Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ Hoe Paulus verclaecht werdt ontrent den feestdach, ende waerom dat hy te Romen gheuoert wert, om dat hy begheerde te appelleren, ende hoe de Coninc Agrippa hem seluer woude hooren.

1

⁺ DOen nv Festus int Landt ghecomen was, tooch hy na drie dagen op van Cesarea na Ierusalem.

+ A vers 1

2

Doen verschenen voor hem de hooghe Priester, ende de voornaemste der Ioden teghen Paulum, ende vermaenden hem,

3

Ende baden om gonst tegen hem, dat hy hem liet roepen nae Ierusalem, ende leyden hem laghen, dat sy hem onderweghen doodden.

4

Doen antwoorde Festus: Paulus werde wel bewaert te Cesarea, maer hy soude corts daer weder henen trecken.

5

Die nv onder v (sprack hy) connen, die laet mede af reysen, ende den Man verclagen, ist datter yet aen hem is.

6

Doen hy nv by haer meer dan thien daghen geweest hadde, reysde hy af na Cesarea. Ende des anderen daechs settede hy hem op den Richtstoel, ende hiet Paulum halen.

7

Ende doen de selue daer quam, traden rontsom hem de Ioden die van Ierusalem afghecomen waren, ende brachten veel ende sware clachten op teghen Paulum, die sy niet en conden bewijsen:

8

⁺ Dewijle dat hy hem verantwoorde:^* Ick en hebbe my noch aender Ioden Wet, noch aenden Tempel, noch aenden Keyser besondicht.

+ B vers 8

* Acto. 24.b.12 28.c.17.

9

Maer Festus wilde den Ioden een gonst bewijsen, ende antwoorde Paulo, ende sprack: Wilt ghy op na Ierusalem ende v aldaer, hier ouer voor my laten ordeelen?

10

Paulus sprack: Ick stae voor des Keysers ghericht, daer sal ick my laten ordeelen. Den Ioden en heb ick gheen leedt ghedaen, so ghi ooc opt beste weet.

11

^† Maer heb ick yemanden leet gedaen, ende yet gedaen dat des doots weerdich is, soo en weyger ick my niet te steruen: Maer en isser dier geen, daer si my af verclagen, so en can my niemant haer ouergeuen. Ic beroep my op den Keyser.

† Acto. 18.b.14

12

Doen besprack hem Festus met den Raet ende antwoorde:

[p. 61r]

Op den Keyser hebt ghy v beroepen, tot den Keyser sult ghy trecken.

13

Ende na sommighe daghen, quamen de Coninck Agrippas, ende Bernice tot Cesarien, Festum te ontfanghen.

14

Ende doen si veel daghen daer gheweest hadden, gaf Festus den Coninck den handel van Paulo voor, ende sprack:^+* Hier is een man van Felix gheuanckelijck ghelaten,

+ C vers 14

* Acto. 24.c.27

15

^† Om welcx wille de hooge Priesters ende Outsten der Ioden voor my verschenen, doen ick te Ierusalem was, ende baden, ick soude hem laten ordeelen:

† Acto. 24.a.1.

16

Den welcken ick antwoorde:^† Het en is der Romeynen wijse niet, dat een mensche ouer geleuert worde te dooden, eer de verclaechde, zijn Aenclaghers teghenwoordich hebbe, ende ruymte crijghe, hem der aenclacht te verantwoorden.

† Deut. 17.a.1.

17

Ende doen sy hier te samen quamen, ende maecte ick gheen vertreck, ende sat des anderen daechs te Recht, ende hiet den Man voortbrenghen.

18

Van welcken, doen de Aenclaghers voort traden, en brachten si dier oorsaken geene voort, die ick vermoedde.

19

^‡ Maer sy hadden sommighe vraghen tegen hem, van haren byghelooue, ende van eenen verstoruen Iesu, van welcken Paulus seyde, hy leefde.

‡ Acto. 23.d.28.

20

Maer doen ick my der vragen niet en verstont, sprack ick: Oft hy wilde nae Ierusalem reysen, ende aldaer hem daer ouer laten ordeelen?

21

Maer doen Paulus hem beriep, dat hy op des Keysers kennisse bewaert werde, hiet ic hem bewaren, tot dat ick hem tot den Keyser seynde.

22

⁺ Agrippas sprack tot Festo: Ick wilde den mensche oock gheerne hooren. Hy sprack: Morghen sult ghy hem hooren.

+ D vers 22

23

Ende des anderen daechs, doen Agrippas ende Bernice quam met groote pronckerie, ende ginghen in dat Richthuys, met den Hooftlieden, ende vernaemste Mannen der stadt. Ende doent Festus hiet, wert Paulus ghebracht.

24

Ende Festus sprack: Lieue heer Coninck Agrippa, ende alle ghy mannen, die hier met ons zijt, daer siet ghy dien, om welcken my de gansche menichte der Ioden aenghelangt heeft, beyde te Ierusalem ende oock hier, ende roepen: Hy en soude niet langer leuen.

25

^† Maer ick, doen ick vernam, dat hy niet ghedaen en hadde, dat des doots weerdich sy, ende hy ooc selue hem op den Keyser beriep, heb ick besloten hem henen te seynden:

† Acto. 23.b.9. 26.e.31.

26

Van welcken ick niet sekers en hebbe, dat ick den heere schrijue. Daerom hebbe ick hem hier voor laten brengen voor v, ende aldermeest voor v, heer Coninck Agrippa, op dat ick, na gheschiedder ondersoeckinghe, hebben mach wat ic schrijue.

27

Want het dunckt my ongheschict dinck te zijn, eenen gheuanghen henen te seynden, ende gheen oorsake teghen hem te kennen te gheuen.