Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Hoe Paulus verclaecht wert aen des Keysers recht, ende hoe na de beclaginghe vertrocken wert de Sentencie des Rechts.

1

⁺ NAe vijf daghen tooch de hooghe Priester^† Ananias af, met den Outsten, ende met de voorspraker Tertullo, die verschenen voor den Lantvoocht teghen Paulum.

+ A vers 1

† Actor. 23.a.2. 25.c.15.

2

Ende doen hy gheroepen wert, begost Tertullus te verclaghen, ende sprack:

3

Dat wy in grooten vrede leuen onder v, ende veel redelijcker daden

[p. 60v]

desen volcke gheschien, door uwe voorsichticheyt, alder edelste Felix, dat nemen wy altijt ende ouer al aen, met alder dancbaerheyt:

4

Maer op dat ick v niet te langhe op en houde, soo bidde ick v, wilt ons cortelijck hooren, nae uwer saechtmoedicheyt.

5

Wy hebben desen Man gheuonden, schadelijc, ende die oploop maect allen Ioden op den ganschen Aertbodem, ende eenen voornaemsten der^* Secten der Nazarener,

* Actor. 28.c.22.

6

Die^† ooc versocht heeft, den Tempel te ontwijen, welcken wy oock grepen, ende wilden hem gheordeelt hebben, na onser Wet.

† Act. 21.d.28.

7

Maer Lysias de Ouerhooftman voorquam dat, ende leydde hem met grooter ghewelt wt onsen handen,

8

Ende hiet zijn beclagers tot v comen. Van welcken moecht ghy, ist dat ghijt wilt ondersoecken, dat alle vernemen, waerom wy hem verclaghen.

9

Ende de Ioden seyden oock daer toe, ende spraken, het waer alsoo.

10

⁺ Maer Paulus, doen hem de Landtuoocht wencte te spreken, antwoorde: De wijle dat ick weet, dat ghy in desen volcke nv veel Iaren een Richter zijt, wil ick onuerschrict my seluen verantwoorden.

+ B vers 10

11

Want ghy moecht bekennen, dattet niet meer dan twelf daghen en zijn, dat ick op ben ghecomen tot Ierusalem, om aen te bidden.

12

^‡ Oock en hebben si my niet gheuonden inden Tempel met yemant spreken, oft eenen oploop maken inden volcke, noch inde Scholen, noch inde Steden:

‡ Acto. 21.d.26. 25.b.8. 28.c.17

13

Sy en connent my oock niet by brenghen, daer sy my om verclaghen.

14

Maer dat^* beken ick v, dat ick na desen wech, dien sy een^† Secte heeten, also diene den Gode mijnder Vaderen, dat ick alle dien ghelooue, watter gheschreuen staet inde Wet, ende inden Propheten,

* Mat. 10.d.32. Marc. 8.e.38. Luce. 12.a.8.

† Acto. 28.c.22

15

Ende hebbe de hope tot Godt, op welcke sy oock selue wachten, te weten datter toecomende si de^† verrijsenisse der dooden, beyde der rechtueerdighen ende onrechtueerdighen.

† Exodi. 3.a.6. Matt. 22.c.23.

16

Ende^‡ inden seluen oeffene ick my, om te hebben een onaenstootighe consciencie alle tijt, beyde teghen Godt ende den menschen.

‡ Actor. 23.a.1.

17

Maer na veel Iaren, ben ick ghecomen,^* ende heb een aelmoesse ghebracht mijnen volcke, ende offerhanden,

* Rom. 15.d.25. 2.Cor. 9.a.1.

18

Daer^† ouer vonden sy my, dat ick my reynighen liet inden Tempel, sonder alle rumoer, ende oproer.

† Acto. 21.c.26

19

Maer dat waren sommige Ioden wt Asia, welcke souden hier voor v zijn, ende my verclaghen, waert dat si yet tegen my hadden.

20

Oft laet dese selue seggen, oft sy yet onrechts aen my gheuonden hebben, dewijle dat ick hier stae voor den Raet,

21

Dan alleen om des eenen woorts wille, doen ick onder haer stont ende riep:^† Ouer de verrijsenis der dooden worde ick heden van v aengheclaecht.

† Actor. 23.a.6. 28.c.20.

22

⁺ Doen nv Felix sulcx hoorde, vertooch hy haer, want hy wiste seer wel van desen wech, ende sprack: Wanneer Lysias de Ouerhooftman af coemt, soo wil ick my uwer saken beuraghen.

+ C vers 22

23

^‡ Ende hy beual den Onderhooftman, Paulo te bewaren, ende ruste te laten hebben, ende niemant vanden zijnen te beletten, hem te dienen, oft tot hem te comen.

‡ Iere. 39.b.10. Actor. 27.a.3. 28.b.16.

24

Ende nae sommighe dagen, quam Felix met zijn Wijf Drusilla, die een Iodinne was, ende ontboden Paulum, ende hoorden hem vanden ghelooue aen Christum.

25

Ende doen Paulus sprack van der gherechticheyt, ende vander cuysheyt, ende vanden toecomenden ordeel, verschricte Felix, ende antwoorde: Gaet henen op dit mael, wanneer ick gheleghen tijt hebbe, so wil ick v hier laten roepen.

26

Ende hy hoepte daer beneuen, dat hem van Paulo ghelt soude worden ghegeuen, dat hy hem los ghaue. Daerom hy hem oock dickwils liet roepen, ende sprac met hem.

27

Doen nv twee Iaren om waren, quam Portius Festus, in Felix stede. Ende Felix wilde den Ioden een weldaet bewijsen,^† ende liet Paulum daer gheuanckelijck.

† Acto. 25.b.14