Den Bibel, Inhoudende dat Oude ende Nieuwe Testament (Biestkensbijbel)

[p. 46v]

¶ Dat .xvij. Capittel.

¶ Hoe Iesus zijn oogen inden Hemel sloech, ende zijnen Hemelschen Vader om zijn verclaringhe badt, die hy by hem hadde, al eer der werelt gront gheleyt was, ende hoe hy voor zijn Discipulen, ende voor alle die door haer woort aen hem gheloouen badt, ende niet voor de werelt.

1

⁺ SVlcx sprack Iesus, ende hief zijn ooghen op na den Hemel, ende sprack:^‡ Vader, de vre is hier, dat ghi uwen Soon verclaert, op dat uwe Soon v oock verclare.

+ A vers 1

‡ Ioan. 12.c.23. 13.d.32.

2

^* Ghelijck als ghi hem macht hebt gegeuen ouer alle dat vleesch op dat hy dat eewighe leuen gheue, allen den ghenen, die ghi hem ghegeuen hebt.

* Mat. 11d.23 28.c.18.

3

^† Ende dat is het eewighe leuen, dat sy v, dat ghy alleen waerachtich Godt, zijt, ende dien ghy gesonden hebt, Iesum Christum, bekennen.

† Esa. 53.c.14. Iere. 9.d.23.

4

Ick hebbe v verclaert op Aerden,^‡ ende volbracht dat werck dat ghy my ghegeuen hebt, dat ic doen soude.

‡ Ioan. 19.c.30.

5

^* Ende nv verclaert ghy my Vader, by v seluen, met der claerheyt die ick by dy hadde, eer de werelt was.

* Ioan. 10.c.30. 14.a.9.

6

Ick heb uwen Naem gheopenbaert den menschen, die ghy my vander werelt ghegheuen hebt. Sy waren uwe, ende ghy hebtse my ghegeuen, ende sy hebben v woort behouden.

7

⁺ Nv weten sy, dat alle wat ghy my gegeuen hebt, sy van v.

+ B vers 7

8

^* Want de woorden die ghy my ghegeuen hebt, heb ick haer ghegeuen, ende sy hebbent aenghenomen,^† ende bekent waerachtelijc, dat ick van v wtghegaen ben, ende geloouen dat ghy my gesonden hebt.

* Ioan. 4.e.42

† Ioan. 16.d.27

9

Ic bidde voor haer,^‡ ende en bidde niet voor de werelt, mer voor die, die ghy my ghegeuen hebt, want sy zijn dijne.

‡ 1.Ioan. 2.c.15.

10

Ende alle wat mijn is, dat is dijn:^* Ende wat dijn is, dat is mijn, Ende ic ben in haer verclaert.

* Ioan. 16.b.15.

11

Ende ick en ben niet meer inder werelt: Maer sy zijn inder werelt, ende ick come tot v. Heylighe Vader, onderhoutse in uwen Naem,^† die ghy my ghegeuen hebt, dat sy eens zijn, ghelijck als wy.

† Esa. 8.b.9.

12

^‡ Dewijle ick by haer was inder werelt, onderhielt ickse in uwen Naem. Die ghy my ghegheuen hebt, die heb ick bewaert,^* ende daer en is niemant van haer verloren, dan alleen dat verloren kint,^† op dat de Schrift veruult werde.

‡ Ioan. 6.d.39. 10.e.28. 18.a.9

* Ioan. 18.a.9.

† Psal. 41.b.9. 109.a.7.

13

Maer nv come ick tot v, ende spreke sulcx inder werelt,^‡ op dat sy mijn blijschap in haer hebben volcomen.

‡ 1.Ioan. 1.a.4

14

Ick hebbe haer gegheuen dijn woort^* ende de werelt haet haer, want sy en zijn niet vander werelt, ghelijck als ick oock niet vander werelt en ben.

* Sapi. 2.c.15. Ioan. 15.b.19

15

Ick en bidde niet, dat ghy haer vander werelt neemt^† maer dat ghy haer bewaert vant quade.

† Mat. 6.b.13.

16

Sy en zijn niet vander werelt, ghelijck als ick oock niet vander werelt en ben.

17

⁺ Heylicht haer in dijner waerheyt.^‡ Dijn woort is de waerheyt.

+ C vers 17

‡ Ioan. 8.d.40

18

^* Ghelijck als ghy my geseynt hebt inde weerelt, soo seynde ick haer oock inde weerelt:

* Ioan. 20.c.21.

19

^† Ick heylighe my seluen voor haer, op dat sy oock gheheylicht zijn inder waerheyt.

† 1.Corin. 1.a.2.d.29.

20

Ende ick en bidde niet alleen voor haer, maer oock voor die, die door haer woort aen my gheloouen sullen,

21

Op dat sy alle^‡ een zijn, ghelijck als ghy Vader in my, ende ick in v, dat sy oock in ons een zijn, op dat de werelt ghelooue, dat ghy my ghesonden hebt.

‡ Galat. 3.d.28.

22

Ende ic heb haer ghegeuen de heerlijcheyt, die ghy my gegheuen hebt, op dat sy een zijn, ghelijck als wy een zijn.

23

Ick in haer, ende ghy in my, op dat sy volcomen zijn, in een, ende de werelt bekenne, dat ghy my gesonden hebt, ende hebt haer lief, ghelijck als ghy my lief hebt.

24

Vader,^* Ick wil, dat, so waer ick ben oock die by my zijn, die ghy my ghegheuen hebt: Dat sy mijne heerlijcheyt sien, die ghy my ghegheuen hebt: Want ghy hebt my lief ghehadt, eer de werelt ghefondeert wert.

* Ioan. 12.c.26. 14.a.3.

25

Rechtuaerdighe Vader, de^* werelt en kent v niet, maer ick kenne v, ende dese bekennen,^† dat ghy my ghesonden hebt.

* Mat. 11.c.27. Ioan. 15.c.21. 16.a.3.

† Ioan. 16.d.27 17.b.8.

26

Ende ick heb haer uwen Naem kenlijck ghemaect, ende wil hem kenlijck maken, op dat de liefde, dear ghy my mede lief hebt, in haer sy, ende ick in haer.