Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ De Apostel beschrijft de vernielinghe oft de verderffenisse des ouden wets, welcke is een wet des doots, Daer na tracteert hy van de erflijcke oft ingheboren wet der sonden, welcke in ons is.

1

⁺ EN weet ghy niet lieue Broeders (wandt ick spreke met dien, die de Wet weten) dat de Wet heerschet ouer de mensche, soo langhe als hy leeft?

+ A vers 1

[p. 65r]

2

^† Want een vrouwe, die onder den man is, dewijle dat de man leeft, is sy verbonden aen de Wet: Maer ist dat de Man sterft, so is sy los van de Wet, die den man betreft.

† 1.Cor. 7.d.39.

3

^† Ist dat sy nv by eenen anderen man is, dewijle dat de man leeft, so wort si een ouerspeelster geheeten: Maer ist dat de man sterft, soo is sy vrij van der Wet, dat si geen ouerspeelster en is, al ist dat sy by eenen anderen man is.

† Math. 5.d.31.

4

Alsoo oock, mijn broeders,^‡ zijt ghy der Wet ghedoodet, door dat Lichaem Christi, op dat ghy by eenen anderen zijt te weten, by den genen, die van den dooden op verweckt is, op dat wy Gode vrucht brenghen.

‡ Galat. 2.c.20. 1.Tess. 5.b.10. 1.Pet. 4.a.2.

5

Want doen wy inden vleessche waren, doen waren de sondighe lusten (welcke door de Wet haer beroerden) gheweldich in onse leden, den doot vrucht te brengen.

6

Maer nv zijn wy vander Wet los, ende haer af ghestoruen, die ons gheuanghen hielt, alsoo, dat wy dienen sullen in een nieuwe wesen des gheestes, ende niet in den ouden wesen der letteren.

7

⁺ Wat willen wy dan nv segghen? Is de Wet sonde? Dat sy verre.^* Maer de sonde en kende ick niet, dan alleen door de Wet. Want ic en wist niet van der lust, waert dat de Wet niet gheseyt en hadde:^† En laet v niet ghelusten.

+ B vers 7

* Roma. 3.c.20. Hebre. 7.c.18

† Exod. 20.c.17 Deut. 5.c.21.

8

^‡ Ende doen nam de sonde oorsaeck aent ghebot, ende verwecte in my alderley lust.

‡ Ioan. 15.d.22. Roma. 4.c.15 5.d.20. Galat. 3.c.19.

9

Wandt sonder de Wet, was de sonde doot. Ende ick leefde wel eer sonder Wet. Maer doen dat ghebot quam, wert de sonde weder leuendich,

10

Maer ick sterf. Ende het beuant hem, dat my dat ghebot tot den doot werdt, dat my doch tot den leuen ghegheuen was.

11

Wandt de sonde nam oorsaeck aent ghebot, ende bedrooch my, ende doodde my door dat selue ghebot.

12

^* De Wet is ymmers heylich, ende dat ghebot heylich, recht, ende goet.

* Esa. 48.b.17. Psal. 19.b.8. 1.Tim. 1.b.8.

13

Is dan, dat daer goet is, my een doot gheworden? Dat sy verre. Maer de sonde, op dat si verschijne, hoe sy sonde is, soo heeft si my door dat goet, den doot ghewracht, op dat de sonde werde bouen maten sondich, door dat ghebot.

14

Wandt wy weten, dat de Wet gheestelijck is, maer ick ben vleesschelijck,^† onder de sonde vercocht.

† Esaie. 52.a.3.

15

Want ick en weet niet, wat ick doe.^‡ Want ick en doe niet, dat ick wil, maer dat ick hate, dat doe ick.

‡ Galat. 5.c.17.

16

⁺ Maer ist dat ick doe, dat ick niet en wil, so bewillighe ick, dat de Wet goet sy.

+ C vers 16

17

Soo en doe ick nv dat selue niet, maer de sonde, die in my woont.

18

^* Wandt ick weet, dat in my, dat is, in mijn vleesch, niet goets en woont. Willen heb ick wel, maer volbrenghen dat goet, en vinde ick niet.

* Genes. 6.a.5. 8.d.21.

19

Want dat goet, dat ic wil, dat en doe ick niet, maer dat quaet, dat ick niet en wil, dat doe ick.

20

Ist dat ick nv doe, dat ick niet en wil, soo en doe ick dat selfde niet, maer de sonde, die in my woont.

21

Soo vinde ick my nv een Wet, ick die dat goet wil doen, dat my dat boose aenhangt.

22

^† Wandt ick heb lust aen Gods wet, na den inwendigen mensche.

† Psalm. 1.a.2.

23

^* Maer ick sie een ander Wet in mijn leden, die daer wederstrijt der Wet in mijnen ghemoede, ende my gheuanghen neemt inder sonden Wet, welcke in mijn leden is.

* Galat. 5.c.17.

24

Ick elendighe mensch, wie sal my verlossen, vanden lijue deses doots?

25

Ick dancke Gode, door Iesum Christum onsen Heere. So diene ick nv met den ghemoede der Wet Gods, maer met den vleessche, der Wet der sonden.