Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ De Apostel leert, dat wy de Ouerheyt onderdanich tot alle goede werc-ken sullen wesen, ende haer gheuen dat haer toe coemt, ende hoe si gestelt is den goeden te bescermen den quaden te straffen, ende sprack vande liefde.

1

⁺ EEn yeghelijck sy onderdanich der^* Ouerheydt, die macht ouer hem heeft,^† Want daer en is geen Ouerheyt, dan alleen van Gode. Ende waer een Ouerheyt is, die is van Godt gheordineert.

+ A vers 1

* Titum. 3.a.1. 1.Pet. 2.b.13.

† Sap. 6.a.4

2

Wie hem nv tegen der Ouerheyt set, die wederstaet Godts ordinancie. Ende die wederstaen, die sullen ouer haer seluen een ordeel ontfanghen.

3

Want de Gheweldighen en zijn niet den goeden wercken, maer den boosen te vreesen. Maer en wilt ghy v niet vreesen voor der Ouerheyt, soo doet wat goets, so suldy lof vande selue hebben,

4

Want si is Gods dienerssche v ten goede. Mer doet ghy wat quaets, so vreest v. Want si en draecht dat sweert niet te vergeefs. Sy is Gods dienerssche, een wrekerssche tot straffinghe ouer dien die quaet doet.

5

So zijt nv wt noot onderdanich, niet alleen om der straffinghe wille, maer ooc om der consciencien wille.

6

Daerom moet ghy oock Schot gheuen. Want sy zijn Godts dienaers, die sulcke bescherminge sullen hanthauen.

7

^+* So gheeft nv eenen yegelijcken wat ghy schuldich zijt, Schot, dien dat Schot toebehoort, Tol, dien de Tol toebehoort, vreese, dien de vreese toebehoort, eere, dien de eere toebehoort:

+ B vers 7

* Mat. 17.d.25. 22.c.21.

8

^† En zijt niemant niet schuldich, dan dat ghi v onder malcanderen lief hebt.^‡ Wandt die den anderen lief heeft, die heeft de Wet veruult.

† Leuit. 19.c.13. Deu. 24.d.14 Tobi. 4.b.15.

‡ Gal. 5.b.14. 1.Tim. 1.a.5.

9

Want dat daer gheseyt is:^* Ghy en sult geen Echt breken: Ghy en sult niet dooden: Ghy en sult niet stelen: Ghy en sult gheen valsche getuychenisse gheuen: V en sal niet lusten. Ende ist datter eenich ander gebot meer is, dat wordt in desen woorde begrepen:^† Ghy sult uwen naesten lief hebben, als v seluen.

* Exo. 20.c.14 Deut. 5.c.18. Mat. 19.c.18.

† Leuit. 19.c.18. Math. 22.d.38 Marc. 12.c.31. Gala. 5.c.14. Iacobi. 2.b.8.

10

De liefde en doet den naesten niet quaets. Soo is nv de liefde des Wets veruullinghe.

11

Ende dewijle dat wy sulcks weten, te weten den tijt,^‡ dat de vre is hier, op te staen vanden slaep (Nademael onse salicheydt nv naerder is, dan doen wijt gheloofden.)

‡ Eph. 5.c.14. 1.Tess. 5.a.6.

12

De nacht is vergaen, ende de dach is by ghecomen.^* So laet ons aflegghen de wercken der duysternisse, ende aentrecken de wapenen des lichts.

* Collos. 3.a.8.

13

Laet ons eerbaerlijck wandelen, als inden daghe,^† niet in brassen ende suypen,^‡ niet in Cameren ende oneerbaerheyt,^* niet in kijuinghe ende benijdinghe.

† Luce. 21.d.31. 1.Tess. 5.a.6.

‡ 1.Cor. 6.b.10 Ephesi. 5.a.5.

* Iaco. 3.c.14.

14

Maer treckt aen den Heere Iesum Christum. Ende neempt des Lijfs waer, Doch alsoo, dat het niet dertel en worde.