Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hoe Petrus den cruepele ghenas, ende leerde den Ioden de glorificatie ende de verrijsinge Christi, op dat hem een yegelijc van zijnder boosheyt bekeere.

1

⁺ PEtrus ende Iohannes ghinghen met malcanderen op in den Tempel, ontrent der neghender vren, wanneermen plach te bidden.

+ A vers 1

2

^‡ Ende daer was een Man cruepel van moeder lijf, die liet hem draghen, ende si setteden hem dagelijcx voor des Tempels duere, die daer heet, de scoone, op dat hy bedelde^* de aelmissen van den ghenen, die inden Tempel ghinghen.

‡ Acto. 14.b.7.

* Deut. 15.a.4.

3

Doen hy nv Petrum ende Iohannem sach, dat si wouden ten Tempel ingaen, badt hy om een aelmisse.

4

Petrus sach hem aen met Iohanne, ende sprack: Siet ons aen.

5

Ende hy sach haer aen, verwachtede, dat hy wat van haer ontfinghe.

6

Maer Petrus sprack: Siluer ende gout en heb ick niet, maer wat ick hebbe, dat geue ick v:^† Inden Name Iesu Christi van Nazareth, staet op, ende wandelt.

† Acto. 4.a.10.

7

Ende greep hem by der rechter hant, ende richtede hem op. Terstont stonden zijn schinckelen ende enckelen vast,

8

Spranc op, conde gaen ende staen. Ende ghinc met haer in den Tempel, wandelde, ende spranck, ende loofde Godt,

9

⁺ Ende al dat volck sach hem wandelen, ende Godt louen.

+ B vers 9

10

Sy kenden hem oock, dat hijt was, die om de aelmissen gheseten hadde, voor de schoone duere des Tempels.^† Ende si werden vol verwonderens ende verschrickens, ouer dien, dat hem gheschiet was,

† Luce. 5.c.26.

11

Als dese cruepel, die nv gesont was, hem tot Petro ende Iohanne hielt, liep alle dat volc tot haer in dat^‡ voorhuys, dat daer heet Salomonis, ende verwonderden haer.

‡ 3.Reg. 6.a.3. Ioan. 10.c.23. Actor. 5.b.12.

12

Als Petrus dat sach, antwoordde hy den volcke: Ghy mannen van Israel, wat verwondert ghy v daer ouer? Oft wat siet ghy op ons, als oft wy desen wandelende hadden ghemaect, door onse eygen cracht oft verdienste?

13

^† De God Abrahams, ende Isaacs ende Iacobs, de God onser vaderen, heeft zijn kint Iesum verclaert, welcken ghy ouergheleuert ende versaect hebt, voor Pilato, doen die selue ordeelde hem los te laten.

† Exodi. 3.a.6. Acto. 5.d.31.

14

^* Maer ghy versaectet den Heyligen ende Rechtueerdighen, ende badet datmen v den Moordenaer gaue,

* Mat. 27.c.20. Mar. 15.a.11. Luce. 23.b.18.

15

Maer den Vorst des leuens hebt ghy ghedoot. Dien heeft Godt op gheweckt vanden dooden,^† dies zijn wy ghetuygen.

† Acto. 1.b.8. 2.d.32.

16

⁺ Ende door den gelooue aen sinen Name, heeft hy aen desen, dien ghi siet ende kent, sinen

+ C vers 16

[p. 50r]

Naem beuesticht, ende het gelooue door hem, heeft desen ghegheuen dese ghesontheydt voor uwen ooghen.

17

Nv lieue Broederen, ick weet het, dat ghijt door^* onwetenheyt ghedaen hebt, ghelijc ooc uwe Ouersten.

* Ioan. 16.a.3. 1.Cor. 2.a.8. 1.Tim. 1.b.13.

18

Maer Godt, die door den mont aller zijnder Propheten te voren vercondicht heeft,^‡ hoe Christus lijden soude, heeft het alsoo veruult.

‡ Lu. 24.d.24.

19

^† Soo doet nv boete, ende bekeert v, dat uwe sonden wtghedaen worden,

† Eccle. 17.c.29.

20

Op dat de tijt der verquickinghe come, voor het aensicht des Heeren, wanneer hy seynden sal, dien, die v nv te voren ghepredict wordt, Iesum Christum,

21

Die den Hemel moet innemen, tot op de tijt, wanneer weder gebracht worde, al wat Godt ghesproken heeft, door den mont aller zijnder heylighen Propheten, van der werelt aen.

22

⁺ Wandt Moses heeft gheseyt tot den vaderen:^† Eenen Propheet sal v de Heere uwe Godt verwecken, wt uwen Broederen, gelijc als my:^‡ Dien sult ghy hooren, in allen, dat hy tot v segghen sal.

+ D vers 22

† Deut. 18.c.15. 1.Macha. 14.g.41. Acto. 7.e.37.

‡ Mat. 17.a.5 Marc. 9.a.7. Luce. 9.d.35.

23

Ende het sal geschien, welcke siel, den seluen Propheet niet hooren en sal, die sal vernielt worden wt den volcke.

24

Ende alle Propheten van Samuel aen, ende daer na, soo veel als haerder ghesproken hebben, die hebben van desen dagen vercondicht.

25

Ghy zijt der Propheten ende des Verbonts kinderen, welck Godt ghemaect heeft met uwen vaderen, doen hy sprac tot Abraham:^† Door dijn Saet, sullen gheseghent worden, alle volcken op Aerden.

† Gene. 12.a.3. 21.a.12. 22.c.18 26.a.4. Eccl. 44.d.22 Galat. 3.b.8.

26

V ten eersten heeft Godt op ghewect zijn kint Iesum, ende heeft hem tot v ghesonden, om v te seghenen, dat een yeghelijck hem bekeere, van zijnder boosheyt.