Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Hoe dat Paulus voor den Raedt der Ioden ende Ouerste gestelt wort, om hem te verantwoorden, daer quam een tweedracht tusschen de Phariseen ende Saduceen, als Paulus vande verrijsenisse sprack. Hy wert vanden Heere ghetroost, ende hy wert inden Richthuyse Herodis bewaert.

1

⁺ PAulus sach den Raedt aen, ende sprack: Ghy Mannen lieue Broeders,^* ick heb met aller goeder consciencie ghewandelt voor Godt, tot op desen dach.

+ A vers 1

* Acto. 24.b.16

2

^† De hooghe Priester Ananias, beual den ghenen die daer om stonden, dat sy hem op den mondt sloeghen.

† 3.Re. 22.d.24. Ierem. 20.a.2. Ioan. 18.c.22.

3

Doen sprack Paulus tot hem: Godt sal v slaen, ghy ghewitte

[p. 60r]

want^* sit ghy, ende ordeelt my na de Wet, ende heet my slaen teghen de Wet?

* Deut. 17.a.1.

4

Ende die daer om stonden spraken: Schelt ghy den hoogen Priester Gods?

5

Ende Paulus sprack: Lieue Broeders, ick en wisthet niet, dat hy de hooghe Priester is. Want daer staet ghescreuen:^† Den Ouersten dijns volcx en sult ghy niet vloecken.

† Exo. 22.d.28.

6

Ende als Paulus wiste, dat dat een deel Saduceen waren, ende dat ander deel Phariseen, riep hy inden Raet: Ghy mannen lieue Broeders,^‡ Ick ben een Phariseus, ende eens Phariseen sone,^* ick worde aengeclaecht, om der hopen, ende der verrijsenis wille der dooden.

‡ Philip. 3.a.5.

* Act. 24.b.21 26.a.6. 28.c.22

7

Ende doen hy dat seyde, wert daer een oproer onder den Phariseen ende Saduceen, Ende de Menichte deylde haer.

8

^† Want de Saduceen segghen, daer en sy gheen verrijsenis, noch Enghel, noch gheest. Maer de Phariseen belijdent beyde.

† Matt. 22.c.23. Luce. 20.d.27

9

⁺ Ende daer wert een groot gheroep. Ende de Schriftgheleerden vander Phariseesche partie stonden op, streden ende spraken:^‡ Wy en vinden niet quaets aen desen mensche.^* Maer heeft een geest oft een Engel met hem gesproken, so en connen wy met Godt niet strijden.

+ B vers 9

‡ Acto. 25.g.25.

* Act. 22.a.7.

10

Ende doen de oproer groot wert, sorchde de Ouerste Hooftman dat sy Paulum verschueren mochten, ende hiet dat Crijchsvolck afgaen, ende hem van haer rucken, ende inden Legher brenghen.

11

Des anderen daechs inder nacht,^† stont de Heere by hem, ende sprack: Hebt eenen goeden moet Paule, want ghelijck als ghy van my te Ierusalem ghetuycht hebt, alsoo moet ghy oock te Romen ghetuygen.

† Actor. 16.b.9. 18.a.9.

12

^‡ Doent nv dach wert, worpen haer sommighe Ioden te samen, ende verbanden haerseluen, noch te eten noch te drincken, tot dat sy Paulum ghedoot hadden.

‡ Actor. 23.c.20.d.29.

13

Haerder waren meer dan veertich, die sulcken verbont maecten.

14

Die traden tot den hooghen Priesters ende Outsten, ende spraken: Wy hebben ons hert verbannet, niet te inbijten, tot dat wy Paulum ghedoot hebben.

15

Daerom, so vercondicht den Ouerhooftman ende den Raet, dat hy hem morghen tot v brenghe, als oft ghy hem beter wilt verhooren. Ende wy zijn bereyt hem te dooden, eer hy voor v coemt.

16

⁺ Ende doen Paulus susters Soon desen aenslach hoorde, quam hy daer, ende ghinck inden Leger, ende vercondichdet Paulo.

+ C vers 16

17

Ende Paulus riep tot hem eenen vanden Onderhooftlieden, ende sprack: Desen Ionghelinck brengt henen tot den Ouerhooftman, wandt hy heeft hem wat te segghen.

18

Die nam hem aen, ende bracht hem tot den Ouerhooftman, ende sprac: De ghebonden Paulus riep my tot hem, ende badt my desen Ionghelinck tot v te brenghen, die v wat te segghen heeft.

19

Doen nam hem de Ouerhooftman byder handt, ende weeck aen een bysonder plaetse, ende vraechde hem: Wat ist dat ghy my hebt te segghen? Hy sprack:

20

De^* Ioden zijn eens gheworden v te bidden, dat ghy morghen Paulum voor den Raet laet brenghen, als oft sy hem beter wilden verhooren.

* Actor. 23.b.12.

21

Maer en betrout haer niet. Want daer verwachten op hem meer dan veertich Mannen van haer, die haerseluen verbannet hebben noch te eten, noch te drincken, tot dat sy Paulum dooden, ende zijn nv bereyt, ende wachten op dijn belofte.

22

Doen liet de Ouerhooftman den Ionghelinck van hem, ende geboot hem, dat hijt niemant en seyde, dat hy hem sulcx gheopenbaert hadde.

23

Ende riep tot hem twee Onderhooftlieden, ende sprack: Rustet tweehondert Crijchsknechten, dat sy nae Cesaream trecken, ende tseuentich Ruyters, ende twee hondert Schutters, op de derde vre der nacht,

24

Ende bereydt de Beesten, dat sy Paulum daer op setten, ende brengen hem bewaert tot Felix den Lantuoocht, ende schreef eenen brief, deses inhouts.

25

⁺ Claudius Lysias, den edelen Lantuoocht Felix, vruechde te vooren.

+ D vers 25

26

^† Desen Man hadden de Ioden ghegrepen, ende wilden hem ghedoot hebben, doen quam ick met den Chrijchsvolc daer toe, ende ructe hem van haer, ende beuant, dat hy een Romeyn is.

† Acto. 21.d.33.

27

Ende doen ick wilde weten de oorsake, daer sy hem om beschuldichden,^‡ leyde ick hem in haren Raet.

‡ Acto. 22.c.30.

28

Doen beuant ic, dat hy beschuldicht wert vanden^* vragen haerder Wet: Maer gheen aenclage en hadde des doots oft der banden weerdich.

* Actor. 25.c.19.

29

^† Ende doent voor my quam, dat sommighe Ioden hem laghen leyden, seynde ick hem van stonden aen tot v, ende ontboot den Aenclagers ooc, dat sy voor v seyden, wat sy tegen hem hadden. Vaert wel.

† Actor. 23.c.20.

30

De Crijchsknechten, gelijck als haer beuolen was, namen Paulum, ende brachten hem inder nacht na Antipatridem.

31

Ende des anderen daechs lieten sy de Ruyters met hem trecken, ende keerden wederom tot den Legher.

32

Doen die tot Cesarien quamen leuerden sy den brief den Lantuoocht ouer, ende setteden Paulum oock daer henen.

33

Doen de Lantuoocht den brief las, vraechde hy, wt wat Landt hy ware?

34

Ende doen hy hoorde, dat hy wt Cilicia was, sprack hy:^‡ Ick wil v verhooren, wanneer dijne Aenclaghers oock teghenwoordich zijn. Ende hiet hem bewaren int Richthuys Herodis.

‡ Deut. 17.a.1.