Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Hier sterft Ananias om bedroch vanden prijs des Ackers met Saphira zijnder huysvrouwen, ende de crancken werden ghesont ghemaeckt vanden Apostelen, ende vanden Ioden worden si berispt, welc Gamaliel gheexcuseert hadde. Hoe de Apostelen ghegheesselt werden, ende vrolijc vanden Raet gingen, om dat si weerdich waren om sinen Naem te lijden.

1

⁺ MAer een man met name Ananias, tsamen met zijn wijf Sapphira, vercocht sine goeden,

+ A vers 1

2

Ende ontrack wat vanden gelde, met medeweten zijns wijfs, ende bracht het eens deels, ende leydet tot der Apostelen voeten.

3

Maer Petrus sprack: Anania, waerom heeft de Sathan dijn hert veruult, dat ghy den heyligen gheest voorloocht, ende onthout wat vanden gelde des Ackers?

4

Ghy hadt hem doch wel mogen behouden, doen ghy hem hadt. Ende doen hy vercocht was, wast oock in dijner macht. Waerom hebt ghy dan sulcks in uwer herten voorghenomen?^* Ghy en hebt niet den Menschen, maer Gode voorgheloghen.

* 1.Tess. 4.b.8.

5

Doen Ananias dese woorden hoorde, viel hy neder, ende gaf den gheest op. Ende daer quam een groote vreese ouer alle die dit hoorden.

6

Ende de Ionghelinghen stonden op, ende namen hem wech, ende droeghen hem wt, ende begroeuen hem.

7

⁺ Ende het geuiel ouer een wijle, by drie vren, quam zijn wijf daer in, ende en wist niet watter gheschiet was.

+ B vers 7

8

Maer Petrus antwoorde haer: Segt my, hebt ghy den Acker soo diere vercocht? Sy sprack: Ia, so diere.

9

Petrus sprack tot haer: Waerom zijt ghy dan eens gheworden te tempteren den gheest des Heeren? Siet, de voeten der gheenre, die uwen Man begrauen hebben, zijn voor de duere, ende sullen v wtdraghen. Ende terstont viel si neder tot sine voeten, ende gaf den geest op.

10

Doen quamen de Ionghelinghen, ende vondense doot, droeghense wt, ende begroeuense by haren Man.

11

Ende daer quam een groote vreese, ouer de gantsce gemeynte, ende ouer alle die sulcx hoorden.

12

^* Daer geschiedden veel teekenen, ende wonderheden inden volcke, door der Apostelen handen. Ende waren alle eendrachtelijc^† inden voorhuyse Salomonis.

* Mat. 16.c.17. Acto. 2.e.43.

† 3.Reg. 6.a.3. Ioan. 10.c.23. Acto. 3.b.11.

13

Niemant van den anderen dorst hem tot haer maken, maer dat volck hielt veel van haer:

14

^‡ Ende daer werdender meer ende meer toe gedaen, die daer gheloofden aen den Heere, eenen hoop der Mannen ende Vrouwen,

‡ Acto. 2.e.47.

15

Alsoo,^* dat si de crancken op de straten wt droegen, ende leydense op bedden, ende baren, op dat, wanneer Petrus quame, dat zijn schaduwe haerder sommighe ouerschaduwede.

* Mat. 4.c.24. 8.b.16. 15.c.30

16

Daer quamender oock veel toe, vanden omliggenden steden tot Ierusalem, ende brachten de crancken, ende die van onreynen geesten ghepijnicht waren,^† ende werden alle gesont.

† Matt. 8.b.16. Acto. 8.a.7.

17

^+‡ Maer de hooge Priester stont op, ende alle die met hem waren (welck is de secte der Saduceen) ende werden vol ijuers,

+ C vers 17

‡ Acto. 4.a.1.

18

Ende sloeghen de handen aen de Apostelen, ende worpense in de ghemeyne gheuanckenis.

19

Maer^* de Enghel des Heeren, dede inder nacht de duere der gheuanckenis op, ende leydde haer daer wt, ende sprack:

* Acto. 12.b.7. 16.d.26.

20

Gaet henen, ende treedt op, ende spreeckt inden Tempel tot den volcke, alle woorden deses leuens.

21

Doen si dat ghehoort hadden, ginghen si vroech inden Tempel, ende leerden.

22

Ende de hooghe Priester quam, ende die met hem waren, ende riepen te samen den Raet, ende alle Outsten der kinderen van Israel, ende seynden henen in de gheuanckenis, om haer te halen.

23

Ende de Dienaers quamen daer henen, ende en vonden haer niet inder geuanckenis, quamen weder, ende vercondichdent, ende spraken:

24

De geuanckenis vonden wy met alder neersticheyt toe gesloten, ende de Wachters daer buyten staen voor der dueren, mer doen wyse op deden, en vonden wy niemandt daer in.

25

Doen dese Reden hoorden de hooge Priester, ende de Hooftman des Tempels, ende de andere hooghe Priesters, werden si ouer haer verbijstert, wat doch daer wt worden woude.

26

⁺ Doen quam daer een, die vercondichde haer: Siet, de mannen, die ghy in der geuanckenisse geworpen hebt, zijn inden Tempel, staen ende leeren dat volck.

+ D vers 26

27

Doen ginc de Hooftman met den dienaers henen, ende haeldense, niet met gewelt,

28

^* Wandt si vreesden haer voor dat volc, dat si mochten gesteenicht worden.

* Mat. 21.c.26.

[p. 51r]

Ende als si haer brachten, stelden syse voor den Raet. Ende de hooge Priester vraechde haer, ende sprack:

29

^* Hebben wy v niet met ernst gheboden, dat ghy in desen Naem niet en soudet leeren? Ende siet, ghy hebt Ierusalem veruult met uwer leere, ende wilt deses menschen^† bloet ouer ons brenghen.

* Acto. 4.b.18.

† Mat. 27.c.25.

30

Maer Petrus antwoorde, ende de Apostelen, ende spraken:^* Men moet Gode meer ghehoorsaem zijn, dan den menschen.

* Tobie. 2.b.8. Acto. 4.b.19.

31

De Godt onser vaderen heeft Iesum verwect,^† den welcken ghy ghedoot hebt,

† Actor. 2.d.23.

32

Ende aen dat hout ghehanghen,^‡ dien heeft Godt door zijn rechter hant verhoocht, tot eenen Vorst ende Heylant, om te geuen Israel boete ende vergheuinghe der sonden.

‡ Acto. 3.b.15. Philip. 2.a.9.

33

^‡ Ende wy zijn zijn ghetuygen ouer dese woorden, ende de heylighe Gheest, den welcken Godt ghegeuen heeft, den genen, die hem ghehoorsaem zijn.

‡ Ioan. 15.c.26. Actor. 1.a.8.

34

Doen si dat hoorden, ghinct haer door het herte, ende dachten haer te dooden.

35

⁺ Maer daer stont op inden Raet een Phariseus met name^* Gamaliel, een Schriftgheleerde, wel geacht by alle den volcke, ende hiet, men soude de Apostelen een weynich wt laten gaen,

+ E vers 35

* Actor. 22.a.3.

36

Ende sprack tot haer: Ghy mannen van Israel, neemt v seluen waer, aen dese menschen, wat ghy doen sult.

37

^‡ Voor dese dagen stont Theudas op, ende gaf voor, hy ware wat. Ende een ghetal der Mannen ontrent vier hondert, hinghen hem aen, die is verslagen, ende alle die hem by vielen, zijn verstroyt, ende te niet geworden.

‡ Acto. 21.e.38.

38

Daer na stont Iudas wt^† Galilea op, in den dagen der schattinghen, ende maecte veel volcx afuallich na hem, ende die is ooc vergaen, ende alle die hem by vielen, zijn verstroyt.

† Luce. 13.a.1.

39

Ende nv seg ick v, laet af van dese menschen, ende laetse varen.^* Is den Raet, oft dat werck vanden menschen, so salt onder gaen.

* Prou. 2.d.30. Malac. 1.a.4 Mat. 15.b.13. Ioan. 15.a.2.

40

Maer ist van God, so en condt ghijt niet dempen, op dat ghy niet gheuonden en wordet,^† die teghen Godt wilt strijden.

† Actor. 9.a.5. 23.b.9.

41

Doen vielen sy hem by.^‡ Ende riepen de Apostelen,^* gheesselden haer ende geboden haer, si en souden niet spreken inden Name Iesu, ende lietense gaen.

‡ Act. 4.b.14

* Mat. 23.c.33

42

Ende si ghinghen^† vrolijck van des Raets aengesicht, dat si weerdich gheweest waren, om zijns Naems wille versmaetheyt te lijden.

† Matth. 5.a.12

43

^* Ende en hielden niet op alle daghe inden Tempel, ende hier ende daer inden huysen te leeren, ende te predicken dat Euangelium van Iesu Christo.

* Esai. 40.b.9. 62.b.6.