Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ De Apostel prijst hier int generael de gratie Gods, declarerende de condicien der gratien, die om niet ghegeuen wort, Ghelijckende dat lichaem der Ghemeynten teghen dat lichaem der naturen.

1

⁺ VAn den gheestelijcken ghauen, en wil ick v, lieue Broederen, niet onthouden.

+ A vers 1

2

Ghy weet, dat ghy Heydenen zijt gheweest, ende zijt henen ghegaen tot den stommen Afgoden, als ghy slechs gheleyt werdet.

3

Daerom doe ick v condt,^† dat niemandt Iesum veruloeckt, die door den gheest Gods spreeckt: Ende niemant en can Iesum een Heere heeten, dan alleen door den heylighen gheest.

† Matt. 9.d.38.

4

^‡ Daer zijn menigherley gauen, maer daer is een gheest:

‡ Rom. 12.a.6. 1.Pet. 4.b.10

5

Ende daer zijn menigherley Ampten, maer daer is een Heere:

6

Ende daer zijn menigherley crachten, maer daer is een Godt^* die daer werckt alle dinck in allen.

* Ioan. 5.b.17.

7

In eenen yeghelijcken bewijsen haer de gauen des gheests, tot den ghemeynen profijte.

8

Den eenen wort ghegheuen door den geest, te spreken vander ^* wijsheyt: Den anderen wort ghegeuen, te spreken van de bekennisse, nae den seluen gheest:

* 1.Cor. 1.d.29.

9

Eenen anderen dat gelooue, in den seluen gheest: Eenen anderen de gauen, ghesont te maken, inden seluen geest:

10

Eenen anderen wonder te doen^† Eenen anderen prophetie: Eenen anderen^‡ gheesten te onderscheyden: Eenen anderen menigherley spraken: Eenen anderen de spraken wt te legghen.

† Ephe. 4.a.11.

‡ 1.Ioan. 4.a.1

11

Ende dit alle, werckt die selue eenighe gheest, ende deylt eenen yeghelijcken dat zijne toe, ghelijck hy wil.

12

^+* Want ghelijck als een Lijf is, ende heeft nochtans veel leden, maer alle leden eens Lijfs, hoe wel haerder veel zijn, soo zijn si nochtans een Lijf: Alsoo oock Christus.

+ B vers 12

* Rom. 12.a.4. Ephe. 4.b.7.

13

Want wy zijn in eenen geest, alle tot eenen lijue gedoopt, wy zijn Ioden ofte Griecken, knechten oft vrije, ende zijn alle in eenen gheest^† ghedrenckt.

† Esaie. 55.a.1. Ioan. 7.d.38.

14

Want oock dat Lijf, en is niet een lit, maer veel.

15

Oft nv de voet sprake: Ick en ben geen hant, daer om en ben ick des Lijfs lidt niet: Soude hy om des wille des Lijfs lidt niet zijn?

16

Ende oft dat oor sprake: Ick en ben gheen ooghe, daerom en ben ick des Lijfs lit niet: Soudet om des wille des Lijfs lit niet zijn?

17

Waert dat dat gantsce Lijf dat ooghe ware, waer bleef dat ghehoor? Waert dattet gheheel dat ghehoor ware, waer bleef den ruecke?

18

Maer nv heeft Godt de leden gheset, een yegelijc sonderlijck aen dat Lijf, ghelijc hy gewilt. heeft.

19

Waert dat nv alle leden, een lit waren, waer bleef dat Lijf?

20

⁺ Maer nv zijn der leden veel, maer dat Lijf is een.

+ C vers 20

21

Dat ooge en can niet seggen tot der hant: Ick en behoeue uwer niet, oft wederom dat Hooft tot den voeten: Ick en behoeue uwer niet.

22

Maer veel meer, de leden des Lijfs, die ons duncken de swackste te zijn, die zijn de alder nootsakelijcste.

23

Ende die ons duncken de oneerlijcste te zijn, den seluen doen wy de meeste eere aen:

24

Ende die ons qualijc aenstaen, die verciertmen alder meest: Want die ons wel aenstaen, die en behoeuens niet. Maer God heeft dat Lijf alsoo wel ghemenghet, ende den behoeftigen leden, aldermeest eere ghegheuen,

25

Op datter gheen oneenicheyt inden Lichaem en sy, maer de leden voor malcanderen ghelijck sorghen.

26

Ende ist dat een lit lijdet, so lijden alle leden mede: Ende ist dat een lidt heerlijck ghehouden wort, soo verblijden haer alle leden mede.

27

^* Maer ghy zijt dat Lijf Christi ende leden, een yeghelijc na zijn deel.

* Rom. 12.a.5. Ephe. 5.c.23.

28

Ende God heeft geset inder gemeynte, Ten eersten de^† Apostelen, ten anderen de Propheten, ten derden de^‡ Leeraers, daer na de wonderdaders, daer na de gauen ghesont te maken, Hulpers, Regeerders, menigherley spraken.

† Matt. 10.a.1. Luce. 9.a.1. Ephe. 4.a.11.

‡ Actor. 13.a.1.

29

Sijn sy alle Apostelen? Sijn sy alle Propheten? Sijn sy alle Leeraers? Sijn sy alle Wonderdaders?

30

Hebben sy alle de gauen gesont te maken? Spreken si alle met menigherley spraken? Connen si alle wtleggen?

31

Staet neerstelijc na de beste gauen. Ende ick wil

[p. 72v]

v noch eenen costelijckeren wech wijsen.