Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Hoe Iesus zijne Discipulen leerde ende onderwijsde, teghen den toecomenden tijt, seyt haer hoe dat sy verstroeyt sullen werden, ende inder werelt druck hebben.

1

⁺ SVlcks heb ick tot v ghesproken, op dat ghy v niet en ergert.

+ A vers 1

2

^* Sy sullen v inden Ban doen.^† Maer de tijt coemt, dat soo wie v doodet, die sal meynen, hy doe Gode eenen dienst daer aen.

* Mat. 10.b.17. 24.a.9. Luce. 21.b.11.

† Actu. 9.a.1.

3

Ende^‡ sulcx sullen sy v daerom doen, dat sy noch mijnen Vader, noch my en kennen.

‡ Ioan. 15.b.21 1.Cor. 2.a.8.

4

^* Maer sulcks heb ick tot v ghesproken, op dat, wanneer de tijt comen sal, dat ghy daer aen ghedenckt, dat ickt v gheseyt hebbe. Maer sulcx en heb ick v van aenbeghin niet gheseyt, want ick was by v.

* Ioan. 13.b.19. 14.c.29.

5

Maer nv gae ick henen, tot dien, die my ghesonden heeft, ende niemant onder v en vraecht my: Waer gaet ghy henen?

6

Maer om dat ick sulcx tot v ghesproken heb, so is uwe herte vol truericheyts geworden.

7

Maer ick segge v de waerheyt: Het is v goet dat ick henen gae. Want ist dat ick niet henen en gae, soo en coemt de Trooster niet tot v: Maer ist dat ick henen gae,^* soo wil ick hem tot v seynden.

* Ioan. 14.c.26 15.c.26.

8

Ende wanneer die selue coemt, die sal de werelt straffen, om de sonde, ende om de gherechticheyt, ende om het ordeel.

9

Om de sonde, dat sy niet aen my en geloouen.

10

Om de gherechticheyt, dat ick tot den Vader ga, ende ghy my voortaen niet en siet.

11

Om het ordeel,^† Dat de Vorst deser werelt gheordeelt is.

† Ioan. 12.d.31. 14.c.30. Collo. 2.b.15.

12

⁺ Ick heb v noch veel te segghen maer ghy en connet nv niet dragen.

+ B vers 12

13

Maer wanneer ghene, de gheest der waerheyt comen sal,^* die sal v in alle waerheyt leyden.^† Want hy en sal niet van hemseluen spreken, maer wat hy hooren sal, dat sal hy spreken, ende wat toecomende is, sal hy v vercondigen.

* Ioan. 14.c.26

† Ioan. 12.f.49

14

Die selue sal my verclaren, want vanden mijnen sal hijt nemen, ende v vercondighen.

15

^* Al wat de Vader heeft, dat is mijn, daerom heb ick gheseyt: Hy salt vanden mijnen nemen, ende v vercondighen.

* Mat. 11.e.27. Luce. 10.c.22. Ioan. 3.c.35.

16

^† Ouer een cleyne wijle soo en sult ghy my niet sien, ende weder ouer een cleyne wijle, soo sult ghy my sien, want ick gae tot den Vader.

† Ioan. 7.d.33

17

Doen spraken sommighe onder zijne Iongheren onder malcanderen: Wat is dat, dat hy tot ons seyt: Ouer een cleyne wijle soo en sult ghy my niet sien, ende weder ouer een cleyne wijle, soo sult ghy my sien, ende dat ick tot den Vader gae?

18

Doen spraken sy: Wat is dat, dat hy seyt: Ouer een cleyne wijle? Wy en weten niet, wat hy seyt.

19

Doen merckte Iesus dat sy hem vraghen wilden, ende sprack tot haer: Daer vraecht ghy onder malcanderen na, dat ick gheseyt hebbe: Ouer een cleyne wijle, soo en sult ghy my niet sien, ende weder ouer een cleyne wijle, so sult ghy my sien.

20

⁺ Voorwaer, voorwaer, ick seg v: Ghy sult weenen ende huylen, maer de wereldt sal haer verblijden. Maer ghy sult truerich zijn,^* Doch uwe truericheyt sal tot vruechden worden.

+ C vers 20

* Ioan. 20.c.20.

21

^† Een Vrouwe, wanneer sy baert, so heeft sy truericheyt, want haer vre is ghecomen. Maer als sy dat kint gebaert heeft, soo en denckt sy niet meer op den angst, om der blijschap wille, dat de mensche ter werelt gheboren is.

† Esa. 26.c.17.

22

Ende ghy hebt oock nv truericheyt, maer ick wil v weder sien, ende uwe herte sal hem verblijden, ende uwe blijschap en sal niemant van v nemen. Ende aenden seluen daghe, en sult ghy my niet vraghen.

23

Voorwaer, voorwaer, ick seg v:^‡ Ist dat ghy den Vader wat bidden sult in mijnen Naem, soo sal hijt v gheuen.

‡ Matt. 7.a.7. 21.c.22. Mar. 11.c.24. Luce. 11.b.9. Ioan. 14.b.13 15.a.7.

24

Dus langhe en hebt ghy niet gebeden in mijnen Naem. Bidt, soo sult ghy ontfanghen, dat uwe blijschap volcomen sy.

25

Sulcks heb ick tot v door^* by spraken ghesproken, Maer de tijt coemt, dat ick niet meer door byspraken met v spreken en sal, maer v vrij vercondigen sal van mijnen Vader.

* Psal. 78.a.1. Matt. 13.a.3. Marc. 4.a.2. Luce. 8.a.4.

26

⁺ Inden seluen daghe sult ghy bidden in mijnen Naem. Ende ick en seg v niet, dat ick den Vader voor v binnen wil:

+ D vers 26

27

Want hy de Vader heeft v selue lief, daerom dat ghy my lief hebt, ende ghelooft, dat ick van Gode wtghegaen ben.

28

^† Ick ben vanden Vader wtghegaen ende ghecomen inder werelt: Wederom verlaet ick de wereldt, ende gae totten Vader.

† Ioan. 13.a.3.

29

Sijn Iongheren segghen tot hem: Siet, nv spreeckt ghy vrij wt, ende en segt gheen byspraeck.

30

^‡ Nv weten wy, dat ghy alle dinghen weet, ende en behoeft niet dat v yemant vraghe. Daerom gheloouen wy, dat ghy van Godt wtghegaen zijt.

‡ Ioan. 21.c.17.

31

Iesus antwoorde haer. Nv ghelooft ghy. Siet,^* de vre coemt, ende is alreede gecomen, dat ghy verstroeyt wordet, een yeghelijck in dat zijne, ende my alleen latet,

* Sach. 13.b.7. Matt. 26.c.30 Mar. 14.d.26

32

Maer ick en ben niet alleen,^‡ want de Vader is by my.

‡ Ioan. 14.b.20

33

Sulcks heb ick met v gesproken, op dat ghy in my^† vrede hebbet. Inder werelt hebt ghy angst: Maer hebt eenen goeden moet, Ick hebbe de werelt ouerwonnen.

† Esaie. 9.a.5. Rom. 5.a.1. Ephe. 2.c.13. Collos. 1.c.20.