Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ Hoe Iesus zijne Discipulen seyde dat hy den Wijnstock ende sy de rancken waren, ende haer totter liefden vermaende, sprack van de coemste des heylghen gheests.

1

⁺ ICk ben eenen rechten^* Wijnstock, ende mijn Vader een Wijngaerdenier.

+ A vers 1

* Eccle. 24.c.21 Mat. 15.b.15.

2

Een yeghelijcke Wijnrancke aen my, die gheen vrucht en brengt, sal hy afsnijden: Ende een yeghelijcke, die daer vrucht brengt, sal hy reynighen, op dat sy meer vrucht brenghe.

3

^* Ghy zijt nv reyn om des woorts wille, dat ick tot v ghesproken hebbe:

* Ioan. 13.b.10. Acto. 15.b.9.

4

Blijft in my ende ick in v. Ghelijck als de Wijnrancke gheen vrucht brenghen en can van haerseluen, ten sy dat sy aenden Wijnstock blijue: Alsoo ghy oock niet, ten sy, dat ghy in my blijft.

5

Ick ben de Wijnstock, ghy zijt de Wijnrancken. Wie in my blijft, ende ick in hem, die brengt veel vruchten,

6

Want sonder my en cont ghy niet doen. Wie niet in my en blijft, die wordt wech gheworpen, ghelijck als een Wijnrancke, ende verdorret, ende men vergadertse,^* ende werptse int vyer, ende moet verbernen.

* Eze. 15.a.4.

7

Ist dat ghy in my blijft, ende mijn woorden in v blijuen,^† soo sult ghy bidden, wat ghy wilt, ende het sal v gheschien.

† Mat. 21.c.22. Mar. 11.c.24. Ioan. 14.b. 13 16.c.23.

8

Daer in wordt mijn Vader gheeert, dat ghy veel vruchten brengt, ende wordet mijne Iongheren.

9

Ghelijck als my mijn Vader lief heeft, alsoo heb ick v oock lief: Blijft in mijnder liefden.

10

^‡ Ist dat ghy mijn gheboden hout, soo blijft ghy in mijnder liefden: Ghelijck als ick mijns Vaders gheboden houde, ende blijue in zijnder liefden.

‡ Ioan. 14.b.21 1.Ioan. 5.a.3.

11

⁺ Sulcks spreeck ick tot v, op dat mijn blijschap in v blijue, ende uwe blijschap volcomen worde.

+ B vers 11

12

^* Dit is mijn ghebot, dat ghy v onder malcanderen lief hebt, ghelijck als ick v lief hebbe.

* Leuit. 19.d.18 Ioan. 13.d.34 1.Ioan. 3.c.23.

13

Niemant en heeft grooter liefde, dan die, dat hy zijn leuen laet voor zijne vrienden.

14

^† Ghy zijt mijn vrienden, ist dat ghy doet dat ick v ghebiede.

† Mat. 12.e.50. 2.Cor. 5.b.16.

15

Ick en seg nv voortaen niet, dat ghy knechten zijt, want een knecht en weet niet, wat zijn Heere doet.^* Maer v heb ick gheseyt, dat ghy vrienden zijt. Want al wat ick van mijnen Vader ghehoort heb, dat heb ick v te kennen ghegheuen.

* Ioan. 8.c.26.

16

Ghy en hebt my niet vercoren,^† maer ick heb v vercoren, ende gheset, dat ghy henen gaet,^‡ ende vrucht brengt, ende uwe vrucht blijue, op dat soo wat ghy den Vader bidt in mijnen Naem, dat hijt v gheue.

† Ephe. 1.a.4.

‡ Mar. 16.b.15. Collo. 1.a.6.

17

^* Dat ghebiede ick v, dat ghy v onder malcanderen lief hebt.

* 1.Ioan. 3.b.13.

18

^† Ist dat v de werelt haet, soo wetet, dat sy my voor v ghehaet heeft.

† Ioan. 17.b.14.

19

^‡ Waert ghy vander werelt, soo had de werelt dat hare lief: Maer dewijle ghy niet vander werelt en zijt, maer ick heb v vander werelt vercoren, daerom haet v de werelt.

‡ Galat. 1.b.10.

20

Ghedenckt aen mijn woordt, dat ick v gheseyt hebbe:^* De knecht en is niet grooter dan zijn heere. Hebben sy my veruolcht, sy sullen v oock veruolgen. Hebben sy mijn woort ghehouden, soo sullen sy het uwe oock houden.

* Mat. 10.c.24 Luc. 6.d.40. Ioan. 13.b.16.

21

^+* Maer dat alle sullen sy v doen, om mijns Naems wille, want sy en kennen dien niet, die my ghesonden heeft.

+ C vers 21

* Ioan. 16.a.3.

22

^† Waert dat ick niet ghecomen en ware, ende haddet haer gheseyt, soo en hadden sy gheen sonde. Maer nv en

† Roma. 4.c.15 5.c.20.

[p. 46r]

connen sy niet voorgheuen, haer sonden te ontschuldighen.

23

Wie my haet, die haet oock mijnen Vader.

24

^* En hadde ick de wercken niet ghedaen onder haer, die gheen ander ghedaen en heeft, soo en hadden sy gheen sonde. Maer nv hebben zijt ghesien, ende haten nochtans beyde my ende mijnen Vader.

* Ioan. 9.a.4. 10.d.37.

25

Doch dat de Spruecke in hare Wet gheschreuen,^† veruult worde: Sy haten my sonder oorsaecke.

† Psal. 35.c.19. 69.a.4.

26

^* Maer wanneer de Vertrooster comen sal, welcken ick v seynden sal vanden Vader, de gheest der waerheyt, die vanden Vader wtgaet, die sal ghetuychenisse van my gheuen.

* Ioan. 14.c.26 16.a.7. Actu. 2.a.4.

27

^† Ende ghy sult oock ghetuychenisse van my gheuen,^‡ want ghy zijt van aenbeghin by my gheweest.

† Actu. 1.a.8. 2.d.34.

‡ Actu. 1.d.21.