Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvj. Capittel.

¶ Hoe Paulus selue den President antwoorde, ende hoe hy hem zijn beroepinge vertelt, ende hoe hem de Coninck Agrippa ghehoor gheeft.

1

⁺ AGrippa sprack tot Paulo: Het is v gheorloft, voor v seluen te spreken. Doen verantwoorde hem Paulus, ende recte de handt wt.

+ A vers 1

2

^* Het is my seer lief, lieue heer Coninc Agrippa, dat ic my heden voor v verantwoorden sal, van allen daer ick vanden Ioden om beschuldicht worde.

* Acto. 22.a.1.

3

Aldermeest, de wijle dat ghy weet alle Seden ende vraghen der Ioden, daerom bidde ic v, wilt my verduldelijck hooren.

4

Tis waer, mijn leuen van mijnder Iuecht op, hoe ick dat van aenbeghin onder desen volcke te Ierusalem geleyt hebbe, weten alle Ioden wel,

5

Die my te voren ghekent hebben, als zijt wilden betuygen.^† Want ick heb een Phariseus gheweest, welcke is de strengste Secte onses Godsdiensts.

† Philip. 3.a.5. Acto. 23.a.6.

6

^‡ Ende nv stae ick, ende worde aengheclaecht, ouer den hope aender^* beloftenisse, die van Godt tot onse Vaders gheschiet is,

‡ Acto. 28.c.20.

* Gene. 3.c.15 22.c.18. Deut. 18.c.15. Psal. 131.b.11.

7

Tot welcker, hopen de twelf geslachten der onser te comen, met Godts dienst dach ende nacht gansch neerstelijck. Van deser hopinge wegen, worde ick lieue heer Coninck Agrippa vanden Ioden beschuldicht.

8

⁺ Waerom wort dat voor onghelooflijck by v gheordeelt,^† dat Godt dooden verwect?

+ B vers 8

† Ioan. 11.e.43

9

Tis waer, ick meynde oock by my seluen, ick moeste den Naem Iesu van Nazareth veel te spijt doen,

10

^‡ Als ick dan oock te Ierusalem ghedaen hebbe, daer ick veel Heylighen inde gheuanckenis sloot, daer ick vanden hoogen Priesters macht ouer ontfinck. Ende als si gedoot werden, halp ick dat ordeel spreken.

‡ Acto. 8.a.3. 9.a.1. 22.a.4. Galat. 1.c.13. 1.Cor. 15.a.9. 1.Tim. 1.c.13.

11

Ende door alle Scholen pijnichde icse dickwils, ende dwancse te lasteren, ende was wter maten dul op haer, ende veruolchde haer oock inde vreemde steden.

12

Ouer welck, doen ick oock na Damascum reysde, met macht ende beuel vanden hoogen Priesters, midden op den dach, lieue heer Coninck, sach ick op den wech,^* dat een licht vanden Hemel claerder dan der Sonnen schijnsel, my ende die met my reysden, omscheen.

* Acto. 9.a.3. 22.a.6.

13

⁺ Ende doen wy alle ter Aerden neder vielen, hoorde ick een stemme tot my spreken, die seyde opt Hebreeusch: Saul, Saul, wat veruolcht ghi my? Het sal v swaer zijn teghen den prickel achter wt te slaen.

+ C vers 13

14

Ende ick sprac: Heere, wie zijt ghy? Hy sprack: Ick ben Iesus, dien ghy veruolcht.

15

Maer staet op, ende treedt op dijne voeten, wandt daer toe ben ick v verschenen, dat ick v ordinere tot eenen dienaer ende ghetuyge, dies, dat ghy ghesien hebt, ende dat ick v noch wil laten verschijnen.

16

Ende wil v verlossen vanden volcke, ende vanden Heydenen, onder welcke ic v nv seynde,

17

Om op te doen haer ooghen, dat sy haer bekeeren vander duysternisse tot den^* licht, ende van het ghewelt des Satanas tot Godt,

* Esaie. 60.a.1. Ephe. 5.a.8.

18

Om te ontfanghen vergheuinge der sonden, ende dat Erue met den ghenen die gheheylicht worden door den ghelooue aen my.

19

⁺ Daerom, lieue heer Coninc Agrippa, was ick der Hemelscher verschijninghe

+ D vers 19

[p. 61v]

niet ongheloouich,

20

^* Maer vercondichde ten eersten, dien te Damasco, ende te Ierusalem, ende in allen Contreyen des Iootschen Lants, oock den Heydenen,^† dat sy boete deden, ende haer bekeerden tot Godt, ende deden oprechte wercken der boete.

* Acto. 9.c.19.d.28.

† Acto. 2.d.38. 3.c.19. 17.e.30.

21

^‡ Om des wille, hebben my de Ioden inden Tempel ghegrepen, ende onderstonden my te dooden:

‡ Act. 21.d.30.

22

Maer door Gods hulpe is my geholpen, ende stae tot desen dach toe. Ende geue ghetuychenisse beyde den cleynen ende den grooten, ende en segghe niet anders, dan dat de Propheten gheseyt hebben, dattet gheschien soude, ende Moses:

23

^* Dat Christus soude lijden, ende de eerste zijn wt de verrijsenisse vanden dooden, ende vercondighen een^† Licht den volcke ende den Heydenen.

* Esaie. 53.a.7. Matt. 16.c.21.

† Esa. 49.b.6 Ioan. 1.a.9. 8 b.12. 12.f.46.

24

⁺ Doen hy nv sulcx tot verantwoordinghe ghaf, sprack Festus met luyder stemmen: Paule ghy raest, de groote Const maect v rasende.

+ E vers 24

25

Maer hy sprack: Mijn edele Feste, ick en rase niet, maer ick spreke warachtighe ende verstandighe woorden:

26

Want de Coninck weet sulcx wel tot welcken ick vrijlijck spreeck. Want ick houde, hem en sy dier gheen af verborghen.^‡ Want sulcx en is niet inden hoec gheschiet.

‡ Ioan. 18.c.20.

27

Gelooft ghy heer Coninck Agrippa den Propheten? Ick wetet dat ghy gelooft.

28

Agrippa sprack tot Paulo, daer en schilt niet veel aen, ghy becout my, dat ick een Christen worde.

29

Paulus sprack:^* Ick wensche voor Gode, het schille aen vele oft aen weynich, dat niet alleen ghy, maer alle die my heden hooren, soodanich werden, als ick ben, wtgenomen dese banden.

* 1.Cor. 7.a.7.

30

Ende doen hy dat hadde gheseyt, stont de Coninck op, ende de Lantuoocht, ende Bernice, ende die met hem saten,

31

Ende ontweken aen een sijde, spraken met malcanderen, ende seyden:^* Dese mensche en heeft niet ghedaen, dat des doots oft der banden weerdich sy.

* Actor. 23.b.9. 25.d.25.

32

Ende Agrippa sprack tot Festo: Dese mensche hadde connen los ghegheuen worden, waert dat hy hem niet op den Keyser beroepen en hadde.