Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ De Apostel leert hoe dat sy haren houwelijcken staet onderhouden sullen, ende daer na die ghene die den houwelijcken staet om een beter goet te vercrijghen, schouwen, Ende leert, dat den gheloouighen altoos zijn ghelooue leuen moet, al ist dat den ongeloouighen scheyden wil.

1

⁺ DAer ghy my af gheschreuen hebt, antwoorde ick: Het is den mensche goet dat hy gheen vrouwe aen en roere:

+ A vers 1

2

Maer om der hoererije wille, hebbe een yeghelijck zijn eyghen wijf, ende een yeghelijcke hebbe haren eyghen Man.

3

^* De man gheue den wijue de schuldighe vrienschap: Des seluen ghelijcken, dat wijf den Man.

* 1.Petr. 3.a.7.

4

Dat wijf en is haers lijfs niet machtich, maer de Man: Des seluen gelijcken, de Man en is zijns lijfs niet machtich, maer dat wijf.

5

^† Een en ontrecke hemseluen den anderen niet, ten si dan wt beyder bewillinghe, een tijt lanck, dat ghy v tot vasten ofte bidden ledicht, Ende coemt weder te samen, op dat v de Satan niet en temptere, om uwer oncuysheyt willen.

† Ioel. 2.c.16. Tobi. 6.d.16. 8.a.4.

6

Maer sulcx seg ick wt gonst, ende niet wt ghebot.

7

^‡ Want ick woude lieuer, dat alle menschen waeren als ick ben. Maer een yeghelijc heeft zijn eygen gaue van Gode, de eene aldus, de ander also.

‡ Acto. 26.c.29.

8

Ick seg, tis waer, den ongetrouden ende weduwen: Het is haer goet, ist dat sy oock blijuen als ick.

9

^* Maer ist dat sy haer niet en onthouden, so laetse trouwen. Het is beter trouwen, dan brant lijden.

* 1.Tim. 5.b.14

10

⁺ Maer den ghetrouden ghebiede, niet ick, maer de Heere:^† Dat dat wijf haer niet en scheyde van den Man:

+ B vers 10

† Deut. 24.a.1. Mala. 2.c.16. Matt. 5.d.32. 19.a.9.

11

Ende ist dat sy haer scheydet, dat sy ongetrout blijue, of haer met den man versoene: Ende dat de man, dat wijf niet en verlate.

12

Maer den anderen, seg ick, niet de Heere:^‡ Ist dat een broeder een ongeloouich wijf heeft, ende der seluer beliefthet by hem te woonen, die en scheyde hem niet van haer.

‡ 1.Esdre. 9. 10.

13

Ende ist dat een wijf eenen ongheloouighen man heeft, ende het belieft hem by haer te woonen, die en scheyde haer niet van hem.

14

Want de ongeloouige man, is geheylicht door dat wijf, ende dat ongeloouich wijf, is gheheylicht door den man, anders waren uwe kinderen

[p. 70v]

onreyn, maer nv zijn sy heylich.

15

Maer ist dat de ongheloouighe hem scheydet, soo laet hem scheyden. De broeder of de Suster en is niet gheuangen in sulcken gheual: Maer in vrede heeft ons Godt gheroepen.

16

^* Ende wat weet ghy, ghy wijf, of ghy den Man salich sult maken? Ofte ghy man, wat weet ghy, of ghy dat Wijf salich sult maken?

* 1.Petri. 3.a.1.

17

^† Doch ghelijck als Godt eenen yeghelijcken wtghedeylt heeft.⁺ Een yeghelijck, ghelijck hem de Heere gheroepen heeft, also wandele hy. Ende alsoo ordineer ickt in alle ghemeynten.

† Ephe. 4.a.1.

+ C vers 17

18

Is yemant besneden gheroepen, die en neme gheen voorhuyt aen? Is yemant gheroepen in der voorhuyt, die en late hem niet besnijden.

19

De besnijdinghe en is niet, ende de voorhuyt en is niet,^‡ maer de gheboden Gods houden.

‡ Ephe. 4.a.1. Phili. 1.d.27.

20

Een yeghelijck blijue in de roepinghe, daer hy in gheroepen is.

21

^* Sijt ghy een knecht gheroepen, en becommert v niet: Doch condt ghy vrij worden, soo ghebruyct dat veel lieuer.

* 1.Tim. 6.a.1.

22

Want wie een knecht geroepen is in den Heere, die is een vrije des Heeren. Des seluen ghelijcken, wie een vrije gheroepen is, die is een knecht Christi.

23

^† Ghy zijt dier ghecocht, en wordet niet der menschen knechten.

† 1.Cor. 6.c.20. 1.Petri. 1.c.18

24

Een yeghelijck lieue broederen, waer hy in gheroepen is, daer blijue hy in by Gode.

25

Van den maechden en heb ick gheen ghebodt des Heeren, maer ick segghe mijn meyninghe, als ick bermherticheyt vercreghen heb vanden Heere, ghetrou te zijn.

26

Soo meyne ick nv sulcks sy goet, om des teghenwoordighen noots wille, dattet den mensche goet sy alsoo te zijn.

27

Sijt ghy aen een wijf gebonden? Soo en soect niet los te worden: Maer zijt ghy los vanden wijue, soo en soeckt gheen wijf.

28

Maer ist dat ghy trout, ghi en sondicht niet. Ende ist dat een maecht trouwet, si en sondicht niet, Nochtans so sullen sulcke lichamelijcke droeffenisse hebben. Maer ick verschoone uwer gherne.

29

⁺ Maer dat segghe ick, lieue broeders,^‡ de tijt is cort. Voort is dat de meyninghe: Die daer wijuen hebben, dat sy zijn als en hadden sy geene:

+ D vers 29

‡ Psal. 90.a.4. 2.Pet. 3.b.10.

30

Ende die daer weenen, als en weenden sy niet: Ende die haer verblijden, als en verblijden sy haer niet: Ende die daer coopen, als en besaten zijt niet:

31

Ende die deser werelt ghebruycken, dat sy haerder niet en misbruycken.^* Want dat wesen in deser werelt vergaet.

* Esaie. 40.a.6 1.Ioan. 2.c.17

32

Maer ick woude^† dat ghy sonder sorghe waert. Wie^‡ onghetrout is, die sorcht wat den Heere toe behoort, hoe hy den Heere behaghe.

† Mat. 6.c.25 Luce. 12.c.22.

‡ 1.Tim. 5.a.5

33

Maer wie trout, die sorcht wat der werelt toebehoort hoe hy den wijue behage.

34

Daer is een onderscheyt tusschen een wijf ende een Maecht. Die niet en trout, die sorcht wat den Heere toe behoort, dat sy heylich sy, beyde aent Lijf ende aen den gheest.

35

Maer die trout, die sorcht wat der wereldt toebehoort, hoe sy den man behaghe. Maer sulcx segghe ick v tot profijt, niet dat ick v eenen strick aen den hals werpe, maer daer toe, dattet v wel verciert, ende ghy ghestadelijck den Heere onuerhindert dienen moghet.

36

Maer ist dat yemandt hem laet duncken, het en wille hem niet schicken met zijnre maecht, dewijle dat sy euenwel manbaer is, ende het en wil niet anders zijn, soo doe hy wat hy wil, hy en sondicht niet, hy latese houwen.

37

Maer wanneer yemant vast voor hem neemt, dewijle dat hy onghedwonghen is, ende zijnen vrijen wille heeft, ende besluyt sulcx in zijn herte, zijn Maecht also te laten blijuen, die doet wel.

38

Eyndelijck, wie trout, die doet wel: Maer wie niet en trout, die doet beter.

39

^† Een wijf is ghebonden aen de Wet, so langhe als de Man leeft: Maer ist dat haer Man ontslaept, soo is sy vrij te trouwen, wien sy wil, alleen dattet in den Heere gheschie.

† Roma. 7.a.2.

40

Maer saligher is sy, ist dat sy alsoo blijft, nae mijnder meyninghe. Ende ick houde, ick hebbe oock den gheest Gods.