Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Vande openbaringhe des Heeren, aen de See Tyberias, Van drierley vraghen Petri, ende van zijnder bekennisse, ende vanden getuyghenisse Iohannis, der dinghen die in desen Boeck beschreuen zijn.

1

⁺ DAer nae openbaerde hem Iesus weder, aen de See Tiberias. Ende hy openbaerde hem alsoo:

+ A vers 1

2

Daer was by malcanderen, Simon Petrus, ende Thomas die daer heet tweelinck, ende^* Nathanael van Cana Galilee,^† ende de sonen Sebedei, ende twee ander zijnder Iongeren.

* Ioan. 1.e.45.

† Mat. 4.c.21 Marc. 1.b.19.

3

Simon Petrus spreeckt tot haer: Ick wil gaen visschen. Sy spraken tot hem: Soo willen wy met v gaen. Sy ghinghen wt, ende traden terstont int schip. Ende in der seluer nacht en vinghen sy niet.

4

Maer doent nv morghen was, stont Iesus aen den Oeuer: Maer de Iongheren en wisten niet, dattet Iesus was.

5

Iesus spreeckt tot haer: Kinderen en hebt ghy niet te eten? Sy antwoorden hem: Neen.

6

Hy sprack tot haer:^* Werpt dat Net wt ter rechter hant des Schips, soo sult ghy vinden. Doen wierpen zijt wt, ende en condent niet meer trecken, van menichte der visschen.

* Luce. 5.a.4.

7

Doen seyde de Iongher,^† welcken Iesus lief hadde, tot Petro: Het is de Heere.⁺ Doen Simon Petrus hoorde, dattet de Heere was, gorde hy het Hemde om hem (wandt hy was naect) ende wierp hem in de See.

† Ioan. 13.c.23. 19 c.26. 20.c.20.

+ B vers 7

8

Maer de ander Iongheren quamen op den schepe, Wandt si en waren niet verre van lande, maer by twee hondert ellen, ende togen dat Net met den visschen.

9

Als si nv wt traden opt Lant, saghen si colen gheleyt, ende visch daer op, ende broot.

10

Iesus spreect tot haer:^* Brengt

* Luc. 24.d.40

[p. 48v]

herwaerts vanden visschen, die ghy nv gheuanghen hebt.

11

Simon Petrus steech daer in, ende tooch dat Net op het Lant, vol grooter visschen, hondert ende drienvijftich. Ende hoe wel haerder soo vele waren, nochtans en scuerde het Net niet.

12

⁺ Iesus spreect tot haer: Coemt, ende houdet maeltijt. Maer niemandt onder den Iongheren en dorste hem vraghen: Wie zijt ghy? Want si wisten, dattet de Heere was.

+ C vers 12

13

Doen coemt Iesus, ende neemt dat broot, ende gheeftet haer. Des seluen ghelijcken oock den visch.

14

^* Dat is nv het derdemael, dat Iesus zijnen Iongheren^† gheopenbaert is, na dien hy vanden dooden op ghestaen is.

* Ioan. 20.c.19.d.26.

† Luc. 24.d.35 Acto. 10.e.40

15

Doen si nv maeltijt ghehouden hadden, spreeckt Iesus tot Simon Petro: Simon Iohanna, hebt ghy my lieuer, dan my dese hebben? Hy sprack tot hem: Ia Heere, ghy weet, dat ick v lief hebbe. Hy spreect tot hem: Weyt mijn Lammeren.

16

Ende hy spreect ten anderen mael tot hem: Simon Iohanna, hebt ghy my lief? Hy spreeckt tot hem, Iae Heere, ghy weet, dat ick v lief heb. Hy spreeckt tot hem: Weyt mijn schapen.

17

Hy spreket ten derdenmael tot hem: Simon Iohanna, hebt ghy my lief? Petrus wert truerich, dat hy ten derden mael tot hem seyde, Hebt ghy my lief, ende sprac tot hem:^† Heere, ghy weet alle dinck, ghy weet, dat ick v lief heb. Iesus spreect tot hem: Weydt mijn Schapen.

† Ioan. 16.d.30

18

⁺ Voorwaer, voorwaer, ick seg v: Doen ghy iongher waert, gordet ghy v seluen, ende wandeldet waer ghy henen woudt:^* Maer wanneer ghy out wordet, sult ghy uwe handen wtreycken, ende een ander sal v gorden, ende leyden, waer ghi niet henen en wilt.

+ D vers 18

* Acto. 12.a.3. 2.Pet. 1.c.14.

19

Ende dit seyde hy, om te bedieden, met welcken doot hy Godt prijsen soude. Doen hy dat gheseyt hadde, Spreect hi tot hem: Volcht my na.

20

Ende Petrus keerde hem om, ende sach den Iongher volghen,^† welcken Iesus lief hadde,^* die ooc int Auonteten aen zijn borst gheleghen was, ende geseyt hadde: Heere, wie ist, die v verraet?

† Ioan. 13.c.23. 20.a.2. 21.a.7.

* Ioan. 13.c.25

21

Doen Petrus desen sach, spreect hy tot Iesu: Heere, wat sal dan dese?

22

Iesus spreect tot hem: Ist dat ick wil, dat hy blijue, tot dat ick come, wat gaet het v aen? Volcht ghi my nae.

23

Doen ghincker een sprake wt onder den Broederen: Dese Iongher en sterft niet. Ende Iesus en seyde niet tot hem: Hy en sterft niet, maer, ist dat ick wil, dat hy blijue, tot dat ick come, wat gaet het v aen?

24

Dit is de Iongher, die van desen dinghen ghetuycht, ende heeft dit geschreuen. Ende wy weten, dat zijn ghetuychenis waer is.

25

^† Daer zijn oock veel ander dinghen, die Iesus ghedaen heeft, welcke, waert dat si souden een nae den anderen bescreuen worden, ick houde, de Werelt en soude de boecken niet begrijpen, die te schrijuen waren.

† Ioan. 20.d.30

¶ Het eynde des Euangelij S. Iohannes.