Den Bibel, Inhoudende dat Oude ende Nieuwe Testament (Biestkensbijbel)

¶ De eerste Epistel S. Pauli aen den Corintheren.

¶ Dat .I. Capittel.

¶ De Apostel prijst die van Corinthen, ende vermaentse tot eendrachticheyt, die ghene die haer beroemen bekeert ende ghedoopt te zijne, van diuersche Apostelen, ende dat Godt die vercoren heeft, die sot voor de werelt zijn, op dat hy de Wijse beschamen soude.

1

⁺ PAulus geroepen tot een Apostel Ihesu Christi, door den wille Godts, ende Broeder^* Sosthenes.

+ A vers 1

* Acto. 18.b.17.

2

Der ghemeynte Godts tot Corinthen,^† den geheylichden in Christo Iesu,^‡ den gheroepen Heyligen, met allen den ghenen, die daer aenroepen den Naem onses Heeren Iesu Christi, in allen haren ende onsen plaetsen.

† Ioan. 17.c.19. 1.Tess. 4.b.7. Hebre. 9.c.14

‡ Rom. 1.a.7. Ephesi. 1.a.1.

3

^* Ghenade sy met v, ende vrede, van Godt onsen Vader, ende den Heere Iesu Christo.

* Roma. 1.a.7. 2.Cor. 1.a.2. Ephesi. 1.a.2. 1.Petri. 1.a.2.

4

Ick dancke mijnen Gode altijt van uwen tweghen, voor de ghenade Gods, die v ghegheuen is in Christo Iesu:

5

^† Dat ghy zijt door hem in allen stucken rijck ghemaect, in alderley leere, ende in alderley kennisse: Als dan de predicatie van Christo in v crachtich gheworden is,

† Collos. 1.b.9.

6

Alsoo, dat ghy gheen ghebreck en hebt aen eenigher gauen,^‡ ende verwachtet alleen op de openbaringe onses Heeren Iesu Christi,

‡ Philip. 3.c.20 Titum. 2.b.13

7

Die v oock beuestighen sal ten eynde toe, dat ghy onstraflijck zijt op den dach onses Heeren Iesu Christi.

8

^* Wandt Godt is trou, door welcken ghy geroepen zijt, ter gemeynscap zijns Soons Iesu Christi onses Heeren.

* Num. 23.c.19. 1.Cor. 10.b.12. 1.Tess. 5.c.25.

9

⁺ Maer ick vermaen v, lieue Broeders, door den Naem onses Heeren Iesu Christi,^* dat ghy altemael eenderley Redene voert, ende en laet gheen tweedracht onder v zijn, maer houdet vast aen malcanderen in eenen sin, ende in eenderley meyninghe.

+ B vers 9

* Rom. 12.c.16. 15.a.5. Philip. 2.a.2. 3.c.16.

10

Wandt my is voor ghecomen, lieue Broeders, door die van Chloes ghesin, van v, datter twist onder v sy.

11

Maer daer seg ick af, dat de een onder v seyt: Ick ben Paulisch. De ander: Ick ben^† Apollisch. De derde: Ick ben Kephisch. De vierde: Ick ben Christisch.

† Acto. 18.c.24. 1.Cor. 3.a.4. 16.b.12.

12

Hoe? Is dan Christus nv ghedeylt? Is dan Paulus voor v ghecruyst? Oft zijt ghy in Paulus Naem ghedoopt?

13

Ick dancke Gode, dat ick niemandt onder v ghedoopt en heb, dan alleen^* Crispum ende^† Gaium, datter niemandt segghen en dorue, Ick hadde op mijnen naem ghedoopt.

* Actor. 18.a.8.

† Ro. 16.c.22.

14

^* Ick hebbe oock ghedoopt des Stephana huysghesin: Daer nae en weet ick niet oft ick sommighe andere ghedoopt hebbe.

* 1.Cor. 16.c.15.

15

Wandt Christus en heeft my niet gesonden te doopen, mer dat Euangelium te predicken:^† Niet met cloecke woorden, op dat dat cruys Christi niet te niet en worde.

† 1.Cor. 2.a.1.

16

⁺ Wandt dat woordt vanden cruyce is een dwaesheydt, den genen, die verloren worden:^‡ Maer ons, wy die salich worden, ist een cracht Godts.

+ C vers 16

‡ Roma. 1.b.16

17

Wandt daer staet gheschreuen:^* Ick wil verdoen de Wijsheyt der Wijsen, ende dat verstant der verstandighen wil ick verwerpen.

* Iob. 5.b.12. Esai. 29.c.14.

18

^† Waer zijn de cloecken? Waer zijn de Schriftgheleerden? Waer zijn de werelt wijsen? En heeft Godt de wijsheydt deser werelt niet tot dwaesheyt ghemaect?

† Esaie. 33.c.18.

19

^* Wandt dewijle dat de werelt, door haer wijsheydt, Godt in zijnder wijsheyt niet en bekende, so behaechdet Gode wel, door dwase predicatie salich te maken, die, die daer aen gheloouen.

* Mat. 11.d.25. Luce. 10.c.21.

20

Nademael de Ioden^† Teeckenen eysschen, ende de Griecken nae wijsheydt vraghen.

† Mat. 12.d.38. Luce. 11.c.29. Ioan. 2.c.18. 6.d.30.

21

Maer wy prediken den gecruysten Christum, den^‡ Ioden een erghernis, ende den Griecken een dwaesheydt.

‡ Ioan. 6.f.60

22

Maer den ghenen die gheroepen zijn, beyde Ioden ende Griecken, prediken wy Christum, een godlijcke cracht ende godlijcke^* wijsheyt.

* Collos. 2.a.3.

23

⁺ Want de godlijcke dwaesheyt is wijser dan de menschen zijn: Ende de godlijcke swackheydt is stercker dan de menschen zijn.

+ D vers 23

24

Siet aen, lieue Broeders, uwe roepinghe. Niet^† veel Wijsen nae den vleesche, niet veel Geweldigen, niet veel Edelen en zijn geroepen:

† Ioan. 7.e.48 12.f.42.

25

Mer wat dwaes is voor der werelt, dat heeft Godt vercoren, dat hy de Wijsen te schanden make.

26

Ende wat swack is voor der werelt, dat heeft Godt vercoren, op dat hy te schanden make wat sterck is.

27

Ende dat onedele voor der werelt, ende dat verachte, heeft Godt vercoren:^* Ende dat daer niet en is, op dat hy te niet maecte, wat yet is,

* Osee. 2.c.25.

28

Op dat hem voor hem geen vleesch en beroeme.

29

Van welcken

[p. 69r]

ghy oock af coemt in Christo Iesu, die ons gemaect is van Gode ter^* wijsheyt ende ter^† gerechticheyt, ende ter^‡ heyliginghe, ende ter verlossinghe.

* Ephe. 1.c.17.

† Iere. 23.b.6.

‡ Ioan. 17.c.19.

30

Op dat (alsser ghescreuen staet)^* Wie hem beroemt, die beroeme hem des Heeren.

* Esa. 65.c.15. Ierem. 9.d.23. 2.Cor. 11.a.1.