Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ De Apostel onderwijst de Romeynen inden eersten, inde dinghen die Godt aenghaen. Daer nae onderwijst hy hen in de dinghen, welcke haren naesten aengaen ende haer seluen.

[p. 67r]

1

⁺ ICk vermaen v lieue Broeders, door de barmherticheyt Godts, dat ghy uwe lichamen begheeft tot een^* offer, dat daer leuendich, heylich, ende Gode wel behaechlijck sy, welck sy uwe verstandighe Gods dienst:

+ A vers 1

* Phili. 4.c.18. 1.Petri. 2.a.5

2

Ende en^† stellet v niet ghelijck deser weerelt, maer verandert v door vernieuwinghe uwes sins, op dat ghy proeuen moecht, welck daer sy de goede, de wel behaechlijcke, ende de volcomen^‡ wille Godts.

† 1.Ioan. 2.c.15. Iacob. 4.a.4

‡ Ephe. 5.b.17. 1.Tess. 4.a.3.

3

Want ick segghe door de ghenade, die my ghegheuen is, eenen yeghelijcken onder v:^* Dat niemandt meer van hemseluen en houde, dan hem toe behoort te houden. Maer dat hy matelijck van hem houde, eenen yeghelijcken,^† nae dat hem Godt wtghedeylt heeft, de maet des gheloofs.

* Eccle. 3.c.20. 1.Cor. 8.a.2.

† 1.Cor. 12.b.12. Ephe. 4.b.7.

4

Want gelijckerwijs als wy in eenen lichaem veel leden hebben, maer alle leden, niet eenerley werck en hebben:

5

^‡ Alsoo zijn wy vele, een lichaem in Christo. Maer onder malcanderen is die een des anderen Lidt.

‡ 1.Cor. 12.d.27 Ephe. 1.d.23.

6

Ende hebben menigherley gauen, nader ghenade die ons ghegheuen is.

7

Heeft yemandt^* Prophecie, soo sy die den ghelooue ghelijck.⁺ Heeft yemant een^† Ampt, soo neme hy des Ampts waer.

* 1.Cor. 14.a.1.

+ B vers 7

† 1.pet. 4.b.11

8

Leert yemandt, so neme hy waer de leere. Vermaent yemant, so neme hy des vermanens waer.^‡ Gheeft yemant, soo gheue hy eenuuldelijck. Regeert yemant, soo sy hy sorchuuldich.^* Oeffent yemandt barmherticheyt, soo doe hijt met lust.

‡ Matt. 6.a.3. Acto. 2.e.47.

* Deu. 15.b.8.

9

De liefde en sy niet valsch.^† Haet dat boose. Hangt den goede aen.

† Psal. 97.b.10 Amos. 5.b.15

10

De^‡ Broederlijcke liefde onder malcanderen, sy hertgrondelijck. De een voorcome den anderen met Eerbiedinghe.

‡ Hebr. 13.a.1.

11

En weest niet traech in tghene, dat ghy doen sult. Sijt vierich in den gheest. Schict v inder tijt.

12

Sijt vrolijck inder hope, verduldich in droeffenisse. En laet niet af vanden ghebede.

13

Neemt v der Heyligen nootdruft aen.^* Herberghet gheern.

* Hebre. 13.a.2.

14

^† Seghenet die v veruolghen. Seghenet, ende en vloecket niet.

† mat. 5.e.44 1.Cor. 4.b.13.

15

Verhuecht v met den vrolijcken, ende weenet met den weenenden.

16

^+‡ Hebt eenderley sin onder malcanderen. En staet niet nae hooghe dinghen, maer hout v tot den leeghen.

+ C vers 16

‡ Philip. 2.a.2.

17

^* En hout v seluen niet voor cloeck.^† En vergheldet niemant quaet met quaet.^‡ Beneersticht v der eerbaerheyt teghen alleman.

* Prou. 3.a.7. Esaie. 5.c.21.

† Pro. 20.c.22 1.Petri. 3.b.9

‡ 2.Cor. 8.c.21

18

^* Ist moghelijck, so veel als aen v is, soo hebt met alle menschen vrede.

* Heb. 12.c.14

19

En wreket v seluen niet mijn liefsten, maer gheeft ruymte den toorn Godts. Want daer staet geschreuen:^† De wrake is mijn, ick wil verghelden, spreeckt de Heere.

† Deut. 32.e.35. Eccli. 28.b.7. Hebr. 10.d.30

20

^‡ Ist dat nv dijnen Viande honghert, soo spijst hem, dorstet hem, soo gheeft hem drincken. Wanneer ghy dat doet, soo sult ghy vierighe colen op zijn hooft vergaderen.

‡ Pro. 25.d.21.

21

En laet v dat boose niet ouerwinnen, maer ouerwint dat boose met den goede.