Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ De Apostel treckt ende leydt dye van Corinthen tot de volmaecktheyt der duechden, door een exempel van hemseluen, ende door de ghene die na prijs loopen.

1

⁺ EN ben ick niet een Apostel? Ben ick niet vrij?^* En heb ick niet onsen Heere Iesum Christum ghesien? En zijt ghy niet mijn werck in den Heere?

+ A vers 1

* Acto. 9.a.3.c.17. 22.b.17. 1.Cor. 15.a.8. 2.Cor. 12.a.2.

2

En ben ick den anderen gheen Apostel, soo ben ick doch uwe Apostel. Want de Segel mijns Apostel Ampts, zijt ghy in den Heere.

3

Wanneermen my vraecht, soo antwoorde ick also:

4

^† Hebben wy gheen macht te eten ende te drincken?

† 1.Cor. 9.b.14 2.Tess. 3.b.9.

5

Hebben wy oock gheen macht, een Suster tot eenen wijue mede alom te leyden, gelijck als de ander Apostelen, ende des Heeren broederen,^* ende Cephas?

* Mat. 8.b.14. Luce. 4.d.38.

6

Ofte en hebben wy alleen, ick ende Barnabas, gheen macht dat te doen?

7

Wie treckt ymmermeer in den Crijch op zijn eyghen soudie? Wie plant een wijngaert, ende en eet niet van zijne vrucht? Oft wie weydet een cudde, ende en eet niet van de melc der cudden?

8

⁺ Maer spreke ick sulcx op menschen wijse? En spreect niet sulcx ooc de Wet?

+ B vers 8

9

^* Want in de Wet Mosi staet gheschreuen: Ghy en sult den Ossche den mont niet toe binden, die daer dorschet. Sorcht Godt voor de Osschen?

* Deut. 25.a.4. 1.Tim. 5.c.18.

10

Oft en seyt hijt niet gheheelijck om onsen wille? Want het is ymmers om onsen wille gheschreuen. Want die daer ploeghet, die sal op hope ploeghen: Ende die daer dorschet, die sal op hope dorschen, dat hy zijns hopes deelachtich worde.

11

^* Ist dat wy v dat gheestelijcke sayen, ist een groot dinck, oft wy uwe lichamelijcke mayen?

* Rom. 15.d.27 Gala. 6.a.6.

12

Ende ist dat ander deser macht aen v deelachtich zijn, waer om niet veel meer wy?^† Maer wy en hebben sulcke macht niet ghebruyckt, Maer wy verdraghen allerley, dat wy den Euangelio Christi gheen hindernis en maken.

† Actor. 20.e.33. 2.Cor. 11.b.11. 12.c.13.

13

^‡ En weet ghy niet, dat die gene die daer offeren, vanden Offer eten? Ende die des Altaers waer nemen, des Altaers ghenieten?

‡ Deut. 18.a.1.

14

^* Alsoo heeft oock de Heere beuolen, dat die ghene, die dat Euangelium vercondighen, haer van den Euangelio generen sullen.

* Mat. 10.a.10. Luce. 10.b.7. 1.Tim. 5.c.18.

15

^† Maer ick en heb dier gheen gebruyct.⁺ Ick en schrijue oock daerom daer niet af, dattet met my also soude ghehouden worden. Het waer my lieuer, ick storue, dan dat my yemant mijnen Roem soude te niet maken.

† Acto. 20.e.33 2.Cor. 11.a.9. 12.c.13. 2.Thess. 3.a.8

+ C vers 15

16

Want dat ick dat Euangelium predike, dies en derf ick my niet beroemen, want ick moetet doen. Ende wee my, waert dat ick dat Euangelium niet en predicte.

17

Doe ickt geerne, so wort my gheloont: Maer doe ickt ongeerne, so is my dat Ampt doch beuolen.

18

Wat is dan nv mijn loon? Namelijc, dat ic predike dat Euangelium Christi, ende doe dat selue vrij om niet, op dat ick mijner vrijheyt niet en misbruycke aenden Euangelio.

19

Want hoe wel ick vrij ben van alleman, heb ick nochtans my seluen alleman tot een knecht ghemaect, op dat ick haerder vele ghewinne.

20

^* Den Ioden ben ick gheworden als een Iode, op dat ick de Ioden ghewinne.⁺ Den ghenen die onder de Wet zijn, ben ick geworden als onder de Wet, op dat ick die gene, die onder de Wet zijn, ghewinne.

* Actor. 16.a.3. 18.b.18. 21.d.23

+ D vers 20

21

^* Den genen, die sonder Wet zijn, ben ick sonder Wet geworden (so ick nochtans niet sonder Wet en ben voor Gode, maer ben in de Wet Christi) op dat ick die ghene, die sonder Wet zijn gewinne.

* Galat. 2.a.3.

22

^† Den swacken ben ick gheworden, als een die daer swack is, op dat ick de swacken ghewinne.^‡ Ick ben alleman allerley geworden, op dat ick allesins doch sommighe salich make.

† Roma. 15.a.1.

‡ 1.Cor. 10.d.33.

23

Maer sulcx doe ick om des Euangeliums wille, op dat ick zijnder deelachtich worde.

24

Weet ghy niet, dat die gene, die in de Wedbaen loopen, die loopen alle, maer een behaelt den prijs? Loopt nv also, dat ghy hem vercrijcht.

25

^‡ Ende een yeghelijck die daer campt, onthout hem van alle dinck: Ghene also, dat sy een vergancklijcke Croon ontfanghen,^† maer wy, een onuerganckelijcke.

‡ 2.Tim. 2.a.4.

† 1.Tim. 4.b.8. 1.Pet. 5.a.4.

26

Maer ick loop also, niet als opt ongewis: Ick vecht also, niet als een die in de locht slaet:

27

Maer ick verdooue mijn lichaem, ende temme het, op dat ick niet den anderen en predicke, ende selue verworpelijck worde.