Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De Apostel straft de sonden der Ioden, segghende, dat si niet int misdaet den Heydenen ghelijck en zijn, maer eensdeels argher ende quader.

1

⁺ DAerom, O Mensch, en muecht ghy v niet ontschuldighen, so wie ghy zijt die^* daer ordeelt:^† Want waer in ghy eenen anderen ordeelt, daer verdoemt ghy v seluen in, nademael ghy effen dat selue doet, dat ghy ordeelt.

+ A vers 1

* Matth. 7.a.1.

† 2.Re. 12.b.5. 1.Cor. 4.a.5.

2

Wandt wy weten, dat Godts ordeel recht is, ouer die, die sulcx doen.

3

Maer denct ghy, O mensch, ghy die ordeelt die, die sulcx doen, ende doet oock dat selue, dat ghy den Ordeel Godts ontloopen sult?

4

Oft veracht ghy den Rijcdom zijnder goedertierenheydt, verduldicheyt, ende lancmoedicheyt?^‡ En weet ghy niet, dat Godts goedertierenheyt tot boete leydt?

‡ Esaie. 30.c.18. Actor. 17.c.30. 2.Pet. 3.b.15.

5

Maer ghy, nae uwe verstockte, ende onboetueerdighe herte,^* hoopt v seluen den toorn, op den dach des toorns, ende der openbaringhe des rechtueerdighen ordeels Godts:

* Iacob. 5.a.3.

6

^† Welcke gheuen sal eenen yeghelijcken na zijn wercken,

† Psal. 62.b.13. Iere. 17.b.10. 32.c.19. Mat. 16.d.27 1.Cor. 3.b.8. 2.Cor. 5.b.10.

7

Te weten, prijs ende eere, ende een onuerganclijck wesen, dien, die met verduldicheydt in goeden wercken, staen nae dat eewighe leuen:

8

Maer dien, die daer kijfachtich zijn,^‡ ende der waerheyt niet ghehoorsaem en zijn, maer zijn ghehoorsaem der onrechtuerdicheyt,^* onghenade ende toorn,

‡ 2.Tes. 1.b.8.

* Iere. 30.d.23.

9

Droeffenis ende angst, ouer alle sielen der menschen, die daer quaet doen, voornaemlijck der Ioden, ende oock der Griecken:

10

Maer prijs ende eere ende vrede, allen dien, die daer goet doen, voornaemlijck den Ioden ende ooc den Griecken.

11

^+† Want daer en is geen aensien der Persoonen voor Godt.

+ B vers 11

† Deut. 10.d.17 Iob. 34.b.19. Acto. 10.d.34 Galat. 2.a.6. Ephe. 6.a.9.

12

Die sonder Wet ghesondicht hebben, die sullen ooc sonder Wet verloren worden: Ende die aen de Wet ghesondicht hebben, die sullen door de Wet verordeelt worden.

13

^‡ Nademael die voor Godt niet rechtueerdich en zijn, die de Wet hooren: Maer die de Wet doen, sullen rechtueerdich zijn.

‡ Mat. 7.c.24. Luce. 6.e.47. Iacob. 1.c.22.

14

Wandt ist dat de Heydenen die de Wet niet en hebben, ende nochtans van natuere doen des Wets wercken, die selue, dewijle dat sy de Wet niet en hebben, zijn haer seluen een Wet,

15

Daer mede, dat si bewijsen, des Wets werck, si beschreuen in haer herten: Nadenmael haer hare Conscientie betuycht, daer toe oock de ghedachten, die haer onder malcanderen verclagen ofte ontsculdighen,

16

^‡ Op dien dach, als Godt dat verborghen der Menschen door Iesum Christum ordeelen sal, na tluyden mijns Euangelij.

‡ Matt. 25.c.31.

17

Maer siet toe,^* ghy heet een Iode,^† ende verlaet v op de Wet, ende beroemt v Godes, ende weet sinen wille:

* Ioan. 8.d.39.

† Psal. 1.a.2. Roma. 9.a.4

18

Ende dewijle dat ghy wt de Wet onderricht zijt, soo proeft ghy wat dat beste sy te doen,

19

Ende vermeet v te zijn een Leyder der blinden, een licht der gheenre die inder duysternisse zijn,

[p. 63v]

20

Een onderwijser der onwijsen, een leeraer der eenuuldigen, ghy hebt de Form wat te weten ende wat recht is in de Wet.

21

Nv leert ghy de anderen, ende en leert v seluen niet.^* Ghy predict, men sal niet stelen, ende ghy steelt.

* Matt. 7.a.5.

22

⁺ Ghy spreeckt, men sal gheen Echt breken, ende ghy breect de Echt. V grouwelt voor de Afgoden, ende berooft Godt vant sine.

+ C vers 22

23

Ghy beroemt v van de Wet, ende onteert Godt, door ouertredinghe des Wets.

24

Want om uwen twille wordt Godts Naem^† ghelastert onder den Heydenen, alsser gheschreuen staet.

† Esaie. 52.a.5. Ezec. 36.d.20.

25

De besnijdinghe is wel nut, ist dat ghy de Wet hout: Maer en hout ghy de Wet niet, soo is dijn besnijdinghe alreede een voorhuyt geworden.

26

Ist dat nv de voorhuyt, dat recht inder Wet hout, en meynt ghy niet, dat zijn voorhuyt voor een besnijdinge gherekent worde?

27

Ende alsoo sal, dat van natuere een voorhuyt is, ende de Wet volbrengt, v ordeelen, ghy die onder de letter ende besnijdenisse zijt, ende de Wet ouertreedt.

28

Wandt dat en is gheen Iode, die wtwendich een Iode is. Oock en is dat gheen besnijdinghe, die wtwendich in den vleessche gheschiet.

29

^* Maer dat is een Iode, die inwendich verborghen is. Ende^† de besnijdinghe des herten, is een besnijdinghe, die in den Gheest ende niet in de Letter en gheschiet, welcx Lof en is niet wt den Menschen, maer wt Godt.

* Ioan. 8.d.39. Roma. 9.a.7.

† Deu. 10.d.16 Iere. 4.a.4. Philip. 3.a.3. Collos. 2.b.11.