Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De Apostel declareert door dat Exempel van Abraham, dattet gelooue

[p. 64r]

van noode is totter salicheyt, Ende hoe Abraham een vader der gheloouigen is, ende dat de oude Wet totter salicheyt niet ghenoech en is.

1

⁺ VVat segghen wy dan van^* onsen vader Abraham, dat hy geuonden hebbe na den vleessche?

+ A vers 1

* Esaie. 51.a.2.

2

Dat segghen wy: Is Abraham door de wercken rechtueerdich, soo heeft hy wel Roem, maer niet voor Gode.

3

Maer^† wat seyt de Schrift? Abraham heeft Gode ghelooft, ende dat is hem tot gherechticheyt gherekent.

† Gene. 15.b.6. Galat. 3.a.6. Iacob. 2.c.23.

4

Maer dien, die met wercken om gaet, en wort dat loon niet wt ghenaden toe gherekent, maer wt schult:

5

Maer dien, die niet met wercken om en gaet, maer ghelooft aen dien, die den godtloosen rechtueerdich maeckt, dien wordt zijn ghelooue gherekent tot gherechticheyt.

6

Nae welcker maniere oock Dauid seyt: Dat de salicheydt sy alleen des menschen, welcken Godt toe rekent de gherechticheydt, sonder toe doen der wercken, daer hy spreect:

7

^* Salich zijn die, welcken haer ongherechticheden vergeuen zijn, ende welcken haer sonden bedeckt zijn.

* Psal. 32.a.1.

8

Salich is de Man, welcken Godt gheen sonde toe en rekent.

9

Nv dese salicheyt, gaet si ouer de besnijdenis oft ouer de voorhuyt?⁺ Wy moeten ymmer segghen, dat Abraham zijn ghelooue ter gherechticheydt sy gherekent.

+ B vers 9

10

Hoe ist hem dan toe gherekent? In der besnijdinghe? Oft in der voorhuyt? Sonder twijfel,^† niet inder besnijdinghe, maer in der voorhuyt.

† Gene. 15.b.6.

11

^* Maer dat teecken der besnijdinghe, ontfinck hy tot een Seghel der gherechticheyt des gheloofs, welcke hy noch in der voorhuyt hadde: Op dat hy werde een Vader, aller, die daer gheloouen in der voorhuyt, dat den seluen sulcx oock gherekent werde ter gherechticheyt.

* Gen. 17.b.11.

12

Ende werde oock een vader der besnijdinghe, niet alleen dier, die van der besnijdinghe zijn, maer ooc dier, die daer wandelen in de voetstappen des geloofs, welcke was in de voorhuyt onses vaders Abrahams.

13

⁺ Want de Belooftenisse, dat hy soude zijn der Werelt Erfghenaem, en is Abraham, oft sinen Sade niet geschiet door de Wet, maer door de gherechticheyt des gheloofs.

+ C vers 13

14

^* Want ist dat die van der Wet, Erfghenamen zijn, so en is dat gelooue niet, ende de belooftenis is wt:

* Galat. 3.c.18.

15

Nadenmael de Wet slechs toorn aenricht.^† Wandt waer de Wet niet en is, daer en is oock gheen ouertredinghe.

† Ioan. 15.c.22. Roma. 7.b.7. Galat. 3.c.19.

16

Daer om moet de gherechticheydt door den ghelooue comen, op dat sy sy wt genade, ende de Beloftenisse vast blijue, allen Sade, Niet dien alleen, dat onder der Wet is, maer oock dien, dat des gheloofs Abrahams is,^* welcke is onser alder vader,

* Esaie. 51.a.2. Luce. 13.b.14. 19.a.9. Ioan. 8.c.33.

17

Alsser gheschreuen staet:^† Ick heb v gheset tot eenen Vader veler Heydenen, voor Godt, dien ghy ghelooft hebt, die daer leuendich maeckt de dooden, ende roept dat, dat niet en is, dattet sy.

† Gen. 17.a.4

18

⁺ Ende hy heeft gelooft op hope, daer niet te hopen en was, op dat hy werde een vader veler Heydenen. Als dan tot hem gheseyt is:^* Alsoo sal dijn Saet zijn.

+ D vers 18

* Genes. 15.a.8. Hebre. 11.c.12.

19

Ende hy en wert niet swack int ghelooue, en sach oock niet aen zijn eyghen lichaem, welck nv verstoruen was, dewijle dat hy byna hondertiarich was, ooc niet dat verstoruen lijf der Sara.

20

Want hy en twijfelde niet aen de Beloftenisse Gods, door onghelooue, maer wert sterck int gelooue, ende gaf Gode de eere,

21

^* Ende wist opt alder sekerste, dat, soo wat Godt belooft, dat can hy oock doen.

* Psalm. 115.a.2

22

Daerom ist hem oock ter gherechticheyt gerekent.

23

Maer dat en is niet gheschreuen,^† alleen om sinen wille, dattet hem toe gherekent is,

† Roma. 15.a.9

24

Maer oock om onsen wille, dient toegerekent sal worden, ist dat wy gheloouen aen dien, die onsen Heere Iesum op ghewect heeft vanden dooden.

25

^* Die daer is om onser sonden wille ouer ghegheuen, ende om onser gherechticheyt wille op ghewect.

* 1.Tim. 2.a.6.