Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ De toecoemst Pauli in Tyrum ende in Cesariam, ende hoe Paulus soo minlijck ontfanghen wert in Ierusalem vanden Christen, ende hoe de Ioden sochten hem te dooden, ende vanden seluen gheuanghen wert.

1

⁺ ALst nv gheschiedde, dat wy van haer ghekeert, henen voeren, quamen wy stracks loops tot Co, ende des anderen daechs tot Rodis,

+ A vers 1

2

Ende van daer tot Patara. Ende als wy een Schip vonden, dat in Phenicien voer, traden wy daer in, ende voeren henen.

3

Ende als wy Cyperen int ghesicht creghen, lieten wy haer ter slincker hant, ende scheepten in Syrean, ende quamen aen tot Tyro. Want aldaer soude dat Schip de Waer neder legghen.

4

Ende als wy Iongheren vonden, bleuen wy aldaer seuen daghen:^† Die seyden Paulo door den gheest, hy en soude niet op trecken na Ierusalem.

† Acto. 20.b.16.c.23. 21.b.10.

5

Ende het gheschiedde

[p. 59r]

doen wy de daghen toeghebracht hadden, toghen wy wt, ende wandelden. Ende sy gheleyden ons alle met Wijuen ende kinderen, tot buyten voor de Stadt, ende^* knielden neder aenden Oeuer, ende baden.

* Actor. 20.e.36.

6

Ende als wy ons onder malcanderen goeden nacht ghegeuen hadden traden wy int Schip, ende sy keerden haer weder totten haren.

7

Ende wy volbrachten de Schipuaert, van Tyro, ende quamen tot Ptolomaida, ende groetten de Broeders, ende bleuen eenen dach by haer.

8

⁺ Des anderen daechs toghen wy wt, wy die by Paulo waren, ende quamen tot Cesarien, ende ghinghen in dat huys^† Philippi des Euangelisten, die een vanden seuen was, ende bleuen by hem:

+ B vers 8

† Acto. 6.a.5. 8.a.5.

9

Die selue hadde vier dochters, die Maechden waren,^* ende propheteerden.

* Ioel. 2.f.28.

10

Ende als wy daer meer daghen bleuen, reysde een Propheet af van Iudea, met name^† Agabus, ende quam tot ons:

† Acto. 11.c.28.

11

Die nam den gordel Pauli, ende bandt zijn handen ende voeten, ende sprack:^‡ Dat seyt de heylighe Gheest, dien Man dies dat gordel is, sullen de Ioden alsoo^* binden te Ierusalem, ende ouerleueren inder Heydenen handen.

‡ Actor. 21.a.4.

* Ioan. 21.d.18. Acto. 21.e.33.

12

Ende als wy sulcx hoorden, baden wy hem, ende die vander seluer plaetsen waren, dat hy niet op nae Ierusalem en toghe.

13

Ende Paulus antwoorde: Wat maeckt ghy, dat ghy weenet, ende breect my mijn herte?^* Want ick ben bereyt, niet alleen my te laten binden, maer oock te steruen te Ierusalem, om des Naems wille des Heeren Iesu.

* Acto. 20.c.24.

14

Ende doen hy hem niet en liet ghesegghen, swegen sy, ende spraken:^‡ De wille des Heeren gheschie.

‡ Matt. 6.b.10. Luce. 11.a.2. 22.c.42.

15

Ende nae den seluen daghen, maeckten wy ons ledich, ende toghen op nae Ierusalem.

16

Ende daer quamen oock met ons sommighe Iongheren van Cesarien, ende brachten ons toe eenen van Cypren, met name Mnason, die een out Iongher was, by welcken wy herberghen souden.

17

Doen wy nv tot Ierusalem quamen, namen ons de Broeders gheerne aen.

18

Ende des anderen daechs ginck Paulus met ons in tot^† Iacobo, ende de Outsten quamen daer alle.

† Actor. 12.c.17. 15.b.13.

19

Ende als hy haer ghegroet hadde, vertelde hy een na den anderen, wat Godt ghedaen hadde onder den Heydenen door zijn Ampt.

20

⁺ Doen sy dat hoorden, loefden sy den Heere, ende spraken tot hem: Broeder, ghy siet, hoe veel duysent Ioden datter zijn, die gheloouich gheworden zijn, ende zijn alle ijueraers ouer de Wet.

+ C vers 20

21

Ende sy zijn bericht teghen v, dat ghy leert van Mose afuallen, allen Ioden die onder den Heydenen zijn, ende segt: Sy en souden haer kinderen niet besnijden, oock niet nae des seluen wijse wandelen.

22

Wat ist dan nv? De ghemeynte moet gheheelijck te samen comen. Want het sal haer voorcomen, dat ghy ghecomen zijt.

23

Soo doet nv dat, dat wy v segghen. Wy hebben vier Mannen, die hebben^* een ghelofte op haer, die selue neemt tot v, ende laet v reynighen met haer, ende waecht de cost aen haer, dat sy haer hooft bescheren:

* Nu. 6.b.18. Acto. 18.b.18.

24

Ende alle verstaen, dattet niet en sy, dies sy teghen v bericht zijn, maer dat ghy oock wandelt, ende hout de Wet.

25

^† Want den geloouigen wt den Heydenen, hebben wy gheschreuen, ende besloten, dat sy dier gheen houden en sullen, dan alleen haer bewaren voor den^‡ Afgoden Offer, voor bloet, ende voor verstickten, ende voor hoererie.

† Actor. 15.d.23.

‡ Exod. 20.a.3. 1.Ioan. 5.d.20

26

^* Doen nam Paulus de Mannen tot hem, ende liet hem des anderen daechs met haer reynighen, ende ghinck inden Tempel, ende liet hem sien,^† hoe dat hy wt hielde de daghen der reyninghe, tot dat voor eenen yeghelijcken van haer dat Offer gheoffert wert.

* Act. 24.b.6.

† Nume. 6.c.13. Acto. 24.b.18

27

⁺ Als nv de seuen daghen souden voleynt worden, saghen hem de Ioden wt Asia inden Tempel, ende beroerden dat gantsche volck, sloegen de handen aen hem, ende riepen:

+ D vers 27

28

Ghy Mannen van Israel, helpt, Dit is de mensche, die alle menschen, aen allen eynden leert, teghen dit volck, teghen de Wet, ende teghen dese plaetse. Oock heeft hy daer toe, de Griecken inden Tempel gheleyt, ende dese heylighe stede ghemeyn ghemaeckt.

29

Want sy hadden,^* Trophinum den Epheser, met hem ghesien inder stadt: Den seluen meynden sy, Paulus hadde hem inden Tempel gheleyt.

* Acto. 20.a.4. 2.Tim. 4.c.20

30

Ende de gantsche stadt wert beweecht, ende daer wert een toeloop des volcx. Ende sy grepen Paulum, ende toghen hem ten Tempel wt, ende terstont werden de dueren toeghesloten.

31

Ende doen sy hem dooden wouden, quam dat gheroep op voor den Ouersten Hooftman der Schare, dat dat gantsche Ierusalem in roere ware.

32

Die nam van stonden aen de Crijchsknechten, ende Hooftlieden tot hem, ende liep henen onder haer.⁺ Doen sy nv den Hooftman ende de Crijchsknechten saghen, hielden sy op Paulum te slaen.

+ E vers 32

33

Ende als de Hooftman naerder by quam, nam hy hem aen,^* ende hiet hem binden met twee ketenen, ende vraechde: Wie hy ware, ende wat hy gedaen hadde?

* Acto. 21.b.11.

34

Ende de eene riep dit, de ander dat inden volcke. Ende doen hy niet sekers vernemen en conde, om des Rumoers willen, beual hy hem inden Leger te leyden.

35

Ende als hy aen de trappen quam, moesten hem de Crijchsknechten draghen, om des gewelts wille des volcx.

36

Want daer volchde veel volcx na, ende riepen:^† Wech met hem.

† Luce. 23.b.18. Actor. 22.c.22.

37

Als Paulus nv inden Leger ingeleyt wert, sprack hy totten Hooftman: Mach ick met v spreken? Hy seyde. Cont ghy Griecx?

38

En zijt ghy niet de Egiptenaer, die voor dese daghen, een oproer ghemaect hebt, ende leyddet wt inder Woestijnen vier duysent heymelike Moordenaers?

39

Paulus sprack: Ick ben een Iootsch Man van^† Tarsen, een Borger eender vernaemder stadt in Cilicia. Ick bid v, orloft my te spreken totten volcke:

† Actor. 9.b.11. 22.a.3.

[p. 59v]

40

Ende als hy hem oorlof ghaf, tradt Paulus op de trappen^* ende wenckte den volcke met der handt. Doender nv een groote stilheyt werdt, sprack hy opt Hebreeus tot haer, ende seyde:

* Actor. 12.c.17. 13.b.16.