Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Apostel straft de sonde des Ouerspeels, ende hy ghebiet haer hoe sy met soodanighe handelen sullen. Ende de wortel der sonden berispt hy met de versuymenisse der straffinghe. Ende het quade van haer wech te doen, ghebiet hy.

1

⁺ DAer gaet een ghemeyn gherucht, datter hoererije onder v sy, ende een sulcke hoererije, daer oock de Heydenen niet af en weten te spreecken,^* Dat yemant zijns vaders wijf hebbe.

+ A vers 1

* Leuit. 18.a.8. 20.b.11. Deut. 22.d.30. 27.c.20.

2

Ende ghy zijt op gheblasen, ende en hebt niet veel lieuer rouwe ghedraghen, op dat, die dat werck gedaen heeft, van v wech ghedaen werde.

3

Ick, tis waer^† als die met den lichaem daer niet en ben, nochtans met den geest tegenwoordich, hebbe alreede als tegenwoordich besloten, ouer dien, die sulcx also gedaen heeft, in den Naem onses Heeren Iesu Christi, in uwe vergaderinghe met mijnen geest, ende met der Cracht onses Heeren Iesu Christi,^‡ hem ouer te geuen den Satan, tot verderuinge des vleeschs,

† Collos. 2.a.4.

‡ Mat. 18.b.17. 1.Tim. 1.c.20.

4

Op dat de gheest salich worde, aen den dage des Heeren Iesu.

5

Vwe beroeminge en is niet fijn.^* En weet ghy niet, dat een weynich^† suerdeechs, het gantsche deech versuert?

* Gala. 5.a.9.

† Exo. 13.a.3.

6

Daer om veecht het oude suerdeech wt, op dat ghy een nieuwe deech zijt, gelijc als ghy ongesuert zijt.⁺ Want wy hebben ooc een^‡ Paschlam, dat is Christus voor ons geoffert.

+ B vers 6

‡ Esaie. 53.b.7.

7

^* Daer om laet ons Paschen houden,^† niet int oude suerdeech oock niet int suerdeech der boosheyt ende schalckheyt, maer int suetedeech der louterheyt ende der waerheyt.

* Exo. 12.a.3.

† Deu. 16.a.3.

8

Ick heb v gescreuen in den Brief^‡ dat ghy niet te doen en sult hebben, met den Hoereniaghers,

‡ Ecclesi. 13.a.1.

9

Dat en meyn ic heel niet, van den Hoereniagers in deser Werelt, oft van den gierighen, oft van den Roouers, oft van den Afgodschen: Anders moest ghy de Werelt ruymen.

10

^* Maer nv hebbe ic v gescreuen: Ghy en sult niet met haer te doen hebben, Namelijck, ist datter yemant is, die hem een broeder laet heeten, ende is een hoeren ia-

* 2.Thess. 3.a.6

[p. 70r]

gher, oft gierich, oft Afgodisch, oft een lasteraer, of een dronckaert, oft een Roouer^* met den seluen en sult ghy ooc niet eten.

* Iere. 16.a.8. Danie. 1.b.8.

11

Want wat gaen my die aen, die daer buyten zijn, dat ickse soude ordeelen? En ordeelt ghy niet, die hier binnen zijn?

12

Maer Godt sal die daer buyten zijn, ordeelen. Doet^† van v wech, wie boos is.

† Deut. 13.a.6.