Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Apostel bewijst datmen in de sonde niet blijuen en sal, maer datmen duechdelijcke wercken moet bewijsen, Ende hoe de doot dat loon der sonden is.

1

⁺ VVat willen wy hier toe segghen? Sullen wy dan in der sonde blijuen, op dat de genade dies te machtigher worde?

+ A vers 1

2

Dat sy verre. Hoe souden wy in der sonde willen leuen, dier wy af ghestoruen zijn?

3

^* En weet ghy niet, dat alle, wy die in Iesum Christum ghedoopt zijn, die zijn in sinen doot ghedoopt?

* Galat. 3.d.27 Collos. 2.b.12. 1.Pet. 3.c.21.

4

Soo zijn wy ymmer met hem begrauen door dat doopsel, in den doot, op dat, ghelijck als Christus op gewect is vanden dooden, door de heerlijckheyt des vaders,^† alsoo oock wy in een nieuwe leuen wandelen sullen.

† Ephe. 4.c.23. Collos. 3.a.10. Hebr. 9.c.14.

5

^‡ Want ist dat wy met hem gheplant worden tot ghelijcken doot, soo sullen wy oock der verrijsenis ghelijck zijn.

‡ Rom. 8.b.11. 1.Cor. 6.c.14. 2.Cor. 4.c.14

6

Dewijle dat wi weten, dat onse oude mensch met hem ghecruyst is, op dat dat sondige lichaem op houde, dat wy nv voort aen der sonde niet en dienen.

7

^* Want wie ghestoruen is, die is gherechtueerdicht van der sonde.

* 1.Pet. 4.a.1.

8

^+† Sijn wy dan met Christo ghestoruen, soo gheloouen wy, dat wy oock met hem leuen sullen:

+ B vers 8

† 2.Tim. 2.b.11. Apoca. 1.d.18.

9

Ende weten, dat Christus van den dooden verweckt, nv niet meer en sterft, de doot en sal nv voortaen niet meer ouer hem heerschen.

10

^‡ Want dat hy ghestoruen is, dat is hy der sonden gestoruen een mael: Maer dat hy leeft, dat leeft hy Gode.

‡ 1.Pet. 2.d.24

11

Alsoo oock ghy, hout v daer voor, dat ghy der sonde gestoruen zijt, ende Gode leeft, in Christo Iesu onsen Heere.

12

^* So en laet nv de sonde niet heerschen in uwe sterflijcke lichaem, om haer ghehoorsaem te zijn in sinen lusten.

* Tobi. 4.a.6.

13

Oock en begheeft der sonde uwe leden niet, tot wapenen der ongherechticheydt,^* maer begheeft v seluen Gode, als die wt den dooden leuendich zijt, ende uwe leden Gode tot wapenen der gherechticheyt.

* Luce. 1.f.69. Hebr. 9.c.14.

14

Wandt de sonde en sal niet connen heerschen ouer v, nadenmael ghy niet onder de Wet en zijt, maer onder de ghenade.

15

Hoe dan? Sullen wy sondigen, dewijle dat wy niet onder de Wet, maer onder de ghenade zijn? Dat sy verre.

16

^† En weet ghy niet, wien ghy v begheeft tot knechten, in gehoorsaemheyt, dat ghy diens knechten zijt, dien ghy gehoorsaem zijt? Het sy der sonde tot den doot, oft der gehoorsaemheyt tot der gherechticheyt.

† Ioan. 8.c.34. 2.Pet. 2.d.19.

17

Maer Gode sy ghedanct, dat ghy knechten der sonden gheweest zijt, maer nv gehoorsaem geworden van herten, den voorbeelde der leere, dien ghy begeuen zijt.

18

Want nv ghy^* vrij gheworden zijt van der sonde, soo zijt ghy knechten gheworden der gherechticheyt.

* Ioan. 8.c.32. Galat. 5.a.1. 1.Pet. 2.c.16.

19

⁺ Ick moet menschelijc daer af spreken, om der swacheyt willen uwes vleeschs. Ghelijck als ghy uwe leden begheuen hebt, tot dienst der onreynicheydt, ende vander eender ongherechticheydt tot der anderen: Alsoo begheeft oock nv uwe leden, tot dienst der gherechticheyt, dat si heylich worden.

+ C vers 19

20

^† Want doen ghy der sonden knechten waert, doen waert ghy vrij van der gerechticheyt.

† Ioan. 8.d.34.

21

Wat hadt ghy doen ter tijt voor vrucht? Welcker ghy v nv schaemt. Want dat eynde der seluen is de doot.

22

Maer nv ghy vanden sonden vrij zijt, ende Gods knechten geworden, so hebt ghy uwe vruchte, dat ghy heylich wordet, ende dat eynde, dat eewich leuen.

23

^* Want de doot is der sonden loon:^† Maer de gaue Gods, is dat eewich leuen, in Christo Iesu onsen Heere.

* Genes. 2.c.17. Roma. 5.b.11

† 1.Pet. 1.a.3.