Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Hoe Paulus met Timotheo predicte in Macedonia in der stadt Philippi, Hoe Phitenissa van hem verlost wert van den Duyuel, hoe hy daerom ghegheesselt wert, ende inden kercker gheworpen, ende weder verlost wert.

1

⁺ ENde hy quam tot Derben ende Lystran. Ende siet, aldaer was een Iongher met name Timotheus, eener Iootscher vrouwen sone,^† die was gheloouich, maer zijn Vader was een Grieck.

+ A vers 1

† Vrouwe.

2

Die hadde een goet gherucht by den broederen, onder den Lystranen, ende tot Iconion.

3

Desen woude Paulus met hem laten reysen, ende nam,^* ende besneet hem, om der Ioden wille, die in die selue plaetse waren: Want sy wisten alle, dat zijn vader een Grieck was gheweest.

* 1.Cor. 9.c.20. Galat. 2.a.3.

4

Ende als sy door de stede togen, gauen sy haer ouer,^† te houden de Reden, welcke vanden Apostelen ende Outsten te Ierusalem besloten was.

† Actor. 15.d.20.

5

Doen werden de ghemeynten in den gelooue beuesticht, ende namen dagelijcx toe in den getale.

6

Ende doen sy door Phrygian, ende dat lant Galatia toghen,^‡ wert haer belet van den Heylighen Geest, te spreken dat woort in Asia.

‡ Roma. 1.b.13.

7

Ende als sy quamen aen Mysian, versochten sy door Bithyniam te reysen, ende de gheest en lietet haer niet toe.

8

⁺ Ende doen sy voorby Mysian toghen, quamen sy af tot Troada.

+ B vers 8

[p. 56v]

9

Ende^* Paulo verscheen een ghesicht by der nacht, datter een man van Macedonien was, die stont ende badt hem, ende sprack: Coemt neder in Macedonian, ende helpt ons.

* Actor. 18.a.9. 23.b.11.

10

Ende als hi dat ghesicht ghesien hadde, doen sochten wy van stonden aen te reysen in^† Macedonian, versekert, dat ons de Heere derwaerts gheroepen hadde, om haer dat Euangelium te predicken.

† Acto. 20.a.1.

11

Doen voeren wy wt van Troada, ende stracx loops quamen wy tot Samothracian, des anderen daechs tot Neapolim,

12

Ende van daer tot Philippis, welck is de Hooftstadt des lants Macedonia, ende een vrije stadt. Ende wy hadden in deser stadt onse wesen sommighe daghen.

13

Op den dach der Sabbathen, ghingen wy wt voor de stadt aen dat water, daermen plach te bidden, ende setteden ons, ende spraken tot de vrouwen, die daer te samen quamen.

14

Ende een Godtureesende vrouwe met name Lydia een purpur kramerin wt der stadt der Thyatirers, hoorde toe:^* Dier dede de Heere dat herte open, dat si daer acht op hadde, wat van Paulo ghesproken werdt.

* Ioan. 6.e.44

15

Ende als sy ende haer huys ghedoopt wert, vermaende sy ons ende sprack: Ist dat ghy my daer voor houdet, dat ick gheloouich ben aen den Heere, so coemt in mijn huys, ende blijft daer.^+* Ende sy dwanck ons.

+ C vers 15

* Gene. 19.a.2. Luce. 14.c.23. 24.c.28.

16

Ende het gheschiedde, doen wy tot den ghebede ginghen, dat een Maghet ons ontmoette,^† die had eenen waersegghende gheest, ende dede haren heeren veel ghewins met waersegghen:

† 1.Re. 28.b.7

17

Die selue volchde Paulo ende ons ouer al na, riep, ende sprack:^‡ Dese menschen zijn knechten Gods des Alderhoochsten, die v den wech der salicheyt vercondighen.

‡ Mar. 5.a.7. Luce. 8.d.28.

18

Sulcx dede sy menighen dach. Maer dat dede Paulo wee, ende keerde hem om, ende sprack tot den gheest: Ick gebiede v inden Name Iesu Christi, dat ghy van haer wt vaert.^* Ende hy voer wt ter seluer vren.

* Mar. 16.c.17.

19

^† Ende doen haer heeren saghen, dat de hope haers ghewins wtgheuaren was, namen sy Paulum ende Silan, toghense op de merckt voor de Ouersten,

† 1.The. 2.a.2.

20

Ende leydense tot den Hooftlieden, ende spraken:^† Dese menschen verwerren onse stadt, ende zijn Ioden,

† Actor. 17.b.6.

21

Ende vercondighen een wijse, welck ons niet en betaemt aen te nemen, noch te doen, dewijle dat wy Romeynen zijn.

22

Ende dat volck wert beroert teghen haer, ende de Hooftlieden lieten haer de cleederen aftrecken,^† ende hietense gheesselen.

† 2.Cor. 11.c.27.

23

⁺ Ende doen sy haer wel ghegheesselt hadden, worpen syse inde gheuanckenis, ende gheboden den stockmeester, dat hy haer wel bewaerde.

+ D vers 23

24

Die nam soodanighen ghebot aen, ende wierpse in de binnenste gheuanckenis, ende leyde haer voeten in den stock.

25

^* Ende ontrent der middernacht, baden Paulus ende Silas, ende loefden Godt. Ende de gheuanghenen hoorden haer.

* Actor. 4.d.31.

26

^† Ende terstont werdt daer een groote Aertbeuinghe, also, dat de fundamenten der gheuanckenissen haer beweechden. Ende van stonden aen werden alle dueren op ghedaen, ende aller banden los.

† Acto. 5.c.19. 12.b.7.

27

Als nv de stockmeester wt den slaep ontspranc, ende sach de dueren der gheuanckenis op ghedaen, track hy dat sweert wt, ende woude hem seluen dooden: Want hy meynde, de gheuanghen waren ontloopen.

28

Maer Paulus riep luyde, ende sprack: En doet v niet quaets, want wy zijn noch alle hier.

29

Hy eyschte een licht, ende spranc daer in, ende wert beuende, ende viel Paulo ende Sila te voeten,

30

Ende leydese wt, ende sprack:^* Lieue heeren, wat sal ick doen, dat ick salich worde?

* Actor. 2.d.37. 9.a.6. Luce. 3.c.10. Ioan. 6.f.47

31

Sy spraken:^* Gheloeft aen den Heere Iesum, soo wort ghy ende dijn huys salich.

* mar. 16.b.16

32

Ende seyden hem dat woordt des Heeren, ende allen, die in zijn huys waren.

33

⁺ Ende hy namse tot hem inder seluer vre des nachts, ende wiesch haer de stramen af. Ende hy liet hem doopen, ende alle de zijne terstont.

+ E vers 33

34

^‡ Ende leydese in zijn huys, ende settede haer een tafel voor, ende verhuechde hem met zijnen gantsen huyse, dat hy aen Godt gheloouich gheworden was.

‡ Luce. 5.d.29. 19.a.6.

35

Ende doent dach werdt, seynden de Hooftlieden, de stadt dienaers henen, ende spraken: Laet dese menschen gaen.

36

Ende de stockmeester, vercondichde dese Reden Paulo: De Hooftlieden hebben hier ghesonden, dat ghy los sult zijn. Nv trect wt, ende gaet henen met vrede.

37

Maer Paulus sprack tot hem: Sy hebben ons sonder recht ende ordeel openbaerlijck ghegheesselt, wy die nochtans Romeynen zijn, ende inde gheuanckenis gheworpen, ende souden ons nv heymelijck wtstooten? Niet alsoo, Maer laetse selue comen, ende ons wt leyden.

38

De stadt dienaers vercondichden dese woorden den Hooftlieden. Ende sy vreesden haer, doen sy hoorden, dat sy Romeynen waren,

39

Ende quamen, ende vermaendense, ende leydense wt,^* ende badense dat sy wt der stadt toghen.

* Mat. 8.d.34. Mar. 5.b.17. Luce. 8.d.37.

40

Doen ginghen sy wt der gheuanckenis, ende ghinghen tot Lydia. Ende doen sy de broeders ghesien hadden, ende ghetroost, toghen sy wt.