Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hoe datter seuen Diaken gecoren worden vanden Apostolen, wt welcken Stephanus gheaccuseert werdt voor de Ioden, ende hoe si zijn aensicht sagen als een Enghels aensicht.

1

⁺ IN dien daghen, doen der Iongheren veel werden, verhief haer een mommelinghe onder den Griecken, teghen de Hebreen, daerom, dat haer weduwen versuymt werden inder daghelijckscher handtreyckinghe.

+ A vers 1

2

Doen riepen de twelue, de menichte der Iongeren te samen, ende spraken:^* Het en dooch niet, dat wy dat woort Gods achter laten, ende ter Tafelen dienen.

* Exod. 18.c.19.

3

^† Daerom, ghi lieue broederen, siet onder v na seuen mannen, die een goet gheruchte hebben, ende vol des heylighen gheest ende wijsheyt zijn, welcke wy bestellen moghen, tot deser nootdruft.

† Deut. 1.c.9. Actor. 1.d.21. 16.a.2. 1.Tim. 3.b.8.

4

Maer wy en willen niet af laten vanden ghebede, ende van dat Ampt des woorts Gods.

5

Ende die redene beuiel den gantschen hoope wel. Ende vercoren Stephanum, eenen man vol gheloofs, ende des heylighen gheestes, ende^‡ Philippum, ende Prochorum, ende Nicanor, ende Timon, ende Parmenam, ende^* Nicolaum den Iodeghenoote van Antiochia.

‡ Actor. 8.a.5. 21.b.8.

* Apoc. 2.a.6.

6

Dese stelden si voor de Apostelen, ende baden,^† ende leyden de handen op haer.

† Num. 27.d.23 Actor. 1.d.23. 1.tim. 4.b.14 5.b.22. 2.Tim. 1.a.6.

7

Ende dat woort Gods nam toe, ende dat ghetal der Iongheren wert seer groot te Ierusalem. Daer werden oock veel Priesters den ghelooue ghehoorsaem.

8

Stephanus vol des gheloofs ende crachts, dede wonderen ende groote teekenen onder den volcke.

9

⁺ Doen stonden sommige op vander schole, die daer heet der Libertinen, ende der Cyrenen, ende der Alexandrinen, ende der gheenre, die van Cilicia ende Asia waren, ende beuraechden haer met Stephano.

+ B vers 9

10

^* Ende si en vermochten niet te wederstaen der wijsheydt ende den gheest, wt welcken hy leerde.

* Exod. 4.c.12. Esaie. 34.c.17 Luce. 21.b.14

11

Doen maecten si sommige^‡ mannen wt, die spraken: Wy hebben hem hooren lasterwoorden spreken, teghen Mosen ende teghen Godt.

‡ mat. 26.f.58. Mar. 14.f.55

12

Ende beweechden dat volck, ende de Outsten, ende de Schriftgheleerden: Ende traden toe, ende ruckten hem wech, ende leyden hem voor den Raet.

13

^† Ende brachten valsche ghetuyghen voor, die spraken: Dese mensche en hout niet op te spreken lasterwoorden, teghen dese heylighe stede ende de Wet.

† 3.Reg. 21.b.10

14

Wandt wy hebben hem hooren segghen: Iesus van Nazareth, sal dese stede verdestrueren, ende veranderen de Seden, die ons Moses ghegheuen heeft.

15

Ende si saghen op hem, alle die inden Raet saten, ende saghen zijn aensicht, als eens Enghels aensicht.