Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Vander afscheydinghe die gemaect wert in Iconien, Ende vanden Cruepele die van Paulo ghesont gemaect wert, Ende hoe dat sy Paulum ende Barnabam aenbidden wouden, Ende hoe sy Paulum wouden steenen, ende hoe hy van daer track.

1

⁺ HEt gheschiedde tot Iconion, dat sy te samen quamen, ende predicten in der Ioden schole, alsoo, dat een groote menichte der Ioden, ende der Griecken gheloouich werdt.

+ A vers 1

2

Maer de ongheloouighe Ioden ver-

[p. 55v]

wecten en beweechden de sielen der Heydenen, tot toorne, teghen de broederen.

3

So hadden sy nv haer wesen aldaer een langhe tijt, ende leerden vrij in den Heere, die den woorde zijnder ghenade ghetuychenisse gaf, ende liet teeckenen^* ende wonderheden gheschien door haer handen.

* Mar. 16.c.17.d.20. Acto. 19.b.11. Heb. 2.a.4.

4

Ende de menichte der stadt deylde haer: Sommighe hieldent met den Ioden, ende sommighe met den Apostelen.

5

Doen nv eenen storm op stont, der Heydenen ende der Ioden, ende haerder Ouersten, om haer smaetheyt aen te doen, ende te steenighen,

6

Werden sy des ghewaer,^† ende ontuloden in de steden des lants Lycaonia, na Lystran ende Derben, ende in de Contreye daer rontom, ende predickten aldaer dat Euangelium.

† Mat. 10.c.23. 8.a.1.

7

^+‡ Ende daer was een man te Lystra, die moest sitten: Want hy had quade voeten, ende was cruepel van moeder lijf, die noch noyt gewandelt en hadde, dese hoorde Paulum spreken.

+ B vers 7

‡ Acto. 3.a.2.

8

Ende als hy hem aensach, ende mercte, dat hy geloofde, hem mochte geholpen worden,

9

Sprac hy met luyder stemmen: Staet recht op, op dijne voeten.^† Ende hy sprang op, ende wandelde.

† Esai. 35.a.6.

10

Ende doen dat volck sach, wat Paulus ghedaen hadde, hieuen sy haer stemme op, ende spraken op Lycaonisch^‡ De goden zijn den menschen gelijc gheworden, ende tot ons hier neder ghecomen.

‡ Acto. 28.a.7.

11

Ende hieten Barnabam Iuppiter, ende Paulum Mercurius, nademael hy dat woort voerde.

12

Ende Iuppiters Priester die voor haerder stadt was, bracht Ossen ende crantsen voor de poorte, ende woude offeren met den volcke.

13

⁺ Doen dat de Apostelen Barnabas ende Paulus hoorden, schuerden sy haer cleederen, ende spronghen onder dat volck, riepen, ende spraken:

+ C vers 13

14

Ghy Mannen,^† wat maect ghy daer? Wy zijn oock sterflijcke menschen gelijc als ghy, ende predicken v dat Euangelion, dat ghy v bekeeren sult, van desen valschen, tot den leuenden Godt,^† die gemaect heeft Hemel ende Aerde, ende de See, ende al wat daer in is.

† Acto. 10.c.26. Apo. 19.b.10. 22.b.9.

† Genesi. 1.a.1. Psa. 146.a.6 Acto. 17.d.24 Apo. 14.b.7.

15

Die in voorleden tijden heeft alle Heydenen laten wandelen haer eyghen wegen.

16

^* Ende hy en heeft hemseluen, tis waer, niet onbetuycht gelaten, heeft ons veel goets ghedaen, ende van den Hemel regen ende vruchtbare tijden ghegeuen, onse herten veruult, met spijse ende vrolijckheyt.

* Rom. 1.b.19.

17

Ende doen sy dat seyden en stilden si dat volck nauwelijck, dat sy haer niet en offerden.

18

Ende daer quamen Ioden toe, van Antiochien ende Iconien, ende becouten dat volc,^* ende steenichden Paulum, ende sleypten hem ter stadt wt, meynende, hy ware ghestoruen.

* 2.Cor. 11.c.25.

19

⁺ Maer doen hem de Iongheren omcingelden, stont hy op, ende ghinck in de stadt. Ende op den anderen dach ghinc hy wt met Barnaba na Derben,

+ D vers 19

20

Ende predickten der seluer stadt dat Euangelium, ende onderwesen haerder veel. Ende togen weder na Lystran ende Iconion, ende Antiochien,

21

^‡ Stercten de sielen der Iongeren, ende vermaenden haer, dat sy in den ghelooue bleuen,

‡ Acto. 11.c.23. 13.c.43. Luc. 24.d.25. 1.Tim. 3.b.12.

22

Ende dat wy door veel droeffenisse moeten in dat Rijcke Gods gaen.

23

Ende vercoren hen hier ende daer Outsten in de Ghemeynten, baden ende vasten, ende beualen haer den Heere, aen dien si gheloouich gheworden waren.

24

Ende toghen door Pisidian, ende quamen in Pamphilian,

25

Ende spraken dat woort te Perghen ende toghen af na Attalian,

26

^* Ende van daer scheepten sy na Antiochien, van waer sy verordineert waren door de ghenade Gods, tot den wercke, dat sy hadden volbracht.

* Actor. 13.a.2.

27

Ende doen sy daer quamen, vergaderden sy de ghemeynte, ende vercondichden, hoe veel Godt met haer ghedaen hadde, ende hoe hy den Heydenen hadde de duere des gheloofs op ghedaen.

28

Ende sy hadden aldaer haer wesen, niet een cleyne tijt by den Iongheren.