Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ De Apostel straft de misbruyckinge der Corintheren, die welcke sy hadden als sy te samen quamen om des Heeren broot te breken, ende wijst haer op de insettinghe Christi.

1

⁺ ICk loue v, lieue broederen, dat ghy aen my ghedenckt in allen stucken, ende houdet de maniere, ghelijck als ick v ghegheuen hebbe.

+ A vers 1

2

Maer ick late v weten, dat Christus eens yeghelijcken mans hooft is:^* Maer de man is des wijfs hooft: Ende God is Christus hooft.

* Ephe. 5.c.23.

3

Een yeghelijck man, die daer bidt of propheteert, ende heeft wat opt hooft, die scheyndet zijn hooft.

4

Maer een wijf die daer bidt of propheteert, met onbedecten hoofde, die scheyndet haer hooft. Want het is effen soo veel, als waer sy beschoren.

5

En wil sy haer niet bedecken, soo snijdemen haer oock dat hayr af.^* Maer nv het qualijc staet, dat een wijf afghesneden hayr hebbe, ofte beschoren sy, soo laet sy dat hooft bedecken.

* Deut. 22.a.5.

6

Maer de man en sal dat hooft niet bedecken, nademael hy^† Gods beeldt ende Eere is: Maer dat wijf is des mans eere.

† Ephe. 4.c.24 Gen. 1.d.27. 5.a.1. 9.b.6.

7

Want de man en is niet vanden wijue, maer dat wijf is vanden man.

8

Ende de man en is niet geschapen om des wijfs wille^‡ maer dat wijf om des mans wille.

‡ Genes. 2.d.21.

9

⁺ Daer om sal dat wijf een^‡ macht opt hooft hebben, om der^* Engelen wille.

+ B vers 9

‡ Decksel.

* Mala. 2.b.7 Apoca. 1.d.20 2.a.1.

10

Nochtans en is noch de man sonder dat wijf, noch dat wijf sonder den man, inden Heere.

11

Want ghelijck als dat wijf van den man, also coemt ooc de man door dat wijf, maer alle dinck van Gode.

12

Ordeelt by v seluen, oft wel staet, dat een wijf onbedeckt voor Godt bidde?

13

Oft en leert v niet ooc de nature, dattet eenen man een oneere is, ist dat hy lanc hayr heeft:

14

Ende den wijuen een eere ist dat si lanc hayr heeft? Dat hayr is tot een decsel gegeuen.

15

Maer isser yemant onder v,^* die lust tot kijuen heeft, die wete, dat wy die maniere niet en hebben, de Ghemeynte Gods oock niet.

* 1.Timo. 6.c.5.

16

Maer ick moet dit beuelen, Ic en cant niet louen, dat ghy niet op beter maniere maer op erger maniere te samen coemt.

17

Ten yersten, wanneer ghy te samen coemt in de ghemeynte, hoore ick, daer zijn partijen onder v, ende ick geloofs oock eens deels.

18

^‡ Want daer moeten Secten onder v zijn, op dat die, die oprecht zijn, openbaer onder v worden.

‡ Matt. 18.a.7. 1.Ioan. 2.c.19

19

⁺ Wanneer ghy nv te samen comet, so en houtmen daer niet des Heeren Auontmael.

+ C vers 19

20

Want wanneermen dat Auontmael houden sal, so neemt een yegelijck zijn eygen te voren. Ende de een is hongerich, ende de ander is droncken.

21

Maer en hebt ghy

[p. 72r]

gheen huysen, daer ghy eten ende drincken muecht? Ofte veracht ghy de ghemeynte Gods, ende bescaemt die, die niet en hebben? Wat sal ick van v segghen? Sal ick v louen? Hier in en loue ick v niet.

22

Ick hebt vanden Heere ontfanghen, dat ick v ghegeuen hebbe.^* Want de Heere Iesus in der nacht, doen hy verraden wert, nam hy dat broodt,

* Mat. 26.c.25. Mar. 14.c.22 Luce. 22.b.19.

23

Danckte, ende^† brackt, ende sprack: Nemet, eet, dat is mijn Lijf,^‡ dat voor v ghebroken wordt, sulcx doet tot mijnder ghedachtenis.

† Act. 20.b.11.

‡ Esai. 53.a.7.

24

Des seluen ghelijcken oock den kelck, na den Auontmael, ende sprac: Dese kelck is dat nieuwe Testament in mijnen bloede, sulcx doet, soo dicwils ghijt drincket, tot mijnder ghedachtenis.

25

Want so dicwils als ghy van desen broode eet, ende van desen kelck drinct, sult ghy des Heeren doot vercondigen, tot dat hy^‡ coemt.

‡ Actor. 1.b.11.

26

Wie nv onweerdichlijc van desen broode eet, oft van den kelck des Heeren drinct, die is schuldich aen dat Lijf ende bloet des Heeren.

27

^+* Maer de mensche proeue hemseluen, ende also ete hy van desen broode, ende drincke van desen kelc.

+ D vers 27

* Eccli. 18.c.25. 2.Cor. 13.a.5.

28

Want wie onweerdichlijck eet ende drinct, die eet ende drinct hemseluen dat ordeel, daer mede, dat hy niet en onderscheyt het Lijf des Heeren.

29

Daer om zijn oock so veel swacken ende crancken onder v, ende een goet deel slapen.

30

^† Want waert dat wy ons seluen ordeelden, soo en werden wy niet gheordeelt.

† Eccli. 18.c.25.

31

Maer wanneer wy gheordeelt worden, soo worden wy van den Heere ghecastijt, op dat wy met der^‡ Werelt niet verdoemt en worden.

‡ 1.Ioan. 2.c.17

32

Daer om mijn lieue broederen, wanneer ghy te samen coemt te eten, soo verwachte de eene den anderen.

33

Maer honghert yemant, die ete te huys, op dat ghy niet tot den ordeel te samen en coemt. Dat ander wil ick ordineren, wanneer ick come.