Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel betoont, dat hy onder die van Corinthen niet ghebruyct en heeft de subtijlheyt ende hoocheyt der wereltlijcker leere, maer vander wijsheyt die den volmaecten toebehoort, ende hoe dese wijsheyt voor een natuerlijck mensche een sotheyt is.

1

⁺ ENde ick lieue Broeders, doen ic tot v quam, en quam ick niet met hoogen woorden, oft hooger wijsheyt, v te vercondighen de goddelijcke prekinghe.

+ A vers 1

2

Want ick en hielt my daer niet voor, dat ick wat wiste onder v, dan alleen Iesum Christum den ghecruysten.

3

^* Ende ick was by v met swackheyt ende met vreese, ende met grooten beuen:

* Acto. 18.a.1.

4

^† Ende mijn woordt, ende mijn preeckinghe en was niet in vernuftighe Reden menschelijcker wijsheyt, maer in bewijsinge des gheestes, ende der cracht:

† 1.Cor. 4.c.20.

5

Op dat uwe ghelooue bestae, niet op menschen wijsheyt, maer op Gods cracht.

6

^* Maer daer wy af spreken, dat is nochtans een wijsheyt, byden volcomenen, ende gheene wijsheyt deser werelt, ooc niet der Ouersten deser werelt,^† die daer vergaen:

* Iob. 28.c.28. Eccli. 19.c.22. Iaco. 3.c.15.

† 1.cor. 15.c.24

7

Maer wy spreken vander heymelijcker verborghener wijsheyt Gods, welcke Godt gheordineert heeft voor der werelt, tot onser heerlijckheyt,

8

^‡ Welcke geen vanden Ouersten deser werelt bekent en heeft. Want waert dat sy die bekent hadden, so en hadden sy den Heere der heerlijckheit niet ghecruyst:

‡ Matt. 11.c.25. Ioan. 15.c.21. 16.a.3. Actor. 13.c.27.

9

Maer alsser gescreuen staet:^* Dat geen ooge gesien en heeft, ende gheen oor ghehoort en heeft, ende in gheens menschen herte ghecomen en is, dat Godt bereyt heeft den ghenen die hem liefhebben.

* esa. 64.c.17.

10

^+* Maer ons heeft het Godt geopenbaert, door zijnen geest.^† Want de geest ondersoect alle dinck, oock de diepte der Godtheyt.

+ B vers 10

* Mat. 13.b.11.

† Sap. 7.d.21 Eccli. 37.a.2.

11

Want welcke mensche weet, wat inden mensche is, dan alleen de geest des menschen, die in hem sy? Alsoo en weet oock niemant, wat in Gode is, dan alleen de gheest Gods.

12

Maer wy en hebben niet ontfangen den geest der werelt, maer den gheest wt Gode, dat wy weten connen, wat ons van Gode ghegeuen is:

13

Welc wy oock spreken, niet met woorden, die menschelijcke wijsheyt leeren can, maer met woorden, die de heylighe gheest leert, ende ordeelen gheestelijcke saken gheestelijck.

14

^* Maer de natuerlijcke mensche en verneemt niet vanden geest Gods, Het is hem een dwaesheyt, ende en cans niet bekennen, want het moet geestelijck geordeelt zijn.

* Rom. 8.a.5.

15

^† Maer de geestelijcke ordeelt alle dinc, ende hy en wort van niemant geordeelt.

† Pro. 28.a.5.

16

^‡ Want wie heeft des Heeren sin bekent? Oft wie wil hem onderwijsen? Maer wy hebben Christus sin.

‡ Esa. 40.b.13. Sap. 9.b.13. Rom. 11.d.34