Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Hoe de Heere Iesus zijn Discipulen trooste, ende hoe hi verraden soude werden, ende vermaendese zijn geboden te houden.

1

⁺ MAer voor het Feest der Paesscen, doen Iesus bekende, dat sinen tijt ghecomen was, dat hy wt deser werelt ghinghe tot den Vader, Ghelijck als hy hadde lief ghehadt, de sinen, die inder werelt waren, soo hadde hyse lief tot aent eynde.

+ A vers 1

2

Ende nae den Auonteten,^* doen nv de Duyuel hadde den Iuda Simonis Ischarioth int herte ghegheuen, dat hy hem verriedde,

* Mat. 26.b.13. Mar. 14.b.10 Luce. 22.a.3.

3

^† Wiste Iesus dat hem de Vader alle dinck in zijn handen ghegeuen hadde,^‡ Ende dat hy van Gode ghecomen was, ende tot Godt ghinghe,

† Mat. 11.e.27 Luce. 10.c.22.

‡ Ioan. 16.d.28

4

Stont hy vanden Auonteten op, leyde zijn cleederen af, ende nam eenen Schorteldoeck, ende omgordde hem.

5

Daer nae goot hy water in een Becken, begost den Iongheren de voeten te wasschen, ende droochdese met den Schorteldoeck, daer hy mede omgordet was.

6

Doen quam hy tot Simon Petro. Ende die selue sprack tot hem:^† Heere, sout ghy my mijn voeten wasschen?

† Matt. 3.b.14

7

Iesus antwoorde, ende sprack tot hem: Wat ic doe dat en weet ghy nv niet, mer ghy sullet hier na beuinden.

8

Doen sprac Petrus tot hem: Nemmermeer en sult ghy my de voeten wasschen. Iesus antwoorde hem: En sal ick v niet^* wasschen, soo en hebdy gheen deel met my.

* Psal. 51.a.2.

9

⁺ Simon Petrus spreect tot hem: Heere, niet alleen de voeten, maer oock de handen ende dat hooft.

+ B vers 9

10

Iesus spreeckt tot hem:

[p. 45r]

Wie ghewasschen is, die en behoeft niet meer dan de voeten te wasschen, maer hy is geheel reyn,^† Ende ghy zijt reyn, maer niet alle.

† Ioan. 15.a.3.

11

^‡ Want hy wist zijnen Verrader wel, daerom sprack hy: Ghy en zijt niet alle reyn.

‡ Ioan. 6.g.64

12

Doen hy nv haer^‡ voeten ghewasschen hadde, nam hy zijn cleederen tot hem, ende settede hem weder neder, ende sprack weder tot haer: Weet ghy wat ick v ghedaen heb?

‡ 1.Tim. 5.b.10

13

Ghy heet my Meester ende^* Heer, ende segt daer recht aen, want ic bent ooc.

* 1.Cor. 8.a.6. Phil. 2.a.11.

14

Ist dat ick nv uwe Heer ende Meester, v de voeten ghewasschen heb,^† soo sult ghi v ooc onder malcanderen de voeten wasschen.

† 1.Tim. 5.b.10.

15

^‡ Een aenwijsinge heb ick v gegeuen, dat ghy doet, gelijc als ick v gedaen heb.

‡ Ephe. 5.a.2. 1.Pet. 2.c.21. 1.Ioan. 2.a.6

16

^* Voorwaer, voorwaer seg ick v: De knecht en is niet grooter dan zijn Heer, noch de Apostel, grooter dan die hem gesonden heeft.

* mat. 10.c.24 Luce. 6.d.40 Ioan. 15.b.20

17

Ist dat ghy sulcx weet,^† salich zijt ghy, ist dat ghijt doet.

† Mat. 5.b.19

18

Ick en segge niet van v allen, ick weet, welcke ick vercoren hebbe: Maer op dat de Schrift veruult worde.^‡ Die mijn broot eet, die treet my met voeten.

‡ Psal. 41.b.10

19

^* Nv seg ickt v, eert geschiet, op dat, wanneert gheschiet is, dat ghy ghelooft, dat ickt ben.

* Ioan. 14.c.29 16.a.4.

20

⁺ Voorwaer, voorwaer, ick seg v:^† Wie dien aen neemt, ist dat ick yemant seynden sal, die neemt my aen: Ende wie my aen neemt, die neemt dien aen, die my gesonden heeft.

+ C vers 20

† Mat. 10.e.40 Mar. 9.d.40 Luc. 10.b.16.

21

Doen Iesus sulcx gheseyt hadde, wert hy bedroeft inden gheest, ende betuychde ende sprack:^‡ Voorwaer, voorwaer, segge ic v,^* Een van v sal my verraden.

‡ Mat. 26.b.20 Mar. 14.c.18 Luce. 22.b.21.

* Act. 20.d.30. 1.Ioan. 2.c.19

22

Doen saghen haer de Iongheren onder malcanderen aen, ende haer wert bange, van wien hy seyde.

23

Daer wasser een onder zijnen Iongeren die ter Tafelen sat, aen de borst Iesu,^* welcken Iesus liefhadde:

* Ioan. 19.c.26 20.a.2. 21.a.7.

24

Dien wenckte Simon Petrus, dat hy vereyschen soude, wie het ware, van dien hy seyde?

25

Want die selue lach aen de borst Iesu, ende sprack tot hem: Heere, wie ist?

26

Iesus antwoorde: Die ist, dien ick den bete indoppe ende gheue. Ende hy dopte den bete in, ende ghaf hem Iuda Simonis Ischarioth.

27

⁺ Ende na den bete voer de Satan in hem. Doen sprac Iesus tot hem: Wat ghy doet, dat doet haestelijck.

+ D vers 27

28

Maer dat selue en wist niemant ouer der Tafelen, waer toe hijt hem seyde.

29

Sommighe meynden,^† dewijle Iudas den Buydel hadde, Iesus sprake tot hem: Coopt wat ons van noode is, op dat Feest, oft dat hy den Armen wat gaue.

† Ioan. 12.a.6.

30

^‡ Doen hy nv den bete ghenomen hadde, ghinck hy terstont wt. Ende het was nacht.

‡ Ioan. 18.a.2.

31

Ende doen hy wtgegaen was, spreect Iesus:^‡ Nv is des menschen Sone verclaert, ende Godt is verclaert in hem.

‡ Ioan. 12.c.23. 17.a.2.

32

Is Godt verclaert in hem, soo sal hem Godt oock verclaren in hem seluen, ende sal hem haest verclaren.

33

Lieue kinderkens, ick ben noch eenen cleynen tijt by v.^* Ghy sult my soecken, ende ghelijck ick tot den Ioden seyde, waer ick henen gae, daer en cont ghy niet henen comen. Ende seg v nv:

* Ioan. 7.d.34 8.b.21.

34

^+* Een nieu ghebot gheue ick v, dat ghy v onder malcanderen lief hebt, ghelijck als ick v lief heb ghehadt, op dat ghy v oock onder malcanderen lief hebbet.

+ E vers 34

* Leuit. 19.d.18 Ioan. 15.b.12. 1.Pet. 4.b.8.

35

Daer^† by sal een yeghelijck bekennen, dat ghy mijn Iongheren zijt, ist dat ghy liefde onder malcanderen hebt.

† 1.Ioan. 2.a.5. 3.b.11.

36

Simon Petrus spreect tot hem: Heere, waer gaet ghy henen? Iesus antwoorde hem: Daer ick henen gae, en moecht ghy my nv niet volghen,^‡ Maer ghy sult my hier naemaels volghen.

‡ Ioan. 21.d.18.

37

Petrus spreect tot hem: Heere, waerom en mach ick v nv niet volgen?^* Ick wil mijn leuen voor v laten.

* Mat. 26.c.34 Mar. 14.c.29 Luce. 22.c.33.

38

Iesus antwoorde hem: Sout ghy v leuen voor my laten? Voorwaer, voorwaer, ick seg v:^† De Haen en sal niet craeyen, tot dat ghy my driemael hebt versaect.

† Ioan. 18.d.27