Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ De Apostel vermaent dat wy de swacke oft crancke niet verworpen noch versmaden en sullen, die welcke noch cranck int ghelooue zijn, ooc dat wijse niet schandalizeren en sullen, maer stichten, treckende alleynsken tot de vroomicheyt.

[p. 67v]

1

⁺ DEn swacken int ghelooue neempt aen, ende en verwerret de conscientien niet.

+ A vers 1

2

De eene ghelooft, hy moghe alderley eten, maer die swack is, die ete moes.

3

^* Die daer eet, die en verachte dien niet, die niet en eet: Ende die niet en eet, die en oordeele dien niet, die daer eet: Want Godt heeft hem aenghenomen:

* Collos. 2.c.16.

4

^† Wie zijt ghy, dat ghy eenen vreemden knecht ordeelt? Hy staet oft valt sinen heere. Ende hy mach wel opgericht worden: Want Godt can hem wel oprichten.

† Iacob. 4.b.12

5

^‡ De een hout meer van den eenen dach, dan vanden anderen: Maer de ander hout alle dagen ghelijck. Een yeghelijck sy in zijnder meyninghe ghewis.

‡ Galat. 4.b.10 Collos. 2.c.16.

6

Die vanden daghe hout, die doetet den Heere: Ende die daer niet af en hout, die doetet oock den Heere. Die daer eet, die eet den Heere,^* wandt hy danct Gode, die niet en eet, die en eet den Heere niet, ende danct Gode.

* 1.Cor. 10.d.30 1.Tim. 4.a.3.

7

^† Want onser gheen en leeft hemseluen, ende niemant en sterft hemseluen.

† 2.Cor. 5.b.15 Galat. 2.c.21. 1.Tess. 5.b.10. 1.Pet. 4.a.2.

8

Leuen wy, soo leuen wy den Heere: Steruen wy, so steruen wy den Heere. Daerom, wy leuen oft steruen, soo zijn wy des Heeren.

9

⁺ Want daer toe is Christus oock ghestoruen, ende verresen, ende weder leuendich gheworden, dat hy ouer de dooden ende leuenden een^‡ Heere sy.

+ B vers 9

‡ Acto. 2.d.36. Philip. 2.a.9.

10

Maer ghy, wat oordeelt ghy uwen Broeder? Oft ghy ander, wat veracht ghy uwen Broeder?^* Wy sullen alle voor den Richterstoel Christi ghestelt worden,

* Matt. 25.c.31. 2.Cor. 5.b.10.

11

Nadien daer^† gescreuen staet: Soo waer als ick leue, spreect de Heere, my sullen alle^‡ knye gheboghen worden, ende alle tonghen sullen Godt bekennen.

† Esa. 45.c.23.

‡ Philip. 2.a.10

12

^* Soo sal nv een yeghelijck voor hem seluen Gode rekenschap gheuen:

* Matt. 25.c.32. 2.Cor. 5.b.5.

13

Daerom en laet ons niet meer malcanderen ordeelen. Maer dat ordeelt veel meer, datter niemandt sinen Broeder eenen^† aenstoot oft erghernisse en gheue.

† 2.mac. 6.d.24 1.Cor. 10.d.32

14

Ick weet het ende bens ghewisse inden Heere Iesu, datter niet^‡ ghemeyn en is aen hemseluen, dan alleen diet voor ghemeyn rekent, den seluen ist ghemeyn.

‡ Mat. 15.b.11 Acto. 10.c.15. 1.Cor. 8.b.8. 1.Tim. 4.a.4 Titum. 1.c.15.

15

Maer ist dat dijn broeder ouer dijn spijse bedroeft wort, soo en wandelt ghy alreede niet na der liefden. Lieue, en verderft dien niet met uwer spijse, om welcx wille Christus ghestoruen is.

16

⁺ Daerom maect, dat uwe Schat niet gelastert en worde.

+ C vers 16

17

Wandt dat Rijcke Godts en is niet eten ende drincken, maer gherechticheyt ende vrede, ende vruechde inden heyligen geest.

18

Wie daer Christo in dient, die is Gode behaechlijck, ende den menschen aenghenaem.

19

Daerom laet ons daer na staen, dat totten vrede dient, ende wat ter beteringe onder malcanderen dient.

20

Lieue, en verstoort niet om der spijse wille, Godts werck. Alle dinck is wel reyn, maer het en is niet goet dien, diet eet met eenen aenstoot zijnder conscientien.

21

^* Het is veel beter dat ghy gheen vleesch en eet, ende gheenen Wijn en drinckt, oft dat, daer hem dijn Broeder aen stoot, oft arghert, oft swack wordt.

* 1.Cor. 8.b.11.

22

Hebt ghy den ghelooue? So hebten by v seluen voor God. Salich is die, die hemseluen gheen conscientie en maect, in tghene dat hy aen neemt:

23

Maer wie daer aen twijfelt, ende eet doch euenwel, die is verdoemt. Want het en gheschiet niet wt den ghelooue.

24

^* Maer wat niet wt den ghelooue en gheschiet, dat is sonde.

* Titum. 1.c.15.