Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Van dat lijden ende Passie ons Heeren Iesu Christi. Hoe Christus seyt dat hy opter werelt ghecomen is, om de waerheyt te ghetuyghen, ende dat die zijn stemme hooren, die wt der waerheyt gheboren zijn.

1

⁺ DOen Iesus sulcx ghesproken hadde^* ghinck hy wt met zijnen Iongheren, ouer de Beke Kidron, daer was eenen Hof, daer ghinc Iesus ende zijne Iongheren in.

+ A vers 1

* Mat. 26.d.35. Mar. 14.d.32 Luce. 22.c.39.

2

Ende Iudas die hem verriet, wiste de plaetse oock: Want Iesus vergaderde hem dickwils aldaer met zijne Iongheren.

3

^† Doen nv Iudas met hem ghenomen hadde de Schare, ende der hoogen Priesters ende Phariseen dienaers, coemt hy daer henen met Fackelen, Lampen, ende met wapenen.

† mat. 26.e.46. mar. 14.e.43. Luce. 22.d.47

4

Als nv Iesus wiste, alle wat hem ouercomen soude, ghinck hy wt, ende sprac tot haer: Wien soeckt ghy?

5

Sy antwoorden hem: Iesum van Nazareth. Iesus spreeckt tot haer: Ick bent. Iudas die hem verriet, stont oock by haer.

6

Als nv Iesus tot haer sprack: Ick bent, weken sy te rugge, ende vielen ter Aerden.

7

Doen vraechde hy haer noch eenmael: Wien soeckt ghy? Ende sy spraken: Iesum van Nazareth.

8

Iesus antwoorde: Ick hebt v gheseyt, dat ickt sy, soeckt ghy my dan, so laet dese gaen,

9

Op dat, dat woort veruult werde, dat hy seyde:^† Ick en hebbe dier gheenen verloren die ghy my ghegheuen hebt.

† Ioan. 17.b.17

10

^* Doen hadde Simon Petrus een Sweert, ende tooch het wt, ende sloech na des hooghen Priesters knecht, ende hieuw hem zijn rechter oor af. Ende de knecht hiet Malchos.

* Mat. 26.e.50 mar. 14.e.47

11

Doen sprack Iesus tot Petro: Steect dijn Sweert inde scheyde: En sal ick den Kelck niet drincken, dien my mijn Vader ghegeuen

[p. 47r]

heeft?

12

^* Maer de Schare, ende de Ouerhooftman, ende de dienaers der Ioden vatten Iesum aen, ende bonden hem,

* Mat. 26.f.56 Mar. 14.f.53. Luce. 22.d.54

13

Ende leyden hem ten eersten tot^† Hannas, die was Caiphas Sweer, welcke dies iaers hooghe Priester was:

† Luce. 3.a.2.

14

^‡ Het was Caiphas, die den Ioden riet: Het waer goet, dat een mensche ghedoot werdde, voor dat volck.

‡ Ioan. 11.e.50.

15

^* Ende Simon Petrus volchde Iesu nae, ende een ander Iongher. Die selue Iongher was den hooghen Priester bekent, ende ghinck met Iesu binnen, in des hooghen Priesters Palleys.

* Mat. 26.f.57. mar. 14.f.54. Luce. 22.d.54.

16

Maer Petrus stont daer buyten voor de duere. Doen ghinck de ander Iongher, die den hooghen Priester bekent was, wt, ende sprack met der duerwachtersche, ende bracht Petrum daer binnen.

17

⁺ Doen sprack de dienstmaecht de duerwachtersche tot Petro: Sijt ghy oock deses menschen Iongeren een? Hy sprack: Ick en bent niet.

+ C vers 17

18

Ende de knechten ende dienaers stonden, ende hadden een Cool vyer ghemaeckt, want het was cout, ende wermden haer. Ende Petrus stont by haer, ende wermde hem.

19

Ende de hooge Priester vraechde Iesum na zijne Iongheren ende na zijn leeringhe.

20

Iesus antwoorde hem:^* Ick hebbe vrij openbaerlijck ghesproken voor der werelt, Ick heb altijt gheleert inder Schole ende inden Tempel, daer alle Ioden te samen comen, ende en hebbe niet int verborghen ghesproken:

* Ioan. 7.c.26.

21

Wat vraecht ghy my daer nae? Vraecht die daer na, die ghehoort hebben, wat ick tot haer ghesproken heb: Siet, die selue weten, wat ick gheseyt hebbe.

22

Maer als hy sulcx sprack,^‡ gaf der dienaers een, die daer by stont, Iesu eenen kinnebackslach, ende sprack: Sult ghy den hooghen Priester also antwoorden?

‡ Esa. 50.b.6. Iere. 20.a.2. Mat. 26.g.67 Acto. 23.a.2.

23

^* Iesus antwoorde: Heb ick qualijck ghesproken, soo bewijst het, dat het boos sy: Maer hebbe ick recht ghesproken, wat slaet ghy my dan?

* Acto. 22.c.25

24

^† Ende Hannas seynde hem ghebonden, tot den hooghen Priester Caiphas.

† Mat. 26.f.56

25

^‡ Simon Petrus stont ende wermde hem. Doen spraken sy tot hem: En zijt ghy niet van zijnder Iongheren een? Maer hy versaectet, ende sprack: Ick en bent niet.

‡ Mat. 26.g.68 Mar. 14.g.65 Luce. 22.d.55.

26

Een van des hooghen Priesters knechten, een Maech des gheens, dien Petrus dat oor afghehouwen had, spreeckt: Sach ick v niet inden Hof by hem?

27

Doen versaecktet Petrus weder.^‡ Ende terstont craeyde de Haen.

‡ Ioan. 13.g.38.

28

^+† Doen leyden sy Iesum van Caipha voor dat Richthuys. Ende het was vroech.^* Ende sy en ginghen niet int Richthuys, op dat sy niet onreyn en werden, maer dat Paeschlam eten mochten.

+ D vers 28

† Mat. 27.a.1 Mar. 15.a.1. Luce. 23.a.1.

* Acto. 10.c.28 11.a.3.

29

Doen ghinck Pilatus tot haer wt, ende sprack: Wat brengt ghy voor clachte teghen desen mensche?

30

Sy antwoorden, ende spraken tot hem: En waer dese geen quaetdoender, wy en hadden hem v niet ouergeleuert.

31

Doen sprack Pilatus tot haer: Soo neemt ghy hem wech, ende ordeelt hem na uwer Wet. Doen spraken de Ioden tot hem: Wy en doruen niemant dooden.

32

^* Op dat veruult werde dat woordt Iesu, dat hy seyde, doen hy bediedde, wat doot hy steruen soude.

* Mat. 20.c.19. Ioan. 12.d.32.

33

^* Doen ghinck Pilatus weder binnen int Richthuys, ende riep Iesum, ende sprack tot hem: Sijt ghy der Ioden Coninck?

* Mat. 27.b.11. Mar. 15.a.2. Luce. 23.a.3.

34

⁺ Iesus antwoorde: Segt ghy dat van v seluen, oft hebbent v anderen van my gheseyt?

+ E vers 34

35

Pilatus antwoorde: Ben ick een Iode? Dijn volck, ende de hooghe Priesters, hebben my v ouergheleuert: Wat hebt ghy ghedaen?

36

Iesus antwoorde:^† Mijn Rijck en is niet van deser werelt. Waer mijn Rijck van deser werelt, mijn dienaers souden daerom strijden, dat ick den Ioden niet ouergeleuert en werde. Maer nv en is mijn Rijc niet van hier.

† Ioan. 6.b.15.

37

Doen sprac Pilatus tot hem: So zijt ghy dan noch euen wel een Coninck? Iesus antwoorde: Ghy segtet, Ick ben een Coninck. Ick ben daer toe gheboren, ende op de werelt ghecomen, dat ick de waerheydt betuyghen soude. Wie wt der waerheyt is, die hoort mijn stemme.

38

Pilatus spreect tot hem: Wat is waerheyt? Ende doen hy dat geseyt hadde, ghinc hy weder wt tot den Ioden, ende spreect tot haer:^* Ic en vinde geen schult aen hem.

* Mat. 27.c.24 Mar. 15.b.14 Luce. 23.b.14

39

Maer^† ghy hebt een ghewoonte, dat ick v op Paesschen eenen los gheue. Wilt ghy nv dat ic v der Ioden Coninck los gheue?

† mat. 27.b.15 Marc. 15.a.6. Luce. 23.b.17.

40

Doen riepen si weder altesamen, ende spraken: Niet desen,^‡ maer Barrabam. Ende Barrabas was een Moorder.

‡ Acto. 3.b.14