Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hier straft de Apostel den Corinthen vanden Rechters, voor die welcke sy keuen ende dingden, van de saken die sy onder malcanderen hadden. Ende int eynde leert hy wederom, ende straft de sonde der oncuysheyt.

1

⁺ HOe derf yemandt onder v, als hy eenen handel heeft met eenen anderen,^† twisten voor den onrechtueerdighen, ende niet voor den Heylighen?

+ A vers 1

† Te recht gaen.

2

^* En weet ghy niet, dat de Heylighen de Werelt ordeelen sullen? Ist dat dan nv de Werelt van v gheordeelt sal worden, en zijt ghy dan daer niet goet ghenoech toe, cleynder saken te ordeelen?

* Sapi. 3.a.8. Mat. 12.d.41 19.d.28. Apoc. 3.d.21.

3

En weet ghy niet, dat wy ouer de Enghelen ordeelen sullen? Hoe veel meer ouer de tijtlijcke goeden?

4

^‡ Maer ghy, wanneer ghy van tijtelijcke goeden saken hebt, soo neempt ghy die, die byder Ghemeynte veracht zijn, ende setse tot Richters.

‡ Deut. 25.a.2.

5

V ter schanden moet ick dat segghen. En isser dan soo heel gheen wijs onder v? Ofte doch niet een, die daer conde ordeelen tusschen den broeder ende broeder?

6

Maer deen broeder twist met den anderen, daer toe voor den ongheloouighen.

7

⁺ Daer is alreede een ghebreck onder v, dat ghy met malcanderen rechtet.^* Waer om en laet ghy v niet veel lieuer onrecht doen? Waer om en laet ghy v niet lieuer bedrieghen?

+ B vers 7

* Prou. 25.b.8. Matt. 5.e.39. Rom. 12.d.17 1.Tess. 5.c.15.

8

Maer ghy doet onrecht ende bedriecht, ende sulcx aen den Broederen.

9

En weet ghy niet, dat de onrechtueerdighe dat Rijcke Gods niet beeruen en sullen?

10

En laet v niet verleyden:^† Noch de Hoereniagers, noch de Afgodschen, noch de Echtbreeckers, noch de Weecklingen, noch de Iongenscheynders, noch de Dieuen, noch de Gierighen, noch de Dronckenen, noch de Lasteraers, noch de Roouers, en sullen dat Rijcke Godts beeruen.

† Galat. 5.c.19. Ephe. 5.a.5.

11

^‡ Ende sulcke zijn uwer sommighe gheweest, maer ghy zijt af ghewasschen, ghy zijt gheheylicht, ghy zijt rechtueerdich gheworden, door den Name des Heeren Iesu, ende door den gheest onses Gods.

‡ Ephe. 2.a.1. Colloss. 3.a.7. Titum. 3.a.3.

12

⁺ Ick hebbe alles dincks macht,^* maer het en vordert altemael niet. Ick hebbe alles dincks macht, maer my en sal niet gheuanghen nemen.

+ C vers 12

* Eccli. 38.a.2. 1.Cor. 10.c.23.

13

De spijse den buyck, ende de buyck der spijsen, maer Godt sal desen ende ghene te niet maken. Ende dat lichaem niet der hoererije, maer den Heere, ende Heere den lichaem.

14

^† Maer Godt heeft den Heere op ghewect, ende sal ons oock op wecken door zijn cracht.

† Roma. 8.b.11. 2.Cor. 4 c.14

15

En^‡ weet ghy niet, dat uwe lichamen, leden Christi zijn? Soude ick nv de leden Christi nemen, ende hoeren leden daer af maken? Dat sy verre.

‡ Ephes. 5.c.30.

16

Oft en weet ghy niet, dat wie aen der hoeren hanghet, die is een lijf met haer?^* Want sy sullen (spreeckt hy) twee in een vleesch zijn.

* Gen. 2.d.24. Matt. 19.a.5. Ephes. 5.c.31.

17

Maer wie den Heere aenhangt, die is een gheest met hem.

18

Vliet de hoererije. Alle sonden, die de mensch doet, die zijn buyten zijn lichaem. Maer wie hoererije bedrijft, die sondicht aen zijn eyghen lichaem.

19

^† Oft en weet ghy niet, dat uwe lichaem een Tempel des heylighen gheest is, die in v is, dien ghy hebt van Gode, ende en zijt niet uwes selfs?

† 1.Cor. 3.b.16. 2.Cor. 6.c.16. Hebr. 3.b.6.

20

Want ghy^‡ zijt dier ghecocht. Daerom soo prijset Godt aen uwen lichaem, ende in uwen gheest, die daer Godts zijn.

‡ 1.Cor. 7.c.23. 1.Petr. 1.c.18. Hebr. 12.d.24