Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ De Apostel bewijst dat de wetenheyt van gheender weerden en is, ten sy dat sy gheordineert is metter liefden. Oock bewijst hy de maniere, hoe datmen de spijse der Afgoden ghebruycken sal, Daer nae straft hy de vermetenheyt van sommighe die de crancke ende swacke scandaliseren.

1

⁺ VAn den^* Afgoden offer weten wy, want wy hebben alle de wetenheyt. De wetenheyt blaest op, maer de liefde^† betert.

+ A vers 1

* Acto. 15.c.20.

† Sticht.

2

Mer ist dat hem yemant laet duncken, hy wete wat, die en weet noch niet, hoe hy weten soude.

3

Maer ist dat yemant Godt lief heeft, die selue is van hem bekent.

4

^‡ Soo weten wy nv van der spijse des Afgoden offers, dat een Afgodt in der werelt niet en sy,^* ende datter geen ander Godt en sy, dan de eenighe.

‡ Ro. 14.b.14. 1.Cor. 10.c.19.

* Deut. 4.f.35. 6.b.4. Esa. 44.b.6. Ephe. 4.a.6.

5

Ende hoe wel datter wel zijn,^† die Goden ghenoemt worden, het sy inden Hemel of op Aerde (nademnael, daer veel goden, ende veel heeren zijn)

† Psal. 82.a 6

6

Soo en hebben wy doch maer eenen Godt, den Vader^‡ van welcken alle dinghen zijn, ende wy in hem.^* Ende eenen Heere Iesum Christum, door welcken alle dinghen zijn, ende wy door hem.

‡ Rom. 11.d.36.

* Ioan. 13.b.13. Phil. 2.b.11.

7

⁺ Maer alle man en heeft de wetenheyt niet. Want sommighe maken haer noch een^† consciencie ouer den Afgoden, ende etent voor Afgoden offer, daer wort haer consciencie, dewijle dat sy soo swack is, mede beulect.

+ B vers 7

† 1.Cor. 20.d.29

8

^‡ Maer de spijse en vordert ons voor Gode niet. Eten wy, soo en sullen wy daerom niet beter zijn: Eten wy niet, soo en sullen wy daerom niet minder zijn.

‡ Rom. 14.c.17

9

^* Maer siet toe, dat dese uwe vrijheyt, niet en gerake tot eenen aenstoote der swacken.

* Galat. 5.b.13.

10

Want waert dat v, ghy die de kennisse hebt, yemandt saghe ter tafelen sitten int Afgoden huys, en wort niet zijn consciencie, dewyle dat hy swack is, veroorsaect, dat Afgoden offer te eten.

11

^† Ende also sal de swacke broeder ouer dijner kennissen vergaen, om welcx wille doch Christus ghestoruen is.

† Rom. 14.c.15.

12

Maer wanneer ghy

[p. 71r]

also sondicht aen den broederen, ende slaet haer swacke conscientien, so sondicht ghi aen Christo.

13

^* Daerom ist dat de spijse mijnen broeder erghert, soo en woude ick nymmermeer vleesch eten, op dat ick mijnen broeder niet en ergherde.

* Rom. 14.c.21.