Den Bibel, Inhoudende dat Oude ende Nieuwe Testament (Biestkensbijbel)

De Epistel S. Pauli, aen den Romeynen.

¶ Dat .I. Capittel.

¶ De Apostel thoont zijn liefde, de welcke hy heeft tot de Romeynen, ende daer nae straft hy de sonden vanden ghenen die haer eyghen sinlijckheydt, wellust, ende begheerten na volghen. Ende seyt haer, waerom dat Godt den mensche ouergheeft, in dinghen te doen, die niet en betamen.

1

⁺ PAulus een Knecht Iesu Christi, geroepen tot een Apostel,^* wtghesondert te prediken dat Euangelium Godts,

+ A vers 1

* Acto. 13.a.2. Galat. 1.c.15.

2

Dwelc hy te voren^† belooft heeft, door zijn Propheten, inde heylighe Schrift,

† Gene. 3.c.15. Deut. 18.c.15. Iere. 23.a.5. Acto. 28.d.23.

3

Van sinen soon die gheboren is, vanden^‡ sade Dauids, na den vleessche,

‡ Math. 1.a.1. 2.Tim. 2.a.8.

4

Ende^* crachtelijck bewesen een soon Godts, nae den Gheest, die daer heylicht. Sint dier tijt dat hy verresen is vanden dooden, te weten, Iesus Christus onse Heere,

* Esaie. 9.b.5. 44.a.6.

5

Door welcken wy hebben ontfangen^† ghenade, ende dat Apostelschap, onder alle Heydenen, om de ghehoorsaemheyt des gheloofs op te richten, onder zijnen Naem,

† Acto. 9.c.17.

6

Dier ghy oock een deel zijt, die daer gheroepen zijt van Iesu Christo.

7

Allen die te Romen zijt, den liefsten Godts, ende gheroepen Heylighen.^‡ Ghenade sy met v, ende vrede, van Gode onsen Vader, ende den Heere Iesu Christo.

‡ 1.Cor. 1.a.2. Galat. 1.a.3. Ephesi. 1.a.2.

8

Ten eersten, danck ick mijnen Gode, door Iesum Christum van uwer alder weghen, datmen van uwen ghelooue in de gheheele Werelt seyt.

9

Want Godt is mijn ghetuyghe^* (Dien ick diene in mijnen gheest, aen den Euangelio van sinen Sone) dat ick uwer sonder ophouden ghedenck,^† ende altijt in mijn ghebet smeecke,

* Ioan. 4.c.23. 2.Tim. 1.a.3.

† Philip. 1.a.4 Collos. 1.a.3.

10

Oft het hem eenmael schicken woude, dat ick tot v quame,^‡ door Godts wille.

‡ Iere. 10.d.23

11

^* Want my verlangt v te sien,^† op dat ick v mede deyle wat geestelijcker gaue, om v te stercken

* 1.Tess. 3.c.10

† Ro. 15.d.29.

12

(Dat is) dat ick met v ghetroost werde, door uwe ende mijn ghelooue, dat wy onder malcanderen hebben.

13

^+‡ Ick en wil v niet verberghen, lieue broeders, dat ick dickwils voor my ghenomen hebbe, tot v te comen, maer ben sus langhe verhindert, op dat ick oock onder v vrucht dede, ghelijck als onder ander Heydenen.

+ B vers 13

‡ 1.Tessa. 2.c.18

14

Ick ben een schuldenaer beyde der Griecken, ende der ongriecken: Beyde der Wijsen, ende der onwijsen:

15

Daerom, soo veel als aen my is, ben ic gheneycht,

[p. 63r]

oock v te Romen dat Euangelium te prediken.

16

^* Want ic en schame my des Euangelij van Christo niet:^† Wandt het is een cracht Gods, die daer salich maeckt, alle die daer aen gheloouen, de Ioden voornaemlijc, ende oock de Griecken:

* Psal. 40.b.11. Eccl. 42.b.24 2.Tim. 1.b.8.

† 1.Cor. 1.c.16

17

^‡ Nademael daer in gheopenbaert wort de gherechticheyt, die voor Gode ghelt, welcke coemt wt het ghelooue int ghelooue.^† Als dan ghescreuen staet: De Rechtueerdighe sal zijns gheloofs leuen.

‡ Roma. 3.c.21. Philip. 3.b.9.

† Abac. 2.a.4. Galat. 3.b.11 Hebr. 10.d.38

18

^* Want Gods toorn van den Hemel wort gheopenbaert, ouer alle godloose wesen, ende ongherechticheyt der Menschen, die de waerheyt op houden in ongerechticheyt.

* Sapi. 13.a.1.

19

Want datmen weet, datter een Godt sy, dat is haer openbaer.^‡ Want Godt heeft het haer gheopenbaert,

‡ Acto. 14.c.16.

20

⁺ Daer mede, dat Gods^* ontsienlijck wesen, dat is, zijn eewighe cracht ende Godtheyt, wort ghesien,^† alsmen dat waer neemt aen den wercken, Namelijck, aen de Scheppinge der Werelt: Also, dat si gheen ontschuldinghe en hebben,

+ C vers 20

* Hebr. 11.a.3.

† Psal. 19.a.1.

21

Dewijle dat sy wisten, datter een Godt is, ende en hebben hem niet ghepresen als eenen Godt, noch hem ghedanct, maer zijn in haren versieren ydel gheworden,^‡ ende haer onuerstandighe herte is verduystert.

‡ Deut. 28.c.28. Ierem. 5.d.21.

22

Doen sy haer voor Wijsen hielden, zijn si tot sotten gheworden,

23

^* Ende hebben verandert de heerlijcheyt des onuerganclijcken Godts, in een beelt, ghelijc den verganckelijcken mensche, ende der vogelen, ende der^† vieruoetighen, ende der cruypender dieren.

* Psal. 106.c.20 Iere. 2.d.24.

† Bel. d.22.

24

^‡ Daerom heeftse oock Godt henen gegeuen, in haerder herten lusten, in onreynicheyt, te scheynden haer eygen lichamen aen haer seluen:

‡ 2.Re. 24.a.1 3.Reg. 20.d.20 Ezec. 14.a.4. Amos. 5.c.18.d.25. Acto. 7.e.42. 2.Tess. 2.b.11. Ephe. 4.d.19

25

Die Godts waerheyt hebben verandert in de luegen, ende hebben gheeert ende gedient dien, dat gheschapen is, meer dan den Schepper, die daer is ghelouet in eewicheydt, Amen.

26

^* Daerom heeftse Godt oock henen ghegheuen in schandelijcke lusten.⁺ Want haer vrouwen hebben verandert den natuerlijcken ghebruyck, in den onnatuerlijcken:

* Leui. 18.c.22

+ D vers 26

27

Des seluen ghelijcken oock de Mannen, hebben verlaten den natuerlijcken ghebruyck der vrouwen, ende zijn aen malcanderen verhittet in haer lusten, ende hebben mannen met mannen schande gewracht, ende het loon haerder dwalinghe (ghelijck alst behoorde) aen haer seluen ontfanghen.

28

^† Ende ghelijck als si niet gheacht en hebben, dat si Godt kenden,^‡ also heeftse Godt oock henen ghegeuen in eenen verkeerden sin, te doen dat niet en dooch,

† Prou. 1.e.26.

‡ Act. 7.e.42.

29

Vol alles onrechts, hoererije, schalckheyt, ghiericheydt, boosheydt, vol haets, moorts, kijuinge, lists, fenijnich,

30

Orenblasers, achterclappers, Godts verachters, vermeters, hooueerdich, grootsprekers, schadelijcke, den Ouders ongehoorsaem,

31

Onuerstandich, trouweloos, hartneckich, onuersoenlijck, onbermhertich: Die, hoe wel si Godts gherechticheyt weten,^‡ (dat die sulcx doen, des doots weerdich zijn) en doen zijt niet al-leen,^* maer hebben oock een welbehaghen aen dien, diet doen.

‡ Sapi. 15.b.6.

* Hosee. 7.a.3.