Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ De Apostel gheeft den Romeynen sommighe exempelen van goede menschen, om na te volgen, Ende hy vermaentse dat si mercken souden op de ghene die tweedracht ende ergernisse maken, beneuen de leere die hy geleert heeft, dat si daer af scheyden souden.

1

⁺ ICk beueel v onse Suster Phebe, die daer is inden dienst der ghemeynte te Kenchrea,

+ A vers 1

2

Dat ghy haer ontfangt inden Heere, ghelijck alst den Heylighen betaemt, ende doet haer bystant in allen saken, daer si uwer in behoeft. Wandt si heefter oock velen bystant ghedaen, oock my seluen.

3

Groet Priscam ende den^* Aquilam mijn hulpers in Christo Iesu, die daer hebben haer halsen voor mijn leuen gheset. Den welcken ick niet alleen en dancke, maer oock alle gemeynten onder den Heydenen. Oock groet de ghemeynte in haren huyse.

* Acto. 18.a.2. 2.Tim. 4.c.19

4

Groet Epenetum mijnen liefsten, die de eerstelinck is onder die wt Achaia in Christo.

5

Groet Mariam, die veel moeyten ende arbeyts met ons ghehadt heeft.

6

Groetet Andronicum ende Iuniam mijn aengheboren vrienden, ende mijn mede gheuangen, die daer zijn vermaerde Apostelen, ende voor my gheweest in Christo.

7

Groet Ampliam mijnen lieuen inden Heere.

8

Groet Vrban onsen hulper in Christo, ende Stachin mijnen lieuen.

9

Groet Apellen den besochten in Christo. Groet die daer zijn van Aristobulus gesinne.

10

⁺ Groet Herodionem mijnen aengheboren vrient. Groet die daer zijn van Narcissus ghesinne inden Heere.

+ B vers 10

11

Groet de Triphena ende de Triphosa, die inden Heere ghearbeyt hebben. Groet de Persida mijn lieue, die inden Heere veel ghearbeydt heeft.

12

Groet Ruffum den wtuercoren inden Heere, ende sine ende mijne Moeder.

13

Groet Asyncritum ende Phlegontem, Herman, Patroban, Hermen, ende de Broeders by haer.

14

Groet Philologum ende de Iulian, Nereum ende zijn Suster, ende Olympam, ende alle Heylighen by haer.

15

^* Groet v onder malcanderen, met den heylighen Cus. V groeten de ghemeynten Christi.

* 1.Cor. 16.c.20 2.Cor. 13.b.12. 1.Tessa. 5.c.26 1.Pet. 5.b.14

16

Ick vermaen v lieue Broeders, dat ghy opsiet, op die,^† die daer Secten ende ergernisse aenrichten, beneuen der leere, die ghy gheleert hebt, ende wijcket vanden seluen.

† matt. 18.a.8. Collos. 2.b.8. 2.Tim. 3.a.5. Titum. 3.b.19

17

Want sulcke en dienen niet den Heere Iesu Christo,^* maer haren buyck: Ende door soete woorden ende heerlijcke Reden, verleyen sy de ontschuldighe herten.

* Phil. 3.c.19.

18

Wandt uwe ghehoorsaemheyt is onder alleman wtgecomen. Daerom verblijde ic my ouer v.^* Maer ick wil dat ghy wijs zijt opt goede, ende eenuuldich opt boose.

* Mat. 10.b.16.

19

^+† Ende de Godt des vredes vertrede den Satan onder uwe voeten cortelijck. De ghenade onses Heeren Iesu Christi sy met v.

+ C vers 19

† Rom. 15.d.33. 1.Cor. 14.e.33

20

V groeten^‡ Timotheus mijn hulper, ende^* Lucius, ende^† Iason, ende^‡ Sosipater mijn aengheboren vrienden.

‡ Acto. 16.a.1. Philip. 2.b.19

* Acto. 13.a.1.

† Act. 17.a.5.

‡ Acto. 20.a.4

21

Ick Tercius groet v, Ick die desen brief gheschreuen hebbe, inden Heere.

22

V groet^* Gaius, mijn ende der gantscher ghemeynten Weerdt. V groet^† Erastus der stadt Rentmeester, ende Quartus de Broeder.

* 1.Cor. 1.b.13.

† 2.Tim. 4.c.20

23

De ghenade onses Heeren Iesu Christi sy met v allen. Amen.

24

^‡ Maer dien die v stercken can, nae tluyden mijns Euangelij, ende der predicatien van Iesu

‡ Ephes. 3.d.30.

[p. 68v]

Christo,^* door welcke de heymelijckheyt gheopenbaert is, die vander Werelt af versweghen gheweest is,

* Ephesi. 1.b.9. 3.b.9. Collos. 1.d.26 2.Tim. 1.b.10. Titum. 1.a.2. 1.Pet. 1.d.20.

25

Maer nv gheopenbaert, oock condich ghemaeckt door der Propheten Schrift, wt beuel des eewighen Godts, de ghehoorsaemheyt des ghelooues op te richten onder alle Heydenen,

26

Den seluen Gode, die alleen wijs is,^† sy eere door Iesum Christum inder eewicheydt. Amen.

† Rom. 11.d.36.

Totten Romeynen, ghesonden van Corintho door Pheben, die inden dienst was der gemeynte tot Kenchrea.