Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Hoe datmen door de rechte duere inde Schaepskoye moet gaen, want hy is de duere. Vanden goeden Herder. Noch veel schoone leeren, hoe hem de Ioden steenighen wouden.

1

⁺ VOorwaer, voorwaer, ic seg v: Wie niet ter dueren in en gaet inden Schaepstal, maer climt daer anderswaer in, die is een dief ende Moorder.

+ A vers 1

2

Maer die ter dueren ingaet, die is een Herder der Schapen.

3

Den seluen doet de duerwachter op, ende de Schapen^* hooren zijn stemme.^† Ende hy roept zijn Schapen by namen, ende leytse wt.

* Ioan. 8.d.47

† Pro. 27.c.23

4

Ende wanneer hy zijn Schapen heeft wtghelaten, soo gaet hy voor haer henen, ende de Schapen volgen hem nae, want si kennen zijn stemme.

5

Maer eenen vreemden en volghen si niet nae, maer vlieden van hem, wandt si en kennen der vreemder stemme niet.

6

Dese sprueck seyde Iesus tot haer. Maer si en verstonden niet, wat het was, dat hy tot haer seyde.

7

Doen sprack Iesus weder tot haer: Voorwaer, voorwaer, ick seg v:^* Ick ben de duere tot den Schapen.

* Ioan. 14.a.6

8

Alle die voor my ghecomen zijn, dat zijn dieuen ende Moorders gheweest, maer de Schapen en hebben nae haer niet ghehoort.

9

Ick ben de duere, Ist dat yemant door my ingaet, die sal salich worden, ende sal in ende wtgaen, ende weyde vinden.

10

^† Een dief en coemt niet, dan dat hy stele, worghe, ende verdoe.^‡ Ick ben gecomen, dat si dat leuen, ende oueruloedelijck ghenoech hebben souden.

† Iere. 23.c.16.

‡ Esa. 40.b.11

11

Ick ben een goet^* Herder. Een goet Herder laet zijn leuen voor de Schapen.

* Esai. 40.b.11 Ezec. 34.d.23. Miche. 5.a.3. 1.Ioan. 3.c.16. Hebr. 13.d.20.

12

^† Maer een huerlinc, die geen Herder en is, diens de Schapen niet eyghen en zijn, siet den Wolf comen, ende verlaet de Schapen, ende vliet.⁺ Ende de Wolf grijpt, ende verstroyt de Schapen.

† Sac. 11.c.16

+ B vers 12

13

Maer de huerlinck vliet, want hy is een huerlinc, ende en acht der Schapen niet.

14

Ick ben een goet Herder,^‡ ende bekenne de mijne, ende ben bekent den mijnen.

‡ 2.Tim. 2.b.19

15

^* Ghelijck als my mijn Vader kent, ende ic kenne den Vader, ende ick laet mijn leuen voor de Schapen.

* Mat. 11.e.27 Luce. 10.c.22.

16

^† Ende ick heb noch ander Schapen, die niet en zijn wt desen stal, ende die selue moet ick oock toe brenghen, ende si sullen mijn stemme hooren.^‡ Ende sal een Cudde ende Schaepstal worden.

† Esaie. 56.b.8.

‡ Eze. 37.d.24.

17

Daerom heeft my mijn Vader lief, dat ic mijn leuen^* verlate, op dat ict weder neme:

* Esaie. 53.c.15.

18

Niemant en neemtet van my, maer ick verlatet van my seluen. Ic hebbes macht te verlaten, ende hebbes macht weder te nemen. Soodanighen ghebot heb ick ontfanghen van mijnen Vader.

19

^† Ende doen werter wederom een tweedracht onder den Ioden ouer dese woorden.

† Ioan. 9.b.16.

20

Vele van haer seyden:^‡ Hy heeft den Duyuel, ende is onsinnich: Wat hoort ghy na hem?

‡ Mat. 9.d.34. Marc. 3.c.22. Ioan. 7.b.20. 9.b.16.

21

De ander spraken: Dat en zijn geen woorden eens besetens. Can de Duyuel oock der blinden oogen op doen?

22

^+* Ende daer wert kercwijnghe tot Ierusalem, ende het was winter.

+ C vers 22

* 2.mac. 10.a.5.

23

Ende Iesus wandelde inden Tempel int^† voorhuys Salomonis.

† 3.Reg. 6.a.3. Actor. 3.b.11. 5.b.12.

24

Doen omcinghelden hem de Ioden, ende spraken tot hem: Hoe langhe hout ghy onse sielen op? Sijt ghy Christ, soo segtet ons vrij wt.

25

Iesus antwoorde haer:^‡ Ick hebt v gheseyt, ende ghy en gheloouet niet.^* De wercken die ick doe in mijns Vaders Naem, die geuen ghetuychenisse van my.

‡ Ioan. 4.d.26 9.d.37.

* Ioan. 5.d.36

26

Maer ghy en geloouet niet, want ghy en zijt niet van mijnen Schapen, als ick v gheseyt heb,

27

Wandt mijn Schapen hooren mijn stemme, ende ick kense, ende si volghen my.

28

Ende ick geue haer dat eewighe leuen, ende si en sullen nemmermeer vergaen,

[p. 43v]

ende niemant en salse my wt mijnder hant rucken.

29

De Vader diese my ghegeuen heeft, is grooter dan alle dinck, ende niemant en canse wt mijns Vaders handen rucken.

30

^* Ick ende de Vader zijn een.

* Deut. 33.a.3. Ioan. 14.a.9. 17.c.21.

31

^† Doen namen de Ioden wederom steenen op, dat si hem steenichden.

† Ioan. 8.e.59 11.a.8.

32

Iesus antwoorde haer: Veel goeder wercken heb ick v bewesen van mijnen Vader. Om welcke wercken onder den seluen, steenicht ghy my?

33

⁺ De Ioden antwoorden hem, ende spraken: Om des goets wercks wille en steenighen wy v niet,^* Maer om der Gods lasteringhe wille, ende dat ghy een mensche zijt, ende maect v seluen tot eenen Godt.

+ D vers 33

* Ioan. 5.b.18.

34

Iesus antwoorde haer: En staeter niet ghescreuen in uwer Wet:^† Ick hebbe gheseyt, ghy zijt Goden?

† Psal. 82.a.6.

35

Ist dat sy die Goden noemt, tot welcken dat woordt Godts gheschiedde, ende de Schrift en can doch niet gebroken worden,

36

Segt ghy dan tot dien, dien de Vader gheheylicht, ende inde werelt gesonden heeft:^* Ghy lastert Godt? Daerom dat ick seg: Ic ben Gods Soon?

* mat. 26.g.64 mar. 14.g.62. Luce. 22.e.70.

37

En doe ick^† de wercken mijns Vaders niet, soo en ghelooft my niet:

† Ioan. 9.a.4 15.c.24.

38

Maer doe ickse, so ghelooft doch den wercken, en wilt ghy my niet geloouen, op dat ghy bekent, ende ghelooft, dat de Vader in my is, ende ick in hem.

39

Sy^* sochten weder om hem te grijpen, maer hy ontghinck haer wt haren handen,

* Mat. 12.b.14 Marc. 3.a.6. Ioan. 7.b.19.

40

Ende tooch weder henen, op gheen zijde des Iordaens, aen de plaetse^† daer Iohannes te voren gedoopt hadde, ende bleef aldaer.

† Ioan. 1.c.28. 3.c.23.

41

Ende veel quamen tot hem, ende seyden: Iohannes en dede geen Teecken,^* maer al wat Iohannes van desen gheseyt heeft, dat is waer.

* Ioan. 5.d.33.

42

Ende veel gheloofdender aldaer aen hem.