Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ De Apostel bidt voor de Ioden, bewijsende dat de rechtueerdicheydt, welcke weerdich maeckt totten eewighen leuen alleen is wt de Wet ende tghelooue in Christo Iesu.

1

⁺ LIeue broeders, mijns herten wensch is, ende ick smeecke ooc Godt voor Israel, dat sy salich worden.

+ A vers 1

2

Want ick gheue haer des ghetuychenis,^‡ dat si ijueren om Godt, maer met onuerstant.

‡ Roma. 9.d.31 Gala. 4.b.17

3

Wandt si en bekennen de gherechticheyt niet, die voor Gode gelt, ende soecken haer eyghen gherechticheyt op te richten, ende zijn alsoo der gherechticheyt, die voor Gode ghelt, niet onderdaen.

4

^* Want Christus is des Wets eynde, wie aen dien gelooft, die is rechtueerdich.

* Matt. 5.b.17. Rom. 7.a.4. Galat. 2.c.20.

5

Moses schrijft wel vander gherechticheydt die wt der Wet coemt,^† welcke mensche diese doet, die sal daer in leuen.

† Leuit. 18.a.5. Galat. 3.b.12.

6

Maer de gherechticheyt wt den ghelooue spreect alsoo:^‡ En segt niet in dijn herte, wie wil opuaren ten Hemel? (Dat en is niet anders dan Christum daer af halen)

‡ Deut. 30.c.12

7

Oft wie wil neder varen inde diepte? (Dat en is niet anders, dan Christum vanden dooden halen.)

8

Maer wat seyt si? Dat woort is nae by dy, te weten, in dijne mont ende in dijn herte: Dit is dat woordt vanden ghelooue, dat wy predicken.

9

⁺ Want ist dat ghy Iesum bekent met dijnen monde, dat hy de Heere sy, ende gelooft in dijn herte, dat hem God vanden dooden op verwect heeft, soo wordt ghy salich.

+ B vers 9

10

Want ist datmen van herten ghelooft, soo wortmen rechtueerdich, ende ist datmen metten mont bekent, soo wortmen salich.

11

^* Wandt de Schrift spreect: Wie aen hem ghelooft, die en sal niet te schanden worden.

* Esai. 28.c.16.

12

Hier en is gheen onderscheyt, tusschen eenen Iode ende Griecke. Daer is een Heer aller, rijck ouer alle die hem aenroepen.

13

^† Want soo wie den Naem des Heeren sal aenroepen, die sal salich worden.

† Ioel. 2.f.32. Acto. 2.b.21. 22.b.16.

14

Maer hoe sullen si aenroepen, aen dien sy niet en gheloouen? Ende hoe sullen si gheloouen, van dien si niet ghehoort en hebben?⁺ Ende hoe sullen si hooren sonder Predicant?

+ C vers 14

15

Ende hoe sullen si predicken, ist dat si niet gesonden en worden? Als dan gheschreuen staet:^† Hoe lieflijck zijn de voeten der gheender, die den vrede vercondighen, die dat goet vercondighen.

† Esai. 25.b.7. Nahum. 1.b.15.

16

Maer si en zijn niet alle den Euangelio ghehoorsaem. Want Isaias spreect: Heere,^* wie ghelooft onsen predicken?

* Esai. 53.a.4. Ioan. 12.e.38.

17

Soo coemt dat ghelooue wt den prediken, ende dat prediken door dat woort Godts.

18

Maer ick segghe: En hebben zijt niet gehoort? Tis^† waer, in allen Landen is ymmers haer gheluyt wtgegaen, ende inde gantsche werelt haer woorden.

† Psal. 19.a.5.

19

Maer ick segghe: En heeftet Israel niet bekent? Ten eersten spreeckt Moses:^* Ick wil v doen ijueren ouer dien dat mijn volck niet en is, ende ouer een onuerstandich volck wil ick v vertoornen.

* Deut. 32.c.21.

20

Ende^† Isaias derf wel alsoo segghen: Ick ben geuonden vanden ghenen die my niet ghesocht en hebben, ende ben verschenen den ghenen, die nae my niet gheuraecht en hebben.

† Esaie. 53.a.3. 65.a.1.

21

Ende tot Israel spreeckt hy:^* Den ghantschen Dach heb ick mijn Handen wtghestreckt, tot den volcke dat hem niet en laet ghesegghen, ende wederspreeckt.

* Esaie. 65.a.2.