Den Bibel, Inhoudende dat Oude ende Nieuwe Testament (Biestkensbijbel)

¶ Dat .xi. Capittel.

¶ Hoe dat de Ioden keuen tegen Petrum, om dat hy hem keerde tot de onbesneden, ende hoe de Discipulen verspreyt worden om te prediken den Heydenen, ende hoe van Agabus vercondicht wert den dieren tijt.

[p. 54r]

1

⁺ ENde het quam voor de Apostelen ende broederen, die inden Iootschen Lande waren, dat oock de Heydenen hadden Gods woort aenghenomen.

+ A vers 1

2

Ende doen Petrus op quam tot Ierusalem, twisten met hem, die wt der besnijdinghe waren, ende spraken:

3

^* Ghy zijt inghegaen tot den Mannen, die de voorhuyt hebben, ende hebt met haer ghegheten.

* Exod. 23.d.32. 34.b.15. Deute. 7.a.2. Ioan. 18.e.28.

4

Ende Petrus hief aen, ende verteldet haer na malcanderen, ende sprack:

5

Ick^* was inder stadt Ioppe inden ghebede, ende was ontruckt, ende sach een ghesicht, Namelijck, een Vat neder dalen, als een groot lijnden Laken, met vier hoecken, ende neder ghelaten vanden Hemel, ende quam tot my toe.

* Acto. 10.a.9.

6

Daer sach ick in, ende werdt ghewaer, ende sach vieruoetighe dieren der Aerden, ende wilde dieren, ende Wormen, ende Voghelen des Hemels.

7

Ende ick hoorde een stemme, die sprack tot my: Staet op Petre, slaet doot ende eet.

8

Maer ick sprac: O neen, Heere,^‡ want daer en is noch noyt yet ghemeyns oft onreyns in mijnen mont ghecomen.

‡ Leuit. 11.a.2. Deu. 14.a.4.

9

Maer de stemme antwoorde my ten anderen mael vanden Hemel: Wat Godt ghereynicht heeft, maect ghy dat niet gemeyn.

10

Ende dat gheschiedde driemael ende het wert altemael weder op nae den Hemel ghetoghen.

11

Ende siet, van stonden aen, stonden drie mannen voor dat huys daer ick in was, ghesonden van Cesarien tot my.

12

^‡ Ende de geest sprac tot my: Ick soude met haer henen gaen, ende niet twijfelen.^* Ende daer quamen met my dese ses broederen, ende wy ginghen in des mans huys.

‡ Actor. 10.c.19. 15.b.7.

* Acto. 10.c.23

13

⁺ Ende hy vercondichde ons, hoe hy gesien hadde eenen Engel in zijn huys staen, die tot hem ghesproken hadde: Seynt mannen henen na Ioppen ende laet roepen Simon, met den toename Petrum,

+ B vers 13

14

Die sal v woorden segghen, daer door ghy salich wordet, ende dijn gantsche huys.

15

Ende doen ick begost te spreken,^* viel de heylige geest op haer, gelijck als op ons int yerste begin.

* Acto. 2.a.3. 19 a.6.

16

Doen dacht ick op dat woordt des Heeren, als hy seyde:^† Iohannes heeft met water ghedoopt, maer ghy sult met den heylighen gheest ghedoopt worden.

† Esaie. 44.a.3 Ioel. 2.g.28. Mat. 3.c.11. Mar. 1.a.8. Luce. 3.c.16. Actor. 1.a.5. 2.a.4. 19.a.4

17

^‡ Heeft haer nv Godt gelijcke gaue ghegeuen, als oock ons, die daer gheloouen aenden Heere Iesum Christum: Wie was ick, dat ick Gode conde weeren?

‡ Act. 15.b.9.

18

Doen sy dat hoorden, sweghen sy stille, ende loefden Godt ende spraken: So heeft Godt oock den Heydenen boete gegeuen tot den leuen.

19

^* Ende die verstroyt waren inder droeffenisse die haer ouer Stephano verhief, ghingen alom, tot Phenicien ende Cyperen, ende Antiochien, ende en spraken dat woort tot niemanden, dan alleen tot den Ioden.

* Acto. 8.a.1.

20

Ende daer waren sommighe onder haer, Mannen van Cyperen ende Cyrenen, die quamen tot Antiochien, ende spraken oock tot den Griecken, ende predickten dat Euangelium vanden Heere Iesu,

21

^† Ende de handt des Heeren was met haer. Ende een groot ghetal werdt gheloouich, ende bekeerden haer tot den Heere.

† Acto. 2.g.47. 5.c.14.

22

⁺ Dese Reden van haer, quam voor de ooren der ghemeynte te Ierusalem. Ende sy seynden Barnabam wt, dat hy henen ghinghe tot Antiochien toe.

+ C vers 22

23

Welcke, doen hy daer gecomen was, ende sach de genade Gods, werdt hy vrolijck,^* ende vermaende haer alle, dat sy met vaster herten byden Heere wouden blijuen.

* Acto. 13.e.43. 14.d.21.

24

Want hy was een vroom man, vol des heylighen gheests ende gheloofs. Ende een groot volck, wert den Heere toeghedaen.

25

Ende Barnabas tooch wt nae Tarsen,^† om Saulum weder te soecken.

† Acto. 9.d.27.

26

Ende doen hy hem vant, leydde hy hem na Antiochien. Ende sy bleuen byder Ghemeynte een gantsch Iaer, ende leerden veel volcx: Daer af werden de Iongheren ten alder yersten tot Antiochien Christen gheheeten.

27

Inden seluen dagen quamen Propheten van Ierusalem tot Antiochien.

28

Ende een van haer met name^* Agabus, stont op, ende bediedde door den gheest eenen grooten dieren tijt, die daer comen soude ouer den gantschen Rinck der Aerden, welcke gheschiedde, onder den Keyser Claudio.

* Acto. 21.b.10.

29

^* Ende onder de Iongheren besloot een yeghelijc, daer na als hy vermochte, te seynden een hantreyckinghe den Broederen, die in Iudea woonden.

* Rom. 15.d.26 1.Cor. 16.a.1. 2.Cor. 8.a.4. 9.a.1.

30

Als sy oock deden,^† ende schicktent tot den Outsten, door de hant Barnabe ende Sauli.

† Acot. 12.d.25