Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Van de begrauinge Stephani, ende van de prekinge Philippi, die hy dede in Samarien, in Ethiophia, daer door datter veel geloouich ende ghedoopt werden, ende hoe de heylighe gheest gesonden wert onder de Heydenen, ende de berispinghe van Simon Magus. Hoe Philippus byden ghesneden quam.

1

⁺ SAulus hadde een welbehaghen aen sinen doot. Ende daer verhief haer tot dier tijt een groote veruolginghe onder de ghemeynte te Ierusalem.^* Ende si verstroyden haer alle, inde Landen Iudee, ende Samarie, behaluen de Apostelen.

+ A vers 1

* Matt. 10.c.23.

2

Ende Godtvreesende mannen, beschicten Stephanum,^† ende droeghen grooten rouwe ouer hem.

† Genes. 23.a.2. 50.b.10.

3

^‡ Ende Saulus verstoorde de ghemeynte, ghinc hier ende daer inde huysen, ende tooch voort Mannen ende Vrouwen, ende leuerdese ouer inde gheuanckenis.

‡ Acto. 9.a.1. 22.a.4. 26.b 9 1.Cor. 15.a.9. Galat. 1.b.13.

4

^* Die nv verstroyt waren, ghinghen rontsom, ende predickten dat woordt.

* Acto. 11.b.19

5

Ende Philippus quam af in een stadt in Samaria, ende predickte haer van Christo.

6

Ende dat volck hoorde eendrachtelijck ende vlijtichlijck toe, wat Philippus seyde, ende saghen de Teekenen, die hy dede.

7

^† Want de onreyne gheesten voeren wt van veel besetenen met groot ghecrijsch. Oock werden veel gichtighen ende Cruepelen ghesont ghemaect. Ende daer werdt een groote blijschap inder seluer stadt.

† Mar. 16.c.17. Acto. 5.b.16. 16.d.18. 19 b.12

8

Maer daer was te voren inde selue Stadt een Man, met name Simon, die bedreef^‡ Toouerie, ende betoouerde dat Samarische volck, ende gaf voor, hy ware wat groots.

‡ Actor. 13.a.6.

9

Ende si saghen alle op hem, beyde cleyn ende groot, ende spraken: Dese is de cracht Gods, die daer groot is.

10

Ende si saghen daerom op hem, dat hy haer langhe tijt met zijnder Toouerien betoouert hadde.

11

⁺ Maer doen sy Philippus prediken gheloofden, vanden Rijcke Godts, ende vanden Naem Iesu Christi, lieten haer doopen beyde Mannen ende Vrouwen.

+ B vers 11

12

Doen wert oock die Simon gheloouich, ende liet hem doopen, ende hinck Philippo aen. Ende als hy sach de daden ende Teeckenen die daer geschieden, verwonderde hy hem.

13

Doen de Apostelen hoorden te Ierusalem, dat Samaria dat woort Gods aenghenomen hadde, seynden si tot haer Petrum ende Iohannem.

14

Welcke doen si af quamen, baden si ouer haer, dat si den heylighen gheest ontfinghen.

15

Wandt hy en was noch op niemanden gheuallen, maer waren alleen ghedoopt inden Naem Christi Iesu.

16

^* Doen leyden si de handen op haer, ende si ontfinghen den heyligen Gheest.

* Actor. 6.b.6. 13.a.3. 19.a.6. 1.Timo. 4.b.14. 5.c.22. 2.Tim. 1.b.6.

17

Maer doen Simon sach, dat de heylighe Gheest ghegheuen werdt, wanneer eenen de Apostelen de handen op leyden, boot hy haer ghelt,

18

Ende sprack: Gheeft my oock die macht, dat, ist dat ick yemandt de handen oplegghe, die selue oock den heylighen gheest ontfanghe.

19

Maer Petrus sprac tot hem: Dat ghy verdoemt wordet met uwe ghelt, dat ghi meynt,^† Godts gaue worde door ghelt

† Marc. 10.a.8.

[p. 52v]

vercreghen,

20

Ghy en sult noch deel noch aenual hebben aen desen woorde: Want uwe herte en is niet oprecht voor Gode.

21

Daerom doet boete voor dese uwe boosheyt, ende bidt Godt, oft v vergeuen mocht worden de schalcheyt dijns herten.

22

Want ick sie, dat ghy zijt vol^* bitter galle, ende beknoopt met ongherechticheyt.

* Deut. 29.c.18.

23

⁺ Doen antwoorde Simon ende sprack:^† Bidt ghy den Heere voor my, op dat dier gheen ouer my en come, daer ghy af gheseyt hebt.

+ C vers 23

† Num. 21.b.7.

24

Ende si, doen si betuycht ende ghesproken hadden dat woort des Heeren, keerden si wederom na Ierusalem, ende predicten dat Euangelium velen Samaritaenschen Vlecken.

25

De Enghel des Heeren sprack tot Philippum, ende seyde: Staet op, ende gaet teghent Suyden, op de Straet, die van Ierusalem af gaet nae Gaza, die daer woest is.

26

Ende hy stont op, ende ghinck henen. Ende siet, een Man wt Moorlant, een Camerlinck ende geweldighe der Coninghinne Candaces in Moorlandt, welcke was ouer alle haer Schatcameren,^* die was ghecomen te Ierusalem, om aen te bidden.

* 3.Reg. 8.f.38.

27

Ende tooch weder nae huys, ende sat op sinen Waghen, ende las den Propheet Isaiam.

28

Ende de gheest sprack tot Philippo: Gaet daer henen toe, ende maeckt v by desen Waghen.

29

Doen liep Philippus daer henen toe, ende hoorde, dat hy den Propheet Isaiam las, ende sprack: Verstaet ghy oock wat ghy leest?

30

⁺ Ende hy sprack: Hoe can ick, als my niet yemandt aen en leydet? Ende vermaende Philippum, dat hy op trade, ende settede hem by hem.

+ D vers 30

31

Ende het inhoudt der Schrift die hy las, was dese:^* Hy is als een Scaep ter slachtinghe gheleydt, ende stille als een Lam voor sinen Scheerder, also en heeft hy sinen mont niet opghedaen.

* Esaie. 53.b.7.

32

In zijnder nederheydt, is zijn oordeel verheuen. Ende wie sal zijns leuens lengde wtspreken? Wandt zijn leuen is vander Aerden wech ghenomen.

33

Doen antwoorde de Camerlinck Philippo, ende sprack: Ick bid v, van wien spreeckt de Propheet sulcx? Van hemseluen, oft van yemant anders?

34

^‡ Ende Philippus dede sinen mondt op, ende begost van deser Schrift aen, ende predicte hem dat Euangelium van Iesu.

‡ Luc. 24.c.45

35

Ende als si der straten henen togen, quamen si aen een water. Ende de Camerlinck sprac:^† Siet, daer is water, wat hindert het, dat ic my laet doopen?

† Acto. 10.e.47

36

Philippus sprack: Ghelooft ghy van gantschen herten, so macht wel gheschieden. Hy antwoorde ende sprack: Ick gelooue, dat Iesus Christus, Godts Soon is.

37

Ende hy hiet den Waghen houden, ende daelden af in dat water, beyde Philippus ende de Camerlinck, ende hy doopte hem.

38

Ende doen si opclommen wt den water, ruckte de gheest des Heeren Philippum wech. Ende de Camerlinck en sach hem niet meer: Maer hy reysde vrolijck zijnder straten.

39

Ende Philippus wert gheuonden tot Asdod, ende wandelde rontsom, ende predickte allen steden dat Euangelium, tot dat hy quam tot^† Cesarien.

† Actor. 21.b.8.