Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Apostel straft de vermetenheyt vanden Corinthen int oordeelen, van de versmaetheyt sommigher dienaers daer na arbeyt hy, om haer cortelijck in beteringhe te crijghen.

1

⁺ DAer houde ons een yegelijck voor, te weten,^* voor Christus dienaeren, ende Huyshouders ouer Godts^† verborghenheyt.

+ A vers 1

* 2.Cor. 6.a.4.

† Deu. 29.d.29.

2

Nv en soecktmen niet meer aen de Huyshouders, dan dat sy^‡ ghetrou gheuonden worden.

‡ Iere. 23.c.28. Luce. 12.e.42.

3

Maer het is my een cleyn dinck, dat ick van v gheoordeelt worde, ofte van eenen menschelijcken daghe. Oock en ordeel ick my seluen niet.

4

Ic en weet wel niet op my seluen^* maer daer en ben ick niet in gherechtueerdicht:

* Iob. 9.a.2.

5

Maer de Heere ist die my ordeelt. Daer om en ordeelt niet voor der tijt, tot dat de Heere come, die oock sal aent licht brenghen, wat int duyster verborghen is, ende den Raet der herten openbaeren, als dan sal eenen yegelijcken van Gode Lof gheschien.

6

⁺ Maer sulcx, lieue Broeders, heb ick op my ende Apollo bediet, om uwen wille: Op dat ghi aen ons leert, dat niemant meer van hemseluen en houde, dan als nv ghescreuen is, op dat hem de een niet teghen den anderen, om yemants wille, op en blase.

+ B vers 6

7

Want wie heeft v voorgetogen? Ende^† wat hebt ghy, dat ghi niet ontfangen en hebt? Ende ist dat ghijt ontfanghen hebt, wat beroemt ghy v dan, als die het niet ontfanghen en hadde?

† Iaco. 1.b.17.

8

Ghy zijt alreede sat geworden, Ghy zijt alreede Rijck gheworden, ghy heerschet sonder ons: Ende och oft ghy heerschedet, op dat wy oock met v heerschen mochten.

9

Want ick houde, Godt hebbe ons Apostelen, voor de alderminste voorghestelt,^* als den doode ouer ghegheuen. Want wy zijn een gaepspel gheworden der Werelt, ende den Enghelen, ende den menschen.

* Psal. 44.c.23 123.a.4. Rom. 8.e.36. 2.Cor. 4.b.11.

10

Wy zijn dwasen om Christus wille, maer ghy zijt cloec in Christo. Wy swack, maer ghy sterck. Ghy heerlijck, maer wy veracht.

11

Tot op dese vre lijden wy honger, ende dorst, ende zijn naeckt, ende worden gheslaghen, ende en hebben gheen seker stede,

12

^† Ende arbeyden ende wercken met onsen eyghen handen. Men scheldt ons, soo seghenen wy: Men veruolcht ons, soo verdraghen wijt:

† Actor. 18.a.3. 20.e.34. 1.Tess. 2.b.9. 2.Tess. 3.b.8.

13

Men lastert ons, soo smeecken wy: Wy zijn ghestadelijck als een vloeck der Wereldt, ende een vegheoffer alder lieden.

14

⁺ Sulcx en schrijue ick niet, dat ic v beschame, maer ick vermaen v als mijn lieue Kinderen.

+ C vers 14

15

Want oft ghy alschoon thien duysent Onderwijsmeesters hadt in Christo, so en hebt ghy doch niet veel vaderen.^* Want ick heb v ghebaert in Christo Iesu door dat Euangelium.

* Gala. 4.b.19 Philem. b.10. Iacob. 1.b.18.

16

Daer om vermaen ic v,^† zijt mijn Nauolghers.

† 1.cor. 10.d.34 Phil. 3.c.17.

17

Wt deser oorsaec, heb ick Timotheum tot v gesonden, welcke is mijn lieue ende ghetrouwe sone in den Heere, dat hy v vermane mijnder weghen, die daer in Christo zijn: Ghelijc als ic aen allen eynden, in alle Ghemeynten leere.

18

Daer blasen sommige haer seluen op, recht oft ick niet tot v en soude comen.

19

^‡ Maer ic wil seer cortelijck tot v comen,^* ist dat de Heere wil, ende vernemen niet de woorden der opgeblasenen, maer de Cracht.

‡ Iere. 10.d.23. Pro. 20.d.24

* Acto. 18.d.21 Heb. 6.a.4. Iaco. 4.c.15.

20

^† Want dat Rijcke Gods en staet niet in woorden, maer in cracht.

† 1.Cor. 2.a.4 1.Tessa. 1.a.5.

21

Wat wilt ghy? Sal ic met der roeden tot v comen, ofte met liefde, ende saechtmoedighen gheest?