Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Apostel verworpt de dwalinge der Corinthen, om dat sy sommighe dienaers der ghemeynte te veel toeschrijuen, Ende hy spreect van de timmeringhe op hout, hoy, stoppelen, en hoe de wijsheyt der werelt sotheyt is voor God.

1

⁺ ENde ick lieue Broeders, en conde niet met v spreken, als met gheestelijcken, maer als met vleeschelijcken, als met Ionghe kinderen in Christo.

+ A vers 1

2

^* Melck heb ick v te drincken gegheuen, ende gheen spijse, want ghy en condes noch niet, oock en connet ghy nv noch niet, dewijle dat ghy noch vleeschlijck zijt.

* Esa. 28.b.9. 1.Pet. 2.a.2. Heb. 5.c.15.

3

^† Want nademael, ijuer, ende twist, ende tweedracht, onder v zijn, en zijt ghy dan niet vleeschlijck, ende wandelt na menschelijcker wijse?

† 1.Cor. 1.b.10. Gala. 5.c.15. Iaco. 3.c.16.

4

Want als de eene seyt: Ick ben Paulisch, ende de ander: Ick ben^‡ Apollisch, en zijt ghy dan niet vleeschelijck?

‡ Acto. 18.c.24. 1.Cor. 1.b.11. 16.c.12.

5

Wie is nv Paulus? Wie is Apollo? Dienaers zijn sy, door welcke ghy zijt geloouich gheworden: Ende dat selue, als de Heere eenen yeghelijcken ghegheuen heeft.

6

Ick hebbe geplant, Apollo heeft begoten.^* Maer Godt heeft het gedijen ghegheuen.

* Ioan. 6.g.65.

7

Soo en is nv, noch die daer plantet, noch die daer beghiet, yet, maer Godt die het ghedijen gheeft.

8

Maer die daer plantet, ende die daer beghiet, dier is de een gelijck als de ander:^* Maer een yegelijck sal zijn loon ontfanghen, na zijnen arbeyt.

* Psal. 62.b.13. Iere. 17.b.10. 32.c.19. Mat. 16.d.27 Rom. 2.a.6.

9

Want wy zijn^† Gods hulpers^‡ ghy zijt Gods ackerwerc, ende Gods timmeragie.

† 2.Cor. 6.a.1.

‡ Ephe. 2.c.19

10

⁺ Ic van Gods genade die my ghegheuen is, hebbe den gront gheleyt, als een wijs Timmermeester, een ander timmert daer op. Maer een yeghelijck sie toe, hoe hy daer op timmere.

+ B vers 10

11

^* Eenen anderen gront, tis waer, en can niemant legghen, dan alleen die, die gheleyt is, welcke is Iesus Christus.

* Esa. 28.d.16. Mat. 16.c.18.

12

Ist dat nv yemant op desen gront timmert, gout, siluer, edele ghesteente, hout, hoy, stoppelen, soo sal eens yeghelijcx werc openbaer worden.

13

^* De dach salt claer maken. Want hy sal met vyer gheopenbaert worden: Ende hoedanich eens yeghelijcken werck sy sal dat^† vyer beproeuen.

* Esa. 28.c.17.

† Sap. 3.a.5. Ecclisi. 2.a.5. 4.Esdre. 16.g.74. 1.Pet. 1.b.7. 4.b.12.

14

Ist dat yemandts werck sal blijuen, dat hy daer op ghetimmert heeft, soo sal hy loon ontfanghen:

15

Maer ist dat yemants werck verbrande, soo sal hy schade lijden, maer hy selue sal salich worden doch alsoo, als door dat vyer.

16

En^‡ weet ghy niet, dat ghy Gods Tempel zijt, ende dat de gheest Gods in v woont?

‡ Ioan. 2.c.21. 1.Cor. 6.c.19. 2.Cor. 6.c.16. Hebre. 3.a.6.

17

Ist dat yemant den Tempel Gods verderuet, dien sal Godt verderuen. Want de Tempel Gods is heylich, dat zijt ghy.

18

^+* Niemant en bedrieghe hem seluen. Soo wie hem onder v laet duncken wijs te zijn, die worde een dwaes in dese Werelt, dat hy moghe wijs zijn.

+ C vers 18

* Prou. 3.a.7.

19

^† Want deser Werelt wijsheyt, is dwaesheyt by Gode. Want daer staet gheschreuen: De wijsen begrijpt hy in

† Iob. 5.b.13. Ierem. 51.c.17 Roma. 1.c.22.

[p. 69v]

haer cloecheyt.

20

Ende weder om:^* De Heere weet der Wijsen gedachten, dat si ijdel zijn.

* Psal. 94.b.11

21

Daer om en beroeme hem niemant eens menschen. Het is al uwe,

22

Het sy Paulus, oft Apollo, het sy Kephas of de Werelt, het sy dat leuen of de doot, het si dat tegenwoordich of dat toecomende,

23

Het is al uwe, maer ghi zijt Christi, ende Christus is Godts.