Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Hoe Paulus in Corinthen predicte ende vander beroerten, ende van de toecoemst in Ephesien, ende van Apollo wt Alexandrie.

1

⁺ DAer na schiedt Paulus van Athenen, ende quam tot Corinthen,

+ A vers 1

2

Ende vant eenen Iode met name^* Aquila, gheboren wt Ponto, welcke was nieuwelijck wt Italien ghecomen, met zijn wijf Priscilla, Daer om dat de Keyser Claudius gheboden hadde, allen Ioden te wijcken wt Romen: Tot den seluen ghinc hy in.

* Rom. 16.a.3. 2.Ti. 4.c.19.

3

Ende dewijle dat hy ghelijcx hantwercks was, bleef hy by haer, ende arbeydde. (Sy waren des hantwercks Tapeetmakers)

[p. 57v]

4

Ende hy leerde in der schole op alle Sabbathen, ende onderwees beyde Ioden ende Griecken.

5

Doen^* Silas ende Timotheus wt Macedonien quamen, drang Paulum de gheest, den Ioden te betuygen Iesum, dat hy Christ sy.

* Acto. 17.c.15.

6

Maer doen sy daer tegen seyden ende lasterden,^† schudde hy zijn cleederen wt, ende sprac tot haer: Vwe bloet sy ouer uwe hooft. Ick ga van nv aen reyn totten Heydenen.

† Mat. 10.b.14 Marc. 6.b.11. Luce. 10.a.11. Acto. 13.c.51.

7

Ende maecte hem van daer, ende quam in een huys eens met name Iust, die Godtureesende was, ende des seluen huys, was aldernaest byder schole.

8

^* Crispus de ouerste vander scholen, geloofde aen den Heere, met zijnen gantsen huyse. Ende veel Corintheren, die toe hoorden, werden geloouich, ende lieten haer doopen.

* 1.Cor. 1.b.13.

9

De^† Heere sprack door een ghesicht inder nacht tot Paulo: En vreest v niet, maer spreect, ende en swijcht niet.

† Actor. 16.b.9. 23.b.11.

10

Want ick ben met v, ende niemandt en sal hem onderwinden v te schaden, want ick heb een groot volck in deser stadt.

11

Ende hy bleef daer een Iaer ende ses Maenden, ende leerde haer dat woordt Gods.

12

⁺ Doen nv Gallion Lantvoocht was in Achaia, verhieuen haer de Ioden eendrachtelijc tegen Paulum, ende leydden hem voor den Richtstoel, ende spraken:

+ B vers 12

13

Dese becout de lieden Godt te dienen tegen de Wet.

14

Ende doen Paulus den mont op woude doen, sprac Gallion tot den Ioden:^‡ Waert dattet een ghewelt oft schalcheyt waer, lieue Ioden, so hoorde ick v billick:

‡ Acto. 25.c.11.

15

Maer dewijle het een vrage is van der leere ende vanden woorden, ende van der wet onder v, so siet ghy selue toe, ick en denck daer geen Richter ouer te zijn.

16

Ende dreefse van den Richter stoel.

17

Doen grepen alle Griecken^* Sosthenem den ouersten der scholen, ende sloegen hem voor den Richtstoel, Ende Gallion en nam hem dies niet aen.

* 1.Corin. 1.a.1.

18

Ende Paulus bleef noch lange aldaer daer na maeckte hy zijn afscheyt met den broederen, ende woude in Syrien schepen, ende met hem Priscilla ende Aquila. Ende hi beschoer zijn hooft tot Kenchrea^† want hy hadde een ghelofte,

† Num. 6.b.18. Acto. 21.c.23.

19

Ende quam af tot Ephesum, ende liet haer aldaer. Ende hy ginc in der scholen, ende sprack met den Ioden.

20

⁺ Ende sy baden hem, dat hi langer tijt by haer bleue. Ende hy en verwillichdet niet,

+ C vers 20

21

Maer maecte zijn afscheyt met haer, ende sprac: Ic moet bouen alle dinck, dat toecomende Feest te Ierusalem houden^* wilt Godt, so wil ick weder tot v comen. Ende voer wech van Epheso,

* Heb. 6.a.4. Iaco. 4.b.15.

22

Ende quam tot Cesareen, ende ginc op, ende gruete de ghemeynte, ende tooch af na Antiochian,

23

Ende vertoefde daer eenen tijt lanck. Ende reysde wt, ende doorwandelde na een ander, dat Galaetsche lant ende Phrygiam, ende stercte alle Iongheren.

24

Ende daer quam tot Epheso een Iode met name^† Apollo, geboren van Alexandria, een welsprekende man, ende machtich inder Schrift:

† 1.Cor. 1.b.11. 3.a.4. 16.b.12.

25

Dese was onderwesen in den wech des Heeren, ende sprac met eenen vyerighen gheest, ende leerde met neersticheyt van den Heere, ende wist alleen van Iohannis doopsel,

26

Dese begost vrijelijck te predicken in der scholen. Ende doen hem Aquila ende Priscilla hoorden, namen sy hem tot haer, ende leyden hem den wech Godts noch neerstelijcker wt.

27

Ende doen hy woude in Achaia reysen, schreuen de broederen, ende vermaenden de Iongeren, dat sy hem aennamen.

28

Ende als hy daer gecomen was halp hy veel, dien, die gheloouich waren gheworden, door de ghenade. Want hy ouerwan de Ioden stantuastelijck^* ende bewees openlijck door de Schrift, dat Iesus, de Christ sy.

* Ioan. 5.d. 39.