Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Hoe dat Paulus dat Iootsche volc toesprack, van zijnder bekeeringhe in Christo, ende van zijnen Visioene in Ierusalem, Ende hoe dat hem de Ioden geesselen wouden, ende hoe hy hem excuseerde dat hy een Romeyn was.

1

⁺ GHy Mannen lieue Broeders, ende Vaders, hoort mijn verantwoordinghe aen v.

+ A vers 1

2

Doen sy hoorden, dat hy op Hebreeus tot haer sprack, werden sy noch stilder. Ende hy sprack:

3

^* Ick ben een Iootsch Man gheboren te Tarsen in Cilicia, ende in dese stadt opgeuoet,^‡ aen de voeten Gamalielis, gheleert met alder neersticheyt inde Vaderlijcke Wet. Ende was een vyerich navolgher Gods, ghelijck als ghy alle hedens dages zijt,

* Actor. 9.b.11. 21.e.39.

‡ Acto. 5.e.35.

4

^* Ende hebbe desen wech veruolcht ter doot toe. Ick bantse ende leuerdese inde gheuanckenis, beyde Mannen ende Vrouwen.

* Actor. 9.a.1. 26.b.9. 1.Cor. 15.a.9. Galat. 1.c.13. 1.Timo. 1.c.13.

5

Als my oock de hooghe Priester ende den gantschen hoop der Outsten, getuychnis geeft: Van welcken ick brieuen nam aen de Broeders, ende reysde na Damascon, dat ick de ghene, die aldaer waren, ghebonden voerde na Ierusalem, op dat sy ghepijnicht werden.

6

Het geschiedde, doen ick henen tooch, ende na by Damascum quam, ontrent den middach, omscheen my haestelijc een groot licht vanden Hemel.

7

Ende ick viel ter Aerden, ende hoorde een stemme, die sprack tot my: Saul, Saul, wat veruolcht ghy my?

8

Ende ick antwoorde: Heere, wie zijt ghi? Ende hy sprack tot my: Ick ben Iesus van Nazareth, dien ghy veruolcht.

9

^* Ende die met my waren, saghen dat licht ende verschrickten, maer de stemme des gheens, die met my sprack, en hoorden sy niet.

* Dan. 10.b.7. Acto. 9.a.7.

10

Ende ick sprack: Heere, wat sal ick doen? De Heere sprac tot my: Staet op, ende gaet in Damascon, daer salmen v segghen van allen dat v te doen geordineert is,

11

Ende als ick vander claerheyt des lichts niet sien en conde, werdt ick byder hant gheleyt, van dien, die met my waren ende quam tot Damascon.

12

⁺ Ende daer was een Godtureesende Man nader Wet,^* Ananias, die een goet gerucht hadde by allen Ioden, die aldaer woonden,

+ B vers 12

* Acto. 9.c.17.

13

Die quam tot my, ende tradt by my, ende hy sprack tot my: Saul lieue Broeder, siet op. Ende ick sach hem aen ter seluer vren.

14

Ende hy sprack: Godt onser Vaderen heeft v gheordineert, dat ghy zijnen wille bekennen sout, ende sien den Rechtueerdigen, ende hooren de stemme wt zijnen mont,

15

Want ghy sult zijn getuyge zijn tot allen menschen, dies dat ghy gesien ende gehoort hebt.

16

Ende nv, wat vertoeft ghy? Staet op, ende laet v doopen, ende af wasschen dijne sonden^* ende roept aen den Naem des Heeren.

* Rom. 10.b.13.

17

^† Ende het geschiedde doen ick weder tot Ierusalem quam, ende badt inden Tempel, dat ick ontruct wert,

† Acto. 9.d.26

18

Ende sach hem. Doen sprack hy tot my:^* Haest v, ende maect v snellijc van Ierusalem wt, want sy en sullen dijn getuychnis van my niet aennemen.

* Mat. 10.b.14 Acto. 9.d.29.

19

Ende ick sprack: Heere, sy weten seluer dat ick geuangen leyde, ende gheesselde de ghenen, die aen v gheloofden, inde Scholen hier ende daer.

20

^* Ende doen dat bloet Stephani dijns getuyges vergoten wert, stont ick oock daer by, ende hadde een welbehaghen aen zijnen doot, ende verwaerde dien de cleederen, die hem doodden.

* Actor. 7.g.58. 8.a.1.

21

Ende hy sprack tot my.^* Gaet henen, want ick wil v verre onder de Heydenen seynden.

* Acto. 13.a.2. Gala. 1.c.16. Ephe. 3.a.8.

22

⁺ Sy hoorden hem aen tot op dit woort, ende hieuen haer stemme op, ende spraken:^‡ Wech met sulcken vander Aerden, want het en is niet behoorlijck dat hy leuen sal.

+ C vers 22

‡ Luce. 23.b.18 Acto. 21.e.36.

23

Ende doen si riepen, ende haer cleederen af worpen, ende dat stof inde locht worpen,

24

Hiet hem de Hooftman inden Leger leyden, ende seyde, datmen hem geesselen ende^† ondersoecken soude, op dat hy wiste, om welcker oorsaeck wille, sy also ouer hem riepen.

† Verhooren

25

Als hy hem met Riemen aenbant, sprac Paulus tot den Onderhooftman, die daer by stont:^* Ist oock recht by v, eenen Roomschen mensche sonder Ordeel ende recht te geesselen?

* Ioan. 18.e.23.

26

Doen dat de Onderhooftman hoorde, ginck hy henen tot den Ouerhooftman, ende vercondichde hem ende sprac: Wat wilt ghy maken? Dese mensche is Romeynsch.

27

Doen quam de Ouerhooftman tot hem, ende sprack tot hem: Segt my, zijt ghy Romeynsch? Ende hy sprack: Ia.

28

Ende de Ouerhooftman antwoorde: Ick heb dit borgerrecht met eender grooter sommen vercregen. Ende Paulus sprack: Ende ick ben ooc Romeynsch geboren.

29

Doen traden terstont van hem af, die hem ondersoecken souden. Ende de Ouerste Hooftman vreesde, doen hy vernam, dat hy Romeynsch was, ende hy hem ghebonden hadde.

30

Des anderen daechs wilde hy sekerlijck weten, waerom hy verclaecht werde vanden Ioden, ende ontloste hem vanden banden, ende hiet de hooghe Priesters, ende haren gantschen Raet comen: Ende bracht Paulum voort, ende settede hem onder haer.