Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Apostel bewijst de crachte des gheloofs in de rechtueerdichmakinge der gheloouender menschen, aenghesien dat de doot geregneert heeft, van Adam tot Christum toe.

1

⁺ NV wy dan zijn rechtueerdich gheworden, door den ghelooue,^* soo hebben wy vrede met Godt, door onsen Heere Iesum Christum,

+ A vers 1

* Esaie. 26.a.3. 32.d.17. Ioan. 16.d.33. Ephe. 2.c.13.

2

^† Door welcken wy oock eenen toeganck hebben in den ghelooue, tot deser ghenade, daer wy in staen, ende beroemen ons^‡ der hopinghe, der toecomender heerlijckheydt, die Godt gheuen sal.

† Ioan. 10.b.9 14.a.6.

‡ Hebre. 3.a.6

3

Ende niet dat alleen, maer wy beroemen ons oock der droeffenisse, dewijle dat wy weten,^* dat droeffenisse verduldicheyt brengt,

* Iacob. 1.a.3.

4

Ende verduldicheyt brengt beproeuinghe, ende beproeuinghe brengt hope,

5

^† Ende de hope en laet niet te schande worden. Want de liefde Godts is wt ghegoten in onse herten, door den heyligen Geest, die ons ghegheuen is.

† Esai. 57.b.11.

6

^‡ Want oock Christus, doen wy noch swack waren nae der tijt, is voor ons godtloosen ghestoruen.

‡ Ephesi. 2.a.3. Collos. 2.b.13.

7

Nv en sterft nauwe yemandt om des Rechten wille: Om wat goets wille, dorste misschien yemant steruen.

8

^* Daerom prijst Godt zijn liefde teghen ons, dat Christus voor ons ghestoruen is, doen wy noch sondaers waren.

* Ioan. 3.c.16. 1.Petri. 3.c.18 1.Ioan. 4.b.9 Hebre. 9.d.28

9

Soo sullen wy ymmer veel meer door hem bewaert worden voor den toorn, nae dien wy door zijn bloet rechtueerdich geworden zijn.

10

⁺ Want ist dat wy Gode versoent zijn, door den doot zijns soons, doen wi noch vianden waren, veel meer sullen wy salich worden, door zijn leuen, als wy nv versoent zijn.

+ B vers 10

11

Ende niet alleen dat, maer wy beroemen ons ooc Gods, door onsen Heere Iesum Christum, door welcken wy nv de versoeninge ontfangen hebben.

12

^* Daerom, gelijckerwijs door eenen mensch de sonde ghecomen is in de Werelt, ende de doot door de sonde,^† ende de doot is also tot alle menschen door ghedrongen, aenghesien dat si

* Genes. 3.a.6. 1.Cor. 15.c.21.

† Gene. 2.b.17.

[p. 64v]

alle gesondicht hebben.

13

Want de sonde was wel inder Werelt, tot op de Wet.^* Maer waer gheen Wet en is, daer en achtmen de sonde niet,

* Roma. 4.c.15

14

Maer de doot heerschede van Adam aen, tot op Mosen, oock ouer die, die niet ghesondicht en hebben, met ghelijcker ouertredinghe, als Adam, welcke is een beelde des, die toecomende was.

15

Maer met der gaue en ist alsoo niet, alst met der sonde:^† Wandt ist dat aen eens sonde veel ghestoruen zijn, so is veel meer Godts ghenade ende gaue velen rijckelijc toe gecomen, door Iesum Christum, die de eenighe Mensch in genaden was.

† 1.Cor. 15.c.21.

16

⁺ Ende de gaue en is niet alleen ouer een sonde, ghelijc als door des eenighen sondaers, eenighe sonde, al verderf. Want dat ordeel is gecomen wt eender sonde ter verdoemenis: Maer de gaue helpt oock wt veel sonden ter gherechticheyt.

+ C vers 16

17

Wandt ist dat om des eenighen sonden wille, de doot gheheerscht heeft door den eenen, veel meer sullen die, die daer ontfanghen de volheyt der ghenaden, ende der gauen ter gherechticheydt, heerschen int leuen, door eenen Iesum Christum.

18

^* Ghelijck als nv door eens sonde de verdoemenis ouer alle menscen ghecomen is, also is oock, door eens gherechticheydt, de rechtueerdinghe des leuens ouer alle menschen ghecomen.

* 4.Esdre. 7.c.48.

19

Wandt ghelijck als door eens Menschen ongehoorsaemheyt, veel Sondaers gheworden zijn, alsoo worden oock door eens ghehoorsaemheyt, veel rechtueerdighen.

20

^† Maer de Wet is beneuen in ghecomen, op dat de sonde machtigher werde:^‡ Ende waer de sonde machtich gheworden is, daer is oock de ghenade veel machtigher gheworden:

† Rom. 4.c.15. Galat. 3.c.19.

‡ Luc. 7.e.47

21

Op dat, ghelijck als de sonde gheheerscht heeft tot den doot, alsoo oock de ghenade heersche, door de gerechticheyt tot den eewighen leuen, door Iesum Christum.