanck by v blijuen, ist dattet de Heere toelaet.

+ B vers 7

8

^‡ Maer ick sal tot Epheso blijuen, tot op Pinxten,

‡ Actor. 20.a.6.

9

Want my is een groote duere opghedaen, ende sy zijn neerstich,^* ende daer zijn veel wederpartien.

* 1.Cor. 15.d.32.

10

^† Ist dat Timotheus coemt, soo siet toe, dat hy sonder vreese by v sy, Want hy drijft oock dat werck des Heeren ghelijck als ick.

† Act. 19.c.22.

11

Dat hem nv niet yemant en verachte, maer geleyt hem in vrede, dat hy tot my come, want ick wacht hem met de Broeders.

12

Maer van^‡ Apollo den Broeder (wetet) dat ick hem seer veel vermaent hebbe, dat hy tot v quame met den Broederen: Ende het en was gheensins zijnen wille, dat hy nv quame, maer hy sal comen, wanneert hem gheleghen zijn sal.

‡ Acto. 18.c.24. 1.Cor. 1.b.11. 3.a.4.

[p. 74r]

13

⁺ Waket staet int gelooue, zijt manlijc, ende zijt sterck.

+ C vers 13

14

Laet alle uwe dingen inder liefde gheschien.

15

Ick vermaen v lieue Broeders, ghy kent^* dat huys Stephana, dat si zijn de eerstelinghen in Achaia, ende hebben haer seluen gheordineert tot den dienst der Heyligen,

* 1.Cor. 1.b.14.

16

Op dat ghy oock sulcken onderdanich zijt, ende allen die mede wercken ende arbeyden.

17

Ick verblije my van de toecoemst Stephana, ende Fortunati, ende Achaici. Wandt waer ick uwer ghebreck hadde, dat hebben si veruult.

18

Sy hebben vermaect mijnen ende uwen gheest. Bekent het, dat si sulcke zijn.

19

V groeten de gemeynten in Asia. V groet seer inden Heere^† Aquilas ende Priscilla, met der ghemeynte in haren huyse.

† 2.Tim. 4.c.19

20

V groeten alle Broeders.^‡ Groet v onder malcanderen met den heylighen Cus.

‡ Rom. 16.b.15 2.Cor. 13.b.12. 1.Tess. 5.c.26. 1.Pet. 5.b.14

21

Ick Paulus groete v met mijnder handt.

22

Ist dat yemant den Heere Iesum Christum niet lief en heeft, Die sy Anathema Maharam Motha.

23

De genade des Heeren Iesu Christi sy met v.

24

Mijn liefde sy by v allen in Christo Iesu, Amen.

¶ De eerste Epistel tot den Corintheren. Ghesonden van Philippis, door Stephanen, ende Fortunatum, ende Achaium, ende Timotheum.