Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Hoe dat Paulus voort reysde na den wech van Ierusalem door vreemde plaetsen, prekende dat Euangelium. Hoe hy eenen Ionghelinck die wt de venster gheuallen was, ghenas. Hy beueelt de Ouders der ghemeynten dat sy de cudde Christi bewaren souden voor valsche leere.

1

⁺ DOen nv de Oploop opghehouden hadde, riep Paulus de Iongheren tot hem, ende seyde haer goeden nacht,^* ende ghinck wt, om in Macedonian te reysen.

+ A vers 1

* 2.Tim. 1.a.3.

2

Ende doen hy de selue Landen doortooch, ende haer met veel woorden vermaent hadde, quam hy in Griecken lant,

3

Ende vertoefde daer drie maenden. Ende doen hem de Ioden laghen leyden, als hy in Syrian woude varen, werdt hy des sins, weder om te keeren door Macedonian.

4

Ende daer toghen met hem tot in Asiam, Sopater van Berrhoen: Ende van Thessalonica^† Aristarchus ende Secundus, ende Gaius van Derben, ende Timotheus: Ende wt Asia Tychicus, ende^‡ Trophimus.

† Acto. 19.d.29.

‡ Acto. 21.d.29. 1.Tim. 4.c.20

5

Dese ginghen voor henen, ende wachten ons te Troada.

6

Maer wy scheepten na de Pasche dagen van Philippen tot op den vijften dach, ende quamen tot haer te Troada, ende hadden daer onse

[p. 58v]

wesen seuen daghen.

7

⁺ Ende op eenen Sabbath, doen de Iongheren te samen quamen om dat broodt te breken, predicte haer Paulus, ende woude des anderen daechs wt reysen, ende vertooch dat woort totter middernacht toe.

+ B vers 7

8

Ende daer waren veel fackelen op den Solder, daer sy vergadert waren.

9

Ende daer sat een Iongelinck met name Eutychus, in een venster, ende sanc in eenen diepen slaep, dewijle dat Paulus sprack, ende wert van den slaep ouerweghen, ende viel neder vanden derden Solder, ende wert doot op ghenomen.

10

^* Ende Paulus ginck af, ende viel op hem, omuinck hem, ende sprack: En maect geen ghetier, want zijn siel is in hem.

* 3.Reg. 17.c.19 4.Regum. 4.d.34.

11

Doen ginck hy opwaerts,^† ende brack dat broot, ende beet aen, ende sprack veel met haer, tot dat de dach op ghinck, ende alsoo tooch hy wech.

† Acto. 2.e.46. 1.Cor. 11.b.16.

12

Ende sy brochten den Ionghelinck leuendich, ende werden niet een weynich ghetroost.

13

Wy toghen voor henen op den schepe, ende voeren na Asson, ende wouden aldaer Paulum tot ons nemen, want hy haddet also beuolen, ende hy woude te voet gaen,

14

Als hy tot ons quam tot Asson, namen wy hem tot ons, ende quamen tot Mitylenen,

15

Ende van daer scheepten wy, ende quamen des anderen daechs teghen Chion. Ende des daechs daer nae stieten wy aen Samon, ende bleuen in Trogilion. Ende des naesten daechs quamen wy tot Miletum:

16

Want Paulus hadde besloten voorby Epheso te scheepen, dat hy in Asai gheen tijt en dorste toe brenghen.^* Want hy haeste hem, op den Pinxter dach te Ierusalem te zijn, waert dattet hem moghelijck ware.

* Acto. 21.a.4.

17

⁺ Van Mileto seynde hy na Epheso, ende liet roepen de Outsten van der ghemeynte.

+ C vers 17

18

Ende als die tot hem quamen, sprack hy tot haer: Ghy weet, van den eersten dach aen,^† doen ick in Asiam ben ghecomen, hoe ick altijd by v ben gheweest,

† Acto. 19.a.10.

19

Ende den Heere ghedient, met alder ootmoedicheyt, ende met veel tranen ende aenuechtinghen, die my ouercomen zijn, vanden Ioden, die my lagen leyden,

20

Dat ick v niet onthouden en hebbe, dat daer nuttelijck is, dat ick v niet vercondicht en hadde, ende v openbaerlijck, ende sonderlijck gheleert,

21

Ende hebbe betuycht beyde den Ioden ende Griecken,^‡ die boete tot Gode ende den ghelooue aen onsen Heere Iesum.

‡ Leuit. 24.d.46.

22

Ende nv siet, Ick inden gheest ghebonden, vaer henen nae Ierusalem, en weet niet wat my aldaer ghemoeten sal,

23

Dan dat de heylighe gheest, in allen steden betuycht, ende spreect:^* Banden ende droeffenissen verwachten mijns aldaer.

* Actor. 21.a.4.b.11.

24

Maer ick en achte dier gheen, Ick en houde oock mijn leuen selue niet dierbaer, op dat ick volbrenghe mijnen loop met vruechden,^† ende dat Ampt dat ick ontfanghen hebbe vanden Heere Iesu, om te betuyghen dat Euangelium vander genade Gods.

† Galat. 1.a.1. Titum. 1.a.3.

25

Ende nv siet, ick wetet, dat ghy mijn aensicht niet meer sien en sult, alle die, door welcke ick getoghen ben, ende ghepredict hebbe dat Rijcke Gods.

26

⁺ Daerom betuyghe ick v op desen dach van heden^* dat ick reyn ben van aller bloet,

+ D vers 26

* 2.Reg. 3.f.26. Ezech. 33.b.9. Susan. f.46.

27

^† Want ick en heb v niet onthouden, dat ick niet vercondicht en hadde, alle den Raet Godts.

† 1.Cor. 1.a.6.

28

Soo hebt nv acht op v seluen, ende op de gantsche Cudde, onder welcke v de heylige gheest gheset heeft tot Bisschoppen, om te weyden de ghemeynte Gods,^‡ welcke hy door zijn eyghen bloet verworuen heeft.

‡ Ephe. 1.b.7. Coloss. 1.b.14

29

^* Want dat weet ick, dat nae mijnen afscheydt sullen onder v comen grouwelijcke Woluen, die de Cudde niet sparen en sullen.

* 1.tim. 4.a.1. 2.Petri. 2.a.1.

30

^† Oock wt v seluen sullen opstaen Mannen, die daer verkeerde leeringhen spreecken, om de Iongheren aen haer te trecken.

† Psal. 41.b.10. Ioan. 13.c.18. 1.Ioan. 2.c.19.

31

Daerom zijt wacker, ende denct daer aen, dat ick niet afghelaten en hebbe drie Iaer lanck, dach ende nacht eenen yeghelijcken met tranen te vermanen.

32

⁺ Ende nv lieue Broeders, ick beueel v Gode, ende den woorde zijnder ghenaden, die daer machtich is v te stichten, ende te gheuen de erffenisse onder allen die gheheylicht worden.

+ E vers 32

33

^‡ Ick en heb uwer gheender siluer, noch gout, noch cleedt begheert.

‡ 1.Cor. 9.b.12. 2.Cor. 11.b.11. 12.b.13.

34

Want^* ghy weet seluer, dat my dese handen tot mijnder nootdruft, ende der geender die met my gheweest zijn, ghedient hebben.

* Gen. 3.d.17. Acto. 18.a.3. 1.Tess. 2.b.9. 2.Tessa. 3.a.8.

35

Ick hebt v altemael ghetoont, datmen alsoo arbeyden moet, ende de swacken aennemen, ende ghedencken aen dat woordt des Heeren Iesu, dat hy gheseyt heeft:^† Gheuen is saligher, dan nemen.

† Eccli. 4.c.39.

36

Ende als hy sulcx gheseyt hadde,^‡ knielde hy neder, ende badt met haer allen.

‡ Actor. 21.a.5.

37

Ende daer werdt veel weenens onder haer allen, ende vielen Paulo om den hals, ende custen hem,

38

Aldermeest bedroeft om dat woort, dat hy seyde, sy en souden zijn aensicht niet meer sien, ende gheleydden hem in dat Schip.