Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ De Apostel vermaent den vroomen dat si verdraghen sullen den crancken, Ende dat zijse int goet vorderen sullen, ende voort helpen, daer nae ontschuldicht hy hem waerom dat hy de Romeynen lichamelijck niet gheuisiteert en heeft.

1

⁺ MAer wy, wy die sterck zijn,^* sullen der swacken ghebreckelijcheyt draghen, ende gheen welbehagen aen ons seluen hebben.

+ A vers 1

* 1.Cor. 9.d.22 Galat. 6.a.3.

2

Maer een yeghelijc onder ons stelle hem alsoo, dat hy zijnen naesten behage ten goede, ter beteringe.

3

Want oock Christus en hadde gheen welbehaghen aen hemseluen, Maer alsser geschreuen staet:^† De versmaetheden der geender die v versmaden, zijn op my gheuallen.

† Psal. 69.b.10

4

^‡ Want wat te voren gheschreuen is, dat is ons ter leere gheschreuen, op dat wy door verduldicheyt ende troost der Schrift, een hope hebben.

‡ Rom. 4.d.23.

5

God der verduldicheyt ende des troosts gheue v,^* dat ghy eenderley ghesinnet zijt onder malcanderen, na Iesu Christo,

* Roma. 12.c.16 1.Cor. 1.b.9. Philip. 2.a.2. 1.Pet. 3.b.8.

6

Op dat ghy eendrachtelijc, met eenen monde louet God den Vader onses Heeren Iesu Christi.

7

Daerom nemet v onder malcanderen aen, gelijc als v Christus heeft aenghenomen tot Gods Lof.

8

Ick segghe dat, Iesus Christus sy een dienaer gheweest der besnijdinghe, om der waerheydt Godts willen, om te beuestighen de beloften den Vaderen gheschiet.

9

Maer dat de Heydenen Godt louen, om der bermherticheyt wille. Als daer gheschreuen staet:^† Daerom wil ick v louen onder den Heydenen, ende dijnen Naem singhen,

† Deut. 32.f.43 2.Re. 22.g.50. Psal. 18.e.50.

10

Ende wederom spreect hy: Verblijt v ghy Heydenen met zijnen volcke.

11

Ende wederom:^‡ Louet den Heere alle Heydenen, ende prijset hem alle volcken.

‡ Psal. 117.a.1.

12

⁺ Ende wederom spreeckt Isaias:^* Daer sal zijn de wortel Iesse, ende die daer opstaen sal, te heerschappen ouer den Heydenen, op dien sullen de Heydenen hopen.

+ B vers 12

* Esaie. 11.b.10. Apoca. 5.b.5. 22.c.16.

13

Maer Godt der hopen, veruulle v met aller blijschap ende vrede int ghelooue, op dat ghy een volcomen hope hebbet, door de cracht des heyligen gheests.

14

Ick wetet seer wel van v lieue Broeders, dat ghy selue vol goedertierenheydt zijt, veruult met alder kennisse, dat ghy v onder malcanderen connet vermanen.

15

Maer ic hebt euenwel ghewaecht, ende v gheschreuen, lieue Broeders, v te vermanen, om der ghenaden wille die my van Gode ghegheuen is,

16

Dat ick sal zijn een Dienaer Christi onder den Heydenen, te offeren dat Euangelium Godts, op dat de Heydenen een offer worden Gode aengenaem, ghe-

[p. 68r]

heylicht door den heylighen geest.

17

Daerom can ic my beroemen in Iesu Christo, dat ick Gode diene.

18

⁺ Want ick en dorste niet yet spreken, waert dat Christus dat selue door my niet en^† wrachte, de Heydenen tot ghehoorsaemheyt te brenghen, door woorden ende wercken,

+ C vers 18

† Actor. 3.b.12. 2.Pet. 1.d.21.

19

Door cracht der Teekenen ende wonderheden, ende door cracht des geests Godts, also, dat ict van Ierusalem aen, al om tot Illyricum, ouer al met den Euangelio Christi veruult hebbe:

20

Ende my sonderlijcken beneersticht dat Euangelium te prediken, waer Christus Naem niet bekent en was, op dat ick niet op eenen vreemden gront en timmerde, maer alsser gheschreuen staet:

21

^* Welcken niet van hem vercondicht en is, die sullent sien, ende diet niet ghehoort en hebben, sullent verstaen.

* Esaie. 53.a.3.

22

^† Dat is oock de oorsake, daerom ick dickwils verhindert ben tot v te comen.

† Roma. 1.b.13. 1.Tess. 2.d.18.

23

Maer nv ick gheen ruymte meer en hebbe in desen Landen,^* maer heb een verlangen tot v te comen van veel iaren af, Wanneer ick reysen sal in Hispanien, so wil ick ooc tot v comen.

* Rom. 1.b.10. 15.d.32. 1.Tessa. 3.b.10

24

Want ick hope, dat ick daer door reysen ende v sien sal, ende van v derwaerts mach gheleyt worden, soo nochtans, dat ick my te voren een weynich met v vermake.

25

⁺ Maer nv reyse ick henen nae Ierusalem, den Heyligen te dienen.

+ D vers 25

26

Want die van Macedonia ende Achaia hebben ghewillichlijck een ghemeyn^† hantreyckinghe te samen gheleyt, den armen heylighen te Ierusalem.

† Acto. 19.c.21. 24.d.17. 1.Cor. 16.a.1.

27

Sy hebbent ghewillichlijck ghedaen, ende zijn oock haer Schuldenaers.^* Wandt ist dat de Heydenen haerder gheestelijcker goeden deelachtich gheworden zijn, soo ist behoorlijck, dat si haer oock in lichamelijcken goeden dienst bewijsen.

* 1.Cor. 9.b.11. Galat. 6.a.8.

28

Wanneer ick nv sulcks volbracht, ende haer dese vrucht beseghelt hebbe, wil ic door v in Hispanien reysen.

29

Ick wetet oock, wanneer ick tot v come,^† dat ic met voller segheninghe des Euangelij Christi comen sal.

† Roma. 1.b.11.

30

Maer ick vermaen v lieue Broeders, door onsen Heere Iesum Christum, ende door de liefde des gheests,^* dat ghy my helpt vechten met bidden voor my tot Gode,

* 2.Cor. 1.b.11. Philip. 1.b.19 2.Tessa. 3.a.2.

31

Op dat ick verlost worde vanden ongheloouighen in Iudea, ende dat mijnen dienst, dien ick nae Ierusalem doe, aenghenaem worde den Heyligen,^† op dat ick met vruechden tot v come, door den wille Godts, ende my met v vermake.

† Roma. 1.b.10 15.e.23.

32

^‡ Godt des vreedts sy met v allen. Amen.

‡ Ro. 16.c.19. 1.Cor. 14.c.33