Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Van de miraculoose bekeeringhe Pauli, hoe dat hi by Ananias quam, ende liet hem doopen, hoe hy Christum preecte, ende veruolch daerom leet, ende van twee miraculen Petri.

1

⁺ SAulus blies noch^* met dreygen ende moorden teghen de Iongheren des Heeren. Ende ghinck tot den hooghen Priester, ende badt hem om brieuen nae Damascum aen de Scholen,

+ A vers 1

* Actor. 8.a.3. 22.a.4. 26 b.9 1.Cor. 15.a.9. Galat. 1.b.13. 1.Tim. 1.b.13.

2

Op dat, waert dat hy eenighe deses weechs vonde, Mannen ende Vrouwen, hyse ghebonden brachte nae Ierusalem.

3

^† Ende doen hy op de reyse was, ende naby Damascum quam,^‡ omscheen hem onuersiens een licht vanden Hemel,

† Acto. 22.b.6.

‡ Act. 26.b.12. 1.Cor. 15.a.8. 2.Cor. 12.a.1.

4

Ende hy viel op de Aerde, ende hoorde een stemme, die sprack tot hem: Saul, Saul,^† wat veruolcht ghy my?

† 4.Re. 19.d.21 Sacha. 2.b.8. Mat. 25.d.41

5

Ende hy sprack: Heere, wie zijt ghy? De Heere sprack: Ic ben Iesus, dien ghy veruolcht. Het sal v swaer worden^* tegen den prickel achter wt te slaen.

* Act. 5.e.40.

6

Ende hy sprack met beuen ende versaghen:^‡ Heere, wat wilt ghy dat ic doen sal? De Heere sprac tot hem: Staet op, ende gaet inder stadt, daer salmen v segghen, wat ghy doen moet.

‡ Acto. 2.d.37. 16.d.30. Luce. 3.b.10.

7

Ende de Mannen, die zijn wandelbroeders waren, stonden ende waren verschrickt. Wandt si hoorden zijn stemme,^† ende en saghen niemanden.

† Dani. 10.b.7.

8

⁺ Ende Saulus richtede hem op vander Aerden, ende als hy zijn ooghen op dede,^* en sach hy niemandt. Ende si namen hem byder handt, ende leyden hem henen na Damascum.

+ B vers 8

* Acto. 22.b.11.

9

Ende was drie daghen niet siende, ende en adt niet, ende en dranck niet.

10

Ende daer was een Iongher te Damasco, met name Ananias, tot dien sprac de Heere inden ghesichte: Anania. Ende hy sprack: Hier ben ick Heere.

11

De Heere sprack tot hem: Staet op, ende gaet henen, inde straet die daer heet, de Rechte, ende vraecht inden huyse Iuda nae Saulo, met namen^‡ van Tarsen, wandt siet, hy bidt.

‡ Actor. 21.e.39. 22.a.3.

12

Ende heeft ghesien inden ghesichte eenen man, met namen Ananias, tot hem incomen, ende de handt op hem legghen, dat hy weder siende worde.

13

Maer Ananias antwoorde:^* Heere, ick heb van velen ghehoort, van desen Man,^† hoe veel quaets, hy dijnen heylighen ghedaen heeft te Ierusalem.

* Exod. 4.c.10. Ierem. 1.a.6.

† Actor. 8.a.1. 9.a.1. 1.Cor. 15.a.9. Galat. 1.c.13. 1.Tim. 1.c.13.

14

Ende hy heeft al hier macht vanden hooghen Priesters, te binden alle die uwen Naem aenroepen.

15

De Heere sprack tot hem: Gaet henen,^‡ wandt dese is my een wtuercoren wercghetuych, dat hy mijnen Naem draghe, voor den Heydenen, ende voor den Coninghen, ende voor den kinderen van Israel.

‡ Actor. 13.a.2. 22.d.21. Roma. 1.a.1. Galat. 1.c.15. 2.b.8. Ephesi. 3.b.8. 1.Tim. 2.b.7. 2.Tim. 1.c.11.

16

Ick^* wil hem toonen hoe veel hy moet lijden om mijns Naems wille.

* Acto. 21.b.11 2.Cor. 11.c.25.

17

^+† Ende Ananias ghinc henen, ende quam in dat huys, ende leyde de handen op hem, ende sprac: Lieue broeder Saul, de Heere heeft my ghesonden, die v verschenen

+ C vers 17

† Acto. 22.b.12

[p. 53r]

is op den wech, daer ghy door quaemt, dat ghy weder siende, ende met den heylighen gheest veruult wort.

18

Ende terstont vielt van zijn ooghen ghelijck als Vischschellen, ende wert weder siende. Ende stont op, liet hem doopen,

19

Ende nam spijse tot hem, ende sterckte hem. Ende Saulus was sommighe daghen by den Iongheren tot Damasco.

20

Ende terstont predicte hy Christum inde Scholen, dat die selue Gods Sone sy.

21

Ende sy ontsetteden haer alle diet hoorden, ende spraken: En is dat niet die, die te Ierusalem verstoorde, alle die desen Naem aenroepen? Ende daerom herwaerts ghecomen, dat hyse ghebonden brenghe tot den hoogen Priesteren?

22

Maer Paulus wert meer ende meer crachtiger, ende dreef de Ioden in, die tot Damasco woonden, ende beweest dat dese de Christ is.

23

⁺ Ende na veel daghen hielden de Ioden eenen Raedt te samen, dat sy hem doodden.

+ D vers 23

24

Maer het wert Saulo te kennen ghegheuen, dat sy lagen op hem leyden.^* Ende sy wachteden dach ende nacht voor de Poorten, dat sy hem doodden.

* 2.Cor. 11.d.34

25

^† Doen namen hem de Iongheren by nacht, ende deden hem door de muer, ende lieten hem in een mande af.

† Iosue. 2.c.15. 1.Reg. 19.c.12

26

^‡ Doen nv Saulus te Ierusalem quam, versocht hy hem byden Iongeren te maken, ende sy ontsaghen haer alle voor hem, en geloofden niet dat hy een Ionger ware.

‡ Actor. 22.c.17

27

^* Maer Barnabas nam hem tot hem, ende leyde hem tot den Apostelen, ende vertelde haer, hoe hy op den wech, den Heere ghesien, ende met hem ghesproken, ende hoe hy te Damascon den Naem Iesu, vrij ghepredict hadde.

* Actor. 11.d.25.

28

Ende hy was by haer, ende ghinck wt ende in te Ierusalem, ende predickte den Naem des Heeren Iesu vrij.

29

Hy sprack oock, ende beuraechde hem met den Griecken. Maer sy leyden op hem toe, dat sy hem doodden:

30

Doen dat de Broeders ghewaer werden, gheleyden sy hem na Cesarien, ende schicten hem na Tarsen.

31

So hadde nv de ghemeynte vrede door gantsch Iudea ende Galilea, ende Samaria, ende wert ghesticht,^* ende wandelde inde vreese des Heeren, ende wert veruult met troost des heylighen Geests.

* Psal. 2.b.11.

32

⁺ Het gheschiedde, doen Petrus ouer al door tooch, dat hy oock tot den Heylighen quam, die tot Lydda woonden.

+ E vers 32

33

Aldaer vandt hy eenen man, met name Eneas, acht Iaer lanck te bedde gheleghen, die was gichtich.

34

Ende Petrus sprack tot hem: Enea, Iesus Christus make v ghesont, staet op, ende verbeddet v seluen.^† Ende terstont stont hy op.

† Mat. 9.a.7. Mar. 2.a.12. Luce. 5.c.25. Ioan. 5.a.9.

35

Ende hem saghen, alle die tot Lydda, ende te Sarona woonden, die bekeerden haer tot den Heere.

36

Ende tot Ioppe was een Iongherin, met name Tabitha, welck verduytst wert een Ree: Die was vol goeder wercken ende aelmissen die sy dede.

37

Het gheschiedde op die selue tijt, dat sy sieck wert, ende sterf. Doen wieschen sy de selue, ende leydense op den^† Sael.

† Solder.

38

Dewijle nv Lydda naby Ioppen is, doen de Iongheren hoorden, dat Petrus aldaer was, seynden si tot hem, ende vermaenden hem, dat hy hem dies niet en liet verdrieten, tot haer te comen.

39

⁺ Ende Petrus stont op, ende quam met haer. Ende als hy daer ghecomen was, brachten sy hem op den Sael, ende alle Weduwen traden rontsom hem, weenden, ende toonden hem de Rocken ende cleederen, welcke Ree maeckte, dewijle dat sy by haer was.

+ F vers 39

40

Ende Petrus, doen hyse al wt hadde ghedreuen, knielde hy neder, badt, ende keerde hem tot den lichaem, ende sprack: Tabitha, staet op.^* Ende sy dede haer ooghen op. Ende doen sy Petrum sach, settede sy haer weder.

* Matt. 9.c.25. Marc. 5.e.42 Luce. 7.b.15. 8.f.55. Ioan. 11.e.44.

41

Ende hy ghaf haer de hant, ende richtedese op, ende riep de Heylighen ende de Weduwen, ende leuerdese daer leuendich ouer.

42

Ende het wert condich door gansch Ioppen. Ende veel werden gheloouich aenden Heere.

43

Ende het gheschiedde dat hy langhe tijt tot Ioppe bleef, by eenen Simon, die een Leertouwer was.